Niamata i

Niamata

da ari inontono i Yahya

Pobetekino Gau

Ihino die boku yahoo da inontono i Yahya hai larono niamata mekona hai « haratia da mebinta hai Apu Alla ronga hapa da tinulurano Yesus Kristus » (1:2).

Patuduno da kontu'uma kai poburi yahoo, kai tora pelaroando miano da mpobasa ronga momperahi-rahi, naamo memparasaea ngkaida'a, mau hindo pinakasea ronga tedadasako. Da me'a-me'alu saba die hai boku, yahoo niamata da pono'ako parere. Masa'ala da nigau adie hai bolo boku na'iaa te'iaa asamponoha sabano, sawali manturu'o, hai larono rupa-rupa niamata.

Dahoo otolu da nigau: (1) Da mengkuasa hai wita'ea dahira weweu mosa'ohira miano mparasaea dungku kando marasai ronga mate; (2) Yesus Kristus yahoo Apu da kuasa, danta nangihira luwu da daluo Apu Alla; (3) Me'aluo barakati da pinasadiano Apu Alla nta tewali tilarino umatino da konianto'u, kontu'uma i'ira da pinopate tendenomo hindo nunu'o Apu Alla.

Tempono niburi die boku, luwu miano da pinarentano mokole'ea Roma tinena'iramo kando mpesombaiho koie mokole'ea. Dahira miano Ngkarasitee da pinopate atawa tinorungku tendenomo hi sando ehe mesombaiho, kanahindo te'iaasi Yesus da tewali Apundo. Dahira penda da mehapuiho da pinarasaeando tendenomo hindo momee. Patuduno i Yahya kai pokodungku'o die haratia yahoo, nta pokomorodoo pelaroando miano Ngkarasitee kando osie bubungkuiho imanindo, sawali momperahi-rahi hai dandino Apu Alla.

Hai pasala 2 dungku 3 dahoo opitu sura da lako hai opitu jema'a da ko'ihiako hapa da niweweundo ko'ira miano mparasaea hindo daa pinakasea.

Ihino boku

1. Salamu (1:1-8).

2. NIAMATA LAMORO ME'ASA (1:9 – 3:22):

A. Ana Nto Manusia da lolako hai olotano da opitu tisa hulu (1:9-20).

B. Sura da lako hai jema'a da opitu (pasala 2 – 3).

3. NIAMATA KO'ORUA (4:1 – 16:21):

A. Pinesombaihano Apu Alla hai suruga (4:1-11).

B. Taratasi da telulumi ronga Ana Domba (5:1-14).

C. Ana Domba longka'o meterai mpompida da opitu (6:1 – 8:5).

D. Ko'opituo mala'ekati pupuurio torompedo (8:6 – 11:19).

E. Ko'opituo peto'ono hapa danta kadadia perumbuino (pasala 12 – 16).

4. NIAMATA KO'OTOLU (17:1 – 21:8):

A. Tina endeo da meneehako Babel (17:1-18).

B. Monangiano Babel (18:1 – 19:10).

C. Da me'ulea hai dara mpila nangio luwu pedaluno (19:11 – 20:10).

D. Inotuhiano hukuma da kompura-puraano (20:11-15).

E. Langi tonia ronga wita tonia (21:1-8).

5. NIAMATA KO'OPAA: Tina niwawa nta samotu'ano Ana Domba da meparereako Yerusalem da tonia (21:9 – 22:5).

6. Oliwi kompura-puraano (22:6-21).