Nilongka'ano meterai mpompida da onoo
6
1 Yahopo kaku ontoo koie Ana Domba hi longka'o koie me'asa meterai mpompida da opitu. Yahopo kaku podeaho hi pogau kana guntu koie me'asa simbauno ko'opaa'o boto da kopenaa kanahi, « Leumo! » 2 Yahopo kaku ontoo penda, dahoo me'asa dara mpila da pine'uleahino miano da mo'ungkaari pana. Kai pinoweehi koie miano songko wulaa. Kai peluarako kana miano mpeponangi tendenomo hina nta moponangi.3 Tempono koie Ana Domba longka'o meterai mpompida ko'orua, kupodeahomo koie da kopenaa da ko'orua kanahi, « Leumo! » 4 Kai peluarako nde'e me'asa dara motaha kana langa api, dahanomo me'ulea miano da pinoweehi kuasa nta oninio tepokonaa hai wita'ea, dungku kando mpekapopate miano. Kai pinoweehi me'asa taa da owose.
5 Tempono koie Ana Domba longka'o meterai mpompida ko'otolu, kupodeaho koie da kopenaa da ko'otolu kanahi, « Leumo! » Kaku polihe kaku ontoo dara molori. Koie da me'uleahio dahoo mo'ungkaari me'asa timbanga. 6 Yahopo kaku podeaho da kana suara mebinta hai olotando ko'opaa'o boto da kopenaa da kanahi, « Kahioomo kai mohali anggano inisa, asa litere kanasi gadi asa oleo, ronga anggano tolu litere puhu kanasi na'ana gadi asa oleo.a Sawali osie sosa'oo keu zaitun ronga uma angguru! »
7 Tempono koie Ana Domba longka'o meterai mpompida ko'opaa, kupodeaho koie da kopenaa da ko'opaa kanahi, « Leumo! » 8 Kaku ontoo mesabahako me'asa dara da mowite. Da me'uleahio neeno i Matea. Ronga da merumbuihakono neeno i Koburu. Kando pinoweehi kuasa kando popatee tila opaano pera miano hai wita'ea, tendenomo mamusua, kohuloo, rungku, ronga kadadi mosoko.
9 Tempono koie Ana Domba longka'o meterai mpompida ko'olima, kaku ontoo hai tontono pontompa'a pesomba hi daa sangkoleondo miano da ari pinopate, tendenomo leleako haratiano Apu Alla ronga tuluraa da pinarasaeando. 10 Ko'iramo da mokora mpe'e'eta kanahi, « O Apua da kuasa ntesinca ronga da mongkote! Osiemo mompokolembahi, kami otuhio hukumando ko'ira miano hai wita'ea ronga wolohi'ira, hindona ari pepatekami. » 11 Yahopo kando pinoweehi tee'asando babu mpila da mentii, ronga tinena mekoli-koli, totarimaa te'ete wotu, dungku kai mondo simbau mpohedondo ronga raro mpetilado danta itai mempinepate kana na'anda.
12 Yahopo kaku ontoo koie Ana Domba hi longka'o meterai mpompida ko'onoo, kai dadi lelu da mokora. Koie mata oleo tibonomo molori kana kuro, kai tii wotiti motaha mponohaamo kana rea. 13 Kai tetente ko'ira olimpopo mebinta hai langi kana wua ngkeu da tetente hi tapisako ngalu owose. 14 Kai tewo'a langi ronga telulumi kana taratasi nibolulu, ronga luwu tangkeno ronga pulo bintaa torokando.
15 Yahopo kando mpolai ko'ira mokole hai wita'ea, ka'owose, komondaa, da mengkawasa, da kuasa, ata ronga da sa'iaa ata, kando mpewuni hai bolo lia ronga hai asi watu hai tangkeno. 16 Kando hohouho tangkeno ronga watu kanahi, « Mihowuicamimo ronga miwuniakokamimo, kai osie ontokami Koie da mekadera, ronga osie konakami sa'o larono koie Ana Domba! 17 Kana'umpe dungku'omo oleo mosa'oano larondo da owose, ronga nahina te'asa danta mokotineiho! »