Meterai mpompida ko'opitu
8
1 Tempono Ana Domba longka'o meterai mpompida ko'opitu, nilakono montundu hai suruga kira-kira mentonga damu lembahino. 2 Yahopo kaku ontohira ko'opituo mala'ekati da mpentade hai ra'ino Apu Alla, kando pinoweehi opitu torompe.3 Kai leu koie me'asa mala'ekati meha mowawa podupa'a wulaa, kai pentade okudahio pontompa'a pesomba. Kai pinoweehi dupa me'alu danta tinompa nta perongano amalando pera umatino Apu Alla hai pontompa'a pesomba wulaa da hai ra'ino kadera mpomokole'a. 4 Koie ahuno dupa da inungkaarino koie mala'ekati sabe'omo hai ra'ino Apu Alla meronga amalando umatino. 5 Yahopo koie mala'ekati kai alaa koie podupa'a, kai ihianiakono'o wea api mebinta hai pontompa'a pesomba, kai basiako hai wita'ea. Nangkuamo nde'e kai guguntu beberese ronga kila tepoporoda, kai molelu wita.
Ko'opaa'o mala'ekati pupuurio torompedo
6 Kando mesadia ko'opituo mala'ekati da mpo'ungkaari torompe nta pupuurio torompedo.
7 Koie mala'ekati da lamoro me'asa pupuuriomo torompeno, kai kadadia nde'e usa es ronga api mehela'iako rea, yahopo luwuo koie nibasiako hai wita'ea. Yahopo nde'e tila otoluno wita'ea kai kokaa, kanapo tila otoluno pu'u ngkeu, ronga luwu ewo mo'uso.
8 Yahopo koie mala'ekati ko'orua kai pupuurio torompeno, kai tibo da'a da kana tangkeno owose da kolanga-langa da hinawiako hai tahi. Yahopo nde'e tila otoluno tahi kai tewali rea, 9 kai mate nde'e tila otoluno da kopenaa hai bolo ntahi, kanapo tila otoluno bangka hancuru'omo.
10 Yahopo koie mala'ekati ko'otolu kai pupuurio torompeno, kai tuuna nde'e me'asa olimpopo da owose mebinta hai langi, lolanga kana oboro, kai dapo'o tila otoluno laa e'e ronga mata e'e. 11 Neeno koie olimpopo yahoo Kuia.a Tila otoluno e'e tewaliomo mopa'i, ronga me'aluo miano da mate tendenomo koie e'e mopa'i.
12 Yahopo koie mala'ekati ko'opaa kai pupuurio torompeno, kai tibo tetompi tila otoluno oleo, kanapo tila otoluno wotiti, ronga tila otoluno olimpopo. Nangkuamo tila otoluno niwincando rondomaamo. Tila otoluno meanta rondomaamo, kanapo tila otoluno malo.
13 Kaku ontoo me'asa sico da lumaa hai langi, kaku podeaho hi daa mekora mogau kanahi, « Silaka, silaka, silaka'iramo da meda'a hai wita'ea, tendenomo unino torompedo mala'ekati da otolu hindo daa nta pupuurio. »