14
Kamatay si Yahiya Magpapandi
1 Ma waktu heꞌ-i sultan Herod ya bay magbayaꞌ ma lahat Jalil. Manjari itu makakale iya pasal kahinangan si Isa 2 ati ahꞌlling iya ni saga aꞌana pangandolan, yukna, “Si Yahiya Magpapandi koꞌ inān, pinakallum na pabīng min kamatayna. Angkan tahinangna saga hinang makainu-inu inān.”
3-4 Angkan buwattēꞌ pahꞌlling si Herod, sabab iya ya bay magpanohoꞌan amapatay si Yahiya. Buwattitu bay kahālanna, sultan Herod itu bay magkabayaꞌ maka ipalna si Herodiyas, boꞌ allum lagiꞌ siyalina si Pilip, ya hꞌlla si Herodiyas eꞌ. Pinabukagan na paꞌin si Herod eꞌ si Yahiya, yukna, “Mbal manjari bang ka magtimbul maka hꞌnda danakannu! Dusahan ka!” Angkanna si Yahiya bay sinōꞌ sinaggaw eꞌ sultan, sinōꞌ niekang-ekangan boꞌ yampa niꞌisi ni deyom kalabusu. 5 Bilahi si Herod amapatay si Yahiya sagōꞌ tināw iya ma kahekaꞌan aꞌa, sabab magkahagad sigām in si Yahiya nabi.
6 Jari magpajamu sultan Herod panabuna ma llaw kapaganak ma iya. Angigal anak si Herodiyas budjang ma pangꞌndaꞌ saga luruk ati kasulutan sidda si Herod, 7 angkan janjiꞌanna budjang inān. Yukna, “Janjiꞌanta ka. Ai-ai amuꞌnu ni aku pamuwanku toꞌongan.”
8 Na, in budjang inān bay kapitnahan asal eꞌ inaꞌna angkan yukna ni sultan, “Buwanin aku kōk si Yahiya Magpapandi, pinatꞌnnaꞌ ma talam.”
9 Sidda asusa sultan inān, sagōꞌ mbal kapindahan bay panganjanjiꞌna ma alopan saga luruk eꞌ, angkan sohoꞌna subay nirūlan budjang inān ma bay amuꞌna heꞌ. 10 Jari magpanohoꞌan si Herod subay pinonggolan kōk si Yahiya ma deyom kalabusu. 11 Puwas eꞌ pinatꞌnnaꞌ kōkna ma talam boꞌ yampa binowa ni budjang, ati niꞌndeꞌan eꞌna ni inaꞌna. 12 Sakali pinaꞌan saga mulid si Yahiya angāꞌ mayatna kinubul. Puwas eꞌ pehēꞌ sigām ni si Isa angahakaꞌan iya.
Limangibu Heka Aꞌa Pinakan eꞌ si Isa
13 Na, pagkale si Isa ma pasal inaꞌan-i, alaꞌan iya minnēꞌ amusay ni lahat halam magaꞌa, hal iya dangan-danganna. Kinataꞌuwan paꞌin kamahēꞌanna, maglaꞌanan saga aꞌa min baꞌanan kauman sigām boꞌ paturul ma iya, amaklay min bihing susulan. 14 Pagdeyoꞌ paꞌin si Isa min bayananna, taꞌndaꞌna saga aꞌa inān landuꞌ toꞌongan aheka. Sakali tꞌkkahan iya aseꞌ ma sigām, maka kauliꞌan eꞌna sasuku taga-saki.
15 Pagka abay kohap na, pehēꞌ ni si Isa saga mulidna. Yuk sigām, “Sōng sangom na, maka itiyaꞌ kitam ma lahat lꞌngngaw-lꞌngngawan. Sōꞌun lagiꞌ saga aꞌa itu pehēꞌ ni kalumaꞌan inān boꞌ makabꞌllihan di-sigām kinakan.”
16 Anambung si Isa, yukna, “Minsan sigām mbal alaꞌan minnitu. Kaꞌam na ya amakan sigām.”
17 Yuk saga mulid eꞌ, “Lima du tinapay ma kami maka duwa du daing!”
18 “Na,” yuk si Isa, “bowahunbi piꞌitu.” 19 Jari pinatingkōꞌ sigām eꞌna ma kaparangan. Puwas eꞌ niāꞌ eꞌna lima tinapay maka duwa daing boꞌ pahangad ni langit magsukul ni Tuhan. Pinagpōng-pōng eꞌna tinapay boꞌ yampa sōnganna ni saga mulidna, ati tinopod-toporan eꞌ sigām saga aꞌa inān. 20 Magkakanan na saga aꞌa inān kamemon sampay magꞌssohan. Pagubus sigām amangan, tinipun kapin kinakan inān eꞌ saga mulid eꞌ ati apꞌnnoꞌ sangpūꞌ maka duwa ambung aheya. 21 Aniyaꞌ saga limangibu aꞌa bay amangan inān, bang hal lꞌlla ya niꞌitung. Saddī giꞌ dꞌnda maka ondeꞌ-ondeꞌ.
Si Isa Lumꞌngngan ma Kuwit Tahik
22 Puwas eꞌ sinohoꞌ eꞌ si Isa saga mulidna paruwaꞌ ni bayanan. Pinarahū sigām min iya tudju ni dambilaꞌ danaw, sabuna amapoleꞌ kahekaꞌan aꞌa inān. 23 Tapapoleꞌ paꞌin saga aꞌa heꞌ, patukad si Isa dangan-danganna anambahayang ma bīd-bīd. Sangom paꞌin lahat, mainaꞌan iya dangan-danganna, 24 boꞌ saga mulidna atā na min bihing. Taluwaꞌ sigām goyak sabab anaggaꞌ baliyu.
25 Pagdaiꞌ llaw paꞌin, pehēꞌ na si Isa tudju ni sigām, lumꞌngngan min kuwit tahik. 26 Taꞌndaꞌ paꞌin iya eꞌ saga mulidna lumꞌngngan min kuwit tahik, nileyaꞌ-leyaꞌ sigām. “Umagad koꞌ ilu,” yuk sigām, maka eꞌ sigām magsilawak kabowa tāw.
27 Sagōꞌ amissala magtūy si Isa ni sigām. “Paiman kam!” yukna. “Aku koꞌ itu. Daꞌa kam tināw.”
28 Sakali ahꞌlling si Petros, yukna, “Nakuraꞌ, bang kaꞌa toꞌongan ilu, sōꞌun aku piꞌilu ni kaꞌa lumꞌngngan min kuwit tahik.”
29 “Na, piꞌitu na ka,” yuk si Isa.
Jari pareyoꞌ si Petros min bayanan inān anagnaꞌ lumꞌngngan min kuwit tahik tudju ni si Isa. 30 Sagōꞌ pagnanamna ma baliyu inān, sinōd iya tāw ati inut-inut iya patꞌnnob. Magtūy iya angalingan, yukna, “Nakuraꞌ, tabangun aku!”
31 Magtūy iya niabut eꞌ si Isa boꞌ binalutan. Yuk si Isa, “Kulang pahāp imannu ilu! Angay aku pagduwa-duwahannu?”
32 Makariyataꞌ paꞌin sigā ni bayanan eꞌ, pahali na baliyu. 33 Pinudji si Isa eꞌ saga mulid kaseheꞌan inān, yuk-i, “Bꞌnnal, kaꞌa ilu Anak Tuhan!”
Saga Aꞌa Gennesaret Kauliꞌan
34 Jari itu, makatꞌkka paꞌin sigām ni dambilaꞌ danaw, parungguꞌ sigām ni lahat Gennesaret. 35 Takilā si Isa eꞌ saga aꞌa mahēꞌ, ya angkan sigām bay anambukuhan sasuku taga-saki ma jadjahan inaꞌan-i, sinōꞌ binowa ni si Isa. 36 Angamuꞌ sigām junjung ni si Isa, bang paꞌin dūlanna saga aꞌa sakihan angꞌntan minsan laꞌa hal tōng sꞌmmekna. Manjari sai-sai bay makaꞌntanan sꞌmmek si Isa saruꞌun-duꞌun kauliꞌan sakina.