Taratasi da telulumi ronga opitu meterai
5
1 Sa'arino koie, kaku ontoo me'asa taratasi da telulumi da hai lima muanano Koie da totoro hai kadera mpomokole'a. Koie taratasi koburi rua mpampaa, ronga tepida'ako opitu meterai kowati pontumbudo. 2 Yahopo kaku ontoo me'asa mala'ekati da kuasa da mekora mogau kanahi, « Inai da tewali longka'o koie meterai pompidano ronga woleiho koie taratasi da telulumi? » 3 Sawali hai suruga, hai wita'ea, maupo hai tontono wita, nahina da mokowoleiho koie taratasi ronga ontoo hai larono. 4 Nangkuamo kaku pewowo ronga mopoe larongku, tendenomo hi sahina da tewali woleiho koie taratasi ronga ontoo hai larono.5 Yahopo koie me'asa simbaudo ko'ira kamotu'a kai tabe'aku kanahi, « Osiemo mewowo! Ontoopo, koie singa mebinta hai suku Yehuda, leeno mokole Daud, Iaamo da moponangimo. Yahomo kai pokolongka'o koie meterai pompidano ronga woleako koie taratasi. »
6 Yahopo kaku ontoo Ana Domba da mentade hai kadera mpomokole'a hai olotano ko'opaa'o boto da kopenaa ronga raro ngkamotu'a.a Koie Ana Domba kana to'umo da ari sinumbele, kotandu opitu ronga komata opitu; koiemo ko'opituo sangkoleo mebinta hai Apu Alla, da tinena lako hai upu-upuo wita'ea. 7 Yahopo kai leu koie Ana Domba, kai tarimaa koie taratasi da telulumi hai lima muanano Koie da totoro hai kadera mpomokole'a. 8 Tempono alaa koie taratasi, namesudu'ira ko'opaa'o boto da kopenaa ronga ko'ira kamotu'a da rua pulu opaa hai ra'ino koie Ana Domba. Luwundo pada mo'ungkaari gambusu, ronga mangkoona wulaa da ko'ihiako dupa, yahoo amalando miano da tinindahakono Apu Alla. 9 Kando daa mpelagu'ako lagu da tonia kanahi,
« Comiumo da pantasi tarimaa koie taratasi da telulumi,
ronga longka'o meterai pompidano.
Kana'umpe aricomiumo sinumbele,
ronga koie reamiu ari pohudamiumo miano hai dosando
mebinta hai luwu suku, gau, basa, ronga wonua,
kando tewali mianono Apu Alla.
10 Comiumo da ari potoro'ira tewali mokole,
ronga pua'ima da layanio Apu Alla Apunto.
Ronga iramo danta momparenta hai wita'ea. »
11 Yahopo kaku ontoo ronga modeaho suarando mala'ekati da tepoporewu-rewu ronga tepopojuta-juta me'alundo, da melilicu'o dahando koie kadera mpomokole'a, ronga ko'opaa'o boto da kopenaa, naamo ko'ira kamotu'a. 12 Kando daa mpekora mpelagu kanahi,
« Koie Ana Domba da ari sinumbele,
yahomo da pantasi montarima kuasa,
ronga kawasaa, naamo mandaraa,
ronga kamokoraa, naamo pina'angga.
Yahomo da pantasi pinoko'owose ronga da tereree. »
13 Yahopo kaku podeaho pera da kopenaa hai suruga, hai wita'ea, hai tontono wita, ronga hai bolo ntahi, ongkundaano luwu ihino wita'ea, dahiramo mpelagu kanahi,
« Koiemo da mekadera,
ronga koie Ana Domba,
yahomo da tereree, da pina'angga,
da pinoko'owose, ronga da kuasa dungku samengka-mengkauno. »
14 Yahopo ko'opaa'o boto da kopenaa kando kanahi, « Menonaa! » Ronga ko'ira kamotu'a mesudu'iramo mpesomba.