Tina ronga ule naga
12
1 Yahopo kaku ontoo me'asa peto'o da owose hai langi: Me'asa tina da metongoako mata oleo, ronga wotiti hai tonto karuno. Hai rapano dahoo metopi'ako topi wulaa da ko'olimpopo hopulu ka'orua. 2 Koie tina dahoo mobanta, ronga temponomo nta mompokohina, yahomo kai daa medeali poerio.3 Yahopo kai saba penda me'asa tanda hai langi: Dahoo me'asa ule naga motaha da owose, da korapa opitu ronga kotandu hopulu. Koa-koa'o rapano dahoo metopi'ako topi mpomokole. 4 Koie icino yahomo da rombo'o tila otoluno olimpopo hai langi kai basiako hai wita'ea. Koie naga dahoo mentade hai ra'ino koie tina danta mompokohina, nilakono nta udooho Anano ki tehinamo. 5 Yahopo koie tina kai pompokohina me'asa Ana ntama, danta parentaakondo'o tuko uti luwu suku.a Sawali nantibo inala koie ana'ate kai pinolaisako niwawa hai Apu Alla da totoro hai kadera mpomparentaano. 6 Koie tina polaihomo hai lueno papawu ariano Apu Alla mompasadia'akono. Kokeenamo nta piniaraano larono asa rewu rua etu nomo pulu oleo mengkauno.
Kenangiahano naga
7 Yahopo kai kadadia nde'e mamusua hai suruga. Koie i Mikhael ronga raro mala'ekatino mamusu bali'o koie naga ronga raro mala'ekatino naga. 8 Sawali koie naga hina monangimo, yahomo kasai hinamo nta daahando hai suruga ronga ko'ira salakono. 9 Koie naga'ea atawa ule motu'a, da meneehako ponggawano bilisi atawa ponggawano setani, da pokomporee asa dunia'o to manusia, nibasiakohiramo hai wita'ea ronga raro mala'ekatino.
Lagu mpoponangi
10 Yahopo kaku podeaho suara da mokora hai suruga kanahi,
« Dungku'omo wotuno salama'a mebinta hai Apu Alla!
Menteehomo diekana kuasa pomparentaano, ronga kuasano Mokole Pompokosalama da ari nidandino.
Kana'umpe koie ponggawano bilisi da nte montumbu'akondo petilato hai ra'ino Apu Alla, mengkena malo meanta,
ariomo nibasiako mebinta hai suruga.
11 Ronga ko'ira petilato kando poponangi tendenomo koie kuasano reano Ana Domba,
ronga tendenomo da nisaksiido.
Nando da'a pe'o'oloiho penaando,
ronga nando momee mate.
12 O suruga, mehawamo!
Ronga comiu da meda'a hai suruga, mimohendemo!
Sawali masilakakomiu da meda'a hai wita'ea ronga tahi!
Kana'umpe ponggawano bilisi tuduomo hai comiu,
ronga dompa mosa'o larono,
hina nto'orio nta puraamo tempono. »
13 Sato'orio koie naga hi ari nibasiako hai wita'ea, nilakonomo pili'o koie tina da ari pokohinaa koie ana ntama. 14 Koie tina ariomo pinoweehi orua panino sico da owose, kai to'ori lumaa hai lueno papawu, nta piniaraanomo larono otolu ta'u mentonga lembahino, kai osie to'ori awaa koide naga. 15 Yahopo koie naga kai puasiakono'o e'e da owose koie tina mebinta hai ngangano, ki ehe kai waarako. 16 Sawali koie wita'ea nantulumio koie tina, kai teboa, kai udooho koie e'e da tepuasako mebinta hai ngangano naga. 17 Nangkuamo kai mosa'o to'u larono naga koie hai tina, kai lako dalo'ira leeno, ko'ira da nunu'o parentano Apu Alla, ronga da leleako haratiano i Yesus. 18 Arino koie, namentadee koie naga hai wiwi ntahi.b