Pineto'ono miano Israil
7
1 Sa'arino koie, kaku ontoo opaa mala'ekati da mentade hai pato ngkopano wita'ea. Kando rereiho ko'opaa'o mata ngalu, kai osie pupuurio wita'ea, tahi, atawa inalahi. 2 Yahopo kaku ontoo me'asa mala'ekati suere da saba tindaa mata oleo. Dahoo mowawa tumbu pompeto'ono Apu Alla da tora. Kai pekora boboihira koie da opaa mala'ekati da ari pinoweehi kuasa nta sosa'oo wita ronga tahi kanahi, 3 « Osiepo sosa'oo wita, tahi, atawa inalahi, ki sako paisapo peto'ohira hai wuku ra'indo pera atano Apu Alla Apunto. » 4 Yahopo kaku podeaho me'alundo miano da ari pineto'o, dahoo asa etu pato pulu opaa rewu mebinta hai kohopulu orua'o suku Israil.5 Mebinta hai suku Yehuda dahoo hopulu orua rewu da pineto'o,
hai suku Ruben hopulu orua rewu,
hai suku Gad hopulu orua rewu,
6 hai suku Aser hopulu orua rewu,
hai suku Naftali hopulu orua rewu,
hai suku Manase hopulu orua rewu,
7 hai suku Simeon hopulu orua rewu,
hai suku Lewi hopulu orua rewu,
hai suku Isakhar hopulu orua rewu,
8 hai suku Zebulon hopulu orua rewu,
hai suku Yusuf hopulu orua rewu,
naamo hai suku Benyamin hopulu orua rewu.
Miano me'alu da sai pinokodoa
9 Sa'arino koie, kaku ontoo penda asa lunu miano ngkapa da sai pinokodoa me'aluno. Ko'ira miano pebintaando hai koa-koa'o wonua, suku, ronga basa, naamo da mogau'ako pera giuno gau. Dahando mpentade hai ra'ino kadera mpomokole'a ronga hai ra'ino Ana Domba. Pakeado babu mpila mentii, ronga mpo'ungkaari riri ni'i.a 10 Kando mpekora kanahi, « Salama'amami pebintaano hai Apu Alla Apunto da totoro hai kadera mpomokole'a, ronga hai Ana Domba. »
11 Mpentadehiramo luwu mala'ekati lilicu'o kadera mpomokole'a ronga raro ngkamotu'a naamo ko'opaa'o boto koie da kopenaa. Pera mala'ekati mesudu'iramo hai ra'ino kadera mpomokole'a mpesombaiho Apu Alla 12 kanahi,
« Amin!
Poreree ronga pompoko'owose,
ronga mandaraa, ronga pontarimakasi,
ronga pompa'angga, ronga kuasa,
ronga kora, yahoo tarono Apu Alla Apunto
dungku samengka-mengkauno! Amin! »
13 Kai petukanaihaku koie me'asa kamotu'a, « Inaihira ko'ira da mpebabu mpila mentii, ronga hai hapa pebintaando? »
14 Kaku polawani, « Apua, dakomiusi to'orio. »
Kai lawaniaku, « Di'iramo miano da ari montealohi karasai owose. Arihiramo tatapio babundo hai reano Ana Domba kai mopila.
15 Koiemo sababuno kando daa mpentade hai ra'ino kadera mpomokole'ano Apu Alla,
ronga mesambahea mengkena malo meanta hai raha mpesombaa.
Ronga Koie da totoro hai kadera mpomokole'a da moo'ia merongahira ronga olumihira.
16 Nando da'amo nta mokohuloo ronga mokokondo'u,
kulano oleo da modara nai da'amo nta konahira.
17 Kana'umpe nangkuamo Ana Domba da da'a hai tongano kadera mpomokole'a
danta tewali tumpu mpakanindo,
nta wawahira hai mata e'e ntoraaha.
Ronga Apu Allamo danta kikihiakondo'o pera luu da hai matando. »