Mala'ekati ko'olima pupuurio torompeno
9
1 Yahopo koie mala'ekati ko'olima kai pupuurio torompeno, kaku ontoo me'asa olimpopo da tuunamo hai wita'ea mebinta hai langi. Yahopo koie olimpopo kai pinoweehi tagilino bolo lia petorungku'ando bilisi. 2 Yahopo koie olimpopo kai ungkahio koie bolo lia da olaro, kai tepuasako ahu api da owose to'u kana ahuno api pinonea. Oleo ronga laamoa tedaohakoomo ahuno. 3 Mebinta hai bolo ahu api koie kando mpeluarako kotumba da me'alu mentudu hai wita'ea. Ko'ira kotumba pinoweehi kuasa kana ngisi molea. 4 Ko'ira kotumba pinarenta kando pokomarasaihira miano da sai hina peto'ono Apu Alla hai wuku ra'indo, sawali pera kapu ronga pu'u ngkeu atawa pinombula mehano kando osie sosa'oo. 5 Ko'ira kotumba tinabe mompepate miano, sawali tewaliosi pakaseahira te'olima wotiti mengkauno. Mopoeno peheodo ko'ira kotumba kanasi mopoeno peheono ngisi molea. 6 Larono wotu koie, ko'ira miano mokeahiramo mate, sawali nando tule'i mate; mokeahako mate, sawali matea mentalaa.7 Ontoahando ko'ira kotumba kana dara da sadia nta mamusu. Hai rapando dahoo da kana to'u songko wulaa. Ra'indo kana ra'ino miano, 8 wuudo kana wuuno tina, ronga ngisindo kana ngisino singa. 9 Podampono o'odo kana babu uti. Unino panido kana unindo dara me'alu da mekalulu mosinta bendi me'o'ala hai mamusua. 10 Icindo ronga peheodo kana ngisi molea, ronga hai larono koie ici dahanomo kuasa danta popoetio miano larono olima wotiti. 11 Mokole da parentahira yahoo mala'ekatino bolo lia petorungku'ando bilisi. Nee Ibranino yahoo i Abadon, ronga nee Yunanino yahoo i Apolion, batuano pososa'o.
12 Silaka da meri'ou ariomo tealo. Diekana oruamo penda silaka danta leu.
Mala'ekati ko'onoo pupuurio torompeno
13 Yahopo koie mala'ekati ko'onoo kai pupuurio torompeno, kaku podeaho suara mebinta hai ko'opaa'o tandu da hai siuno koie pontompa'a pesomba wulaa da hai ra'ino Apu Alla. 14 Kanahino koie suara hai mala'ekati ko'onoo da mo'ungkaari torompe, « Bintanihiramo ko'ira mala'ekati da opaa, da tepungo okudahio laa e'e Efrat da owose. » 15 Kai bintahira nde'e ko'ira mala'ekati da opaa. Iramo da pinasadia nta pepatehira tila otoluno luwu to manusia, ki dungkumo damuno, oleono, wotitino, ronga ta'uno da ari pinatantu. 16 Dahoo da mo'awaakuo me'aluno ko'ira tantarando da mpedara, yahoo rua etu juta.
17 Kanamo die po'ontongku hai larono niamata ko'ira dara ronga ko'ira miano da mpe'uleahi'ira: podampono o'odo dahoo da momea kana langa api, da mo'uso motu'a kana langi, ronga da mokuni kana walira. Koie rapando dara kana rapano singa, ronga mebinta hai ngangando peluarakoanomo api, ahu, ronga walira. 18 Tendenomo koie silaka da otolu, yahoo api, ahu, ronga walira da meluarako mebinta hai ngangando ko'ira dara, kando memate tila otoluno to manusia. 19 Kana'umpe kuasando ko'ira dara yahoo hai ngangando ronga hai icindo. Icindo korapa kana ule, yahomo da belaiho miano.
20 Sawali ko'ira miano da sai da'asi memate tendenomo koie silaka, nando ehepo toba hai niweweundo. Nando ehepo me'ari-ari mpesomba hai setani ronga ka'apu-apu wulaa ronga yo pera, tambaga, watu, ronga keu, da sai ko'onto, sai koronge, ronga sai lolako. 21 Ko'ira miano nando boli'io niweweundo da mosa'o: mompepate, monto'ori, me'endeo, ronga mpononako.