Taratasi da tewolei
10
1 Yahopo kaku ontoo me'asa mala'ekati suere da kuasa tudu mebinta hai suruga, da metongoako seru, ronga hai wawo rapano dahoo pinerea. Ra'ino kana to'u mata oleo, ronga karuno kana to'u tisa api. 2 Hai limano dahoo mo'ungkaari bolulu taratasi'ite da tewolei. Karu hai muanano dahoo mempinda hai tahi, ronga karu hai suwano dahoo mempinda hai wita. 3 Kai pekora totombolo kana unino singa. Sa'arino mekora totombolo, koie da opitu guntu mepoporongeako suarano. 4 Sa'arino mogau koie guntu da opitu, dahakumo nta burio, sawali kuna modeaho suara da mebinta hai suruga da kanahi, « Osie montulura hapa da kanahino koie da opitu guntu. Osie moburi. »5 Yahopo kaku ontoo koie mala'ekati da mentade hai wawo ntahi ronga hai wawo wita, hi taarako lima muanano hai langi, 6 kai pesumpa'ako neeno Apu Alla da tora samengka-mengkauno, da ari padadio langi, wita, tahi, ronga pera ihino, kai kanahi, « Nai to'orimo nta tinado! 7 Sawali ki pinuurimo torompeno koie mala'ekati ko'opitu, dahomo Apu Alla nta pokomentoda'o patuduno da rahasia, kana hi ari mo'awaakondo raro atano, yahoo raro nabiino. »
8 Yahopo koie suara mebinta hai suruga da ari pinodeangku kai pogau'akuo penda kanahi, « Lakomo alaa koie taratasi'ite da tewolei hai limano mala'ekati da mempinda hai tahi ronga hai wita. »
9 Yahopo kaku lako nde'e mo'itaa koie taratasi'ite, kai weehaku kanahi, « Alaamo kau kaaho. Hai bolo ntiau dahomo nta mopa'i, sawali hai bolo ngangau dahoo nta momami kana siu. » 10 Yahopo kaku alaa koie taratasi'ite mebinta hai limano, kaku kaaho. Hai ngangangku momami'o nde'e kana siu, sawali hai tiangku mopa'io. 11 Yahopo kaku tinena kanahi, « Kahioomo penda kau pogau kana nabii mekona hai suku me'alu, hai wonua me'alu, hai gau me'alu, ronga hai mokole me'alu. »