Orua saksii
11
1 Yahopo kaku pinoweehi asa kolo kowu da kana tuko mpe'ukuru, kaku tinena kanahi, « Lako ukuru'o koie raha mpesombaa hai Apu Alla ronga koie pontompa'a pesomba. Doa'o opia me'aluno miano da mesambahea kokeena. 2 Sawali osie ukuru'o uluano koie raha mpesombaa da meibungku'ea, kana'umpe ariomo nidio nta tarondo suku da sai da'apo to'orio Apu Alla. Dahira nta pipindaiho koie kota ntinindahako pato pulu orua wotiti mengkauno. 3 Dahaku nta montena te'orua saksiicu da mpebabu dedea, kando mpogau kowati nabii asa rewu rua etu nomo pulu oleo mengkauno. » 4 Koie da orua saksii yahoo orua pu'u ngkeu zaitun ronga rua boto tisa hulu da mentade hai ra'ino Apuno wita'ea. 5 Ki daa miano da mokea hapai'ira, dahoo nta meluarako api mebinta hai ngangando ko'ira saksii, kai sile'ihira kando lono ko'ira pedalundo. Kanamo koie nta pompepatendo miano da mokea hapai'ira. 6 Dahoo kuasando kai tetampo langi, kai osie usa solama hindo daa mogau kowati nabii. Dahoo kuasando nta moboli'i e'e kai tewali rea. Dahoo kuasando kai konaa wita'ea pera giuno silaka malengu po'ehendo.7 Kindo arimo padala'o tugasindo leleako haratia, koie kadadi da sabe mebinta hai bolo lia petorungku'ando bilisi dahoo nta dalo'ira ko'ira orua saksii kando monangi dungku kai pepatehira. 8 Ronga koie orua'o wata matendo dahoo nta leleha hai wawo sala'ea hai bolo ngkota da owose, ariano nibasiropa Apundo hai keu mpinotalambe. Kicua parere, neeno koie kota yahoo Sodom ronga Mesir. 9 Ko'ira miano da mpebinta hai upuo wonua, suku, gau, ronga basa, dahiramo nta me'ontoo ko'ira maeatido te'otolu mentonga oleo mengkauno, ronga nando wukahi kando kinoburu. 10 Taperando nta mohende ihino wita'ea tendenomo hindo matemo. Dahira nta mpendo'ua ronga pada mpekapokatuako tinongo, tendenomo koie da orua nabii da ari pokomarasaihira miano die hai wita'ea.
11 Sa'arino tealo tolu oleo mentonga, namewiso'ihira koie penaa mpompokontora da mebinta hai Apu Alla. Kando pewangu mentade, nangkuamo kando momee to'u pera miano da ontohira. 12 Kando podeaho ko'ira orua nabii suara da owose mebinta hai suruga kanahi, « Misabemo na'ai! » Kando sabe nde'e hai suruga metongoako seru, ronga ko'ira da daluhira ndo'ontohiramo.
13 Koiesi tempo kai kadadia me'asa lelu da dompa owose, da rowakio tila hopuluno koie kota, ronga popatee pitu rewu miano. Ko'ira suereno miano taperando memomee, nangkuamo kando poko'owose'o Apu Alla Apuno suruga.
14 Silaka ko'orua ariomo tealo, silaka ko'otolu dahomo nta oru leu.
Mala'ekati ko'opitu puurio torompeno
15 Yahopo koie mala'ekati ko'opitu kai puurio torompeno, kando mempinodea suara hai suruga da owose kanahi,
« Da ungkaario pomparentaa hai wita'ea
yahoo Apunto ronga Mokole Pompokosalama da ari nidandino.
Yahomo danta momparenta dungku samengka-mengkauno. »
16 Koie da rua pulu opaa kamotu'a, da mpekadera hai ra'ino Apu Alla, mesudu'iramo mpesomba ronga kanahi,
17 « Dakami montarimakasi hai Comiu Apua, Apu Alla da kuasa'ea,
da da'a, ronga da da'amo.
Kana'umpe aricomiumo mokomenteeho kuasamiu da owose,
ronga petampu'ukomiumo momparenta.
18 Mosa'oomo larondo pera suku,
sawali nadungkumo tempono nta mosa'oano laromiu.
Dahamiumo nta otuhio nta inawando miano mate,
nta mpo'awaandomo tilado luwuo nabii atamiu,
kai tii miano da tinindahakomiu,
ronga da pa'angga'o neemiu,
miano owose ronga miano okidi.
Dahamiumo nta pokohancuru'ira miano da ari sosa'oo wita'ea. »
19 Yahopo kaku ontoo hai suruga hi te'ungkahimo wambano raha mpesombaa hai Apu Alla, ronga kaku ontoo poti mpedandi'a hai bolono.a Yahopo kai kikila ntepoporoda ronga guntu da beberese, kai molelu wita, ronga tudu usa es da mempole.