Kadadi kana harimau da saba mebinta hai tahi
13
1 Yahopo kaku ontoo hi saba me'asa kadadi mebinta hai bolo ntahi, da kotandu hopulu ronga korapa opitu. Koa'o otu ntanduno dahoo topi mpomokole, ronga hai koa'o rapano dahoo teburi nee pompoko'anu-anu Apu Alla. 2 Koie kadadi da inontongku kana to'u harimau, ronga karuno kana karuno boruang, ronga ngangano kana ngangano singa. Koie naga weehakono'o kamokorano, kadera mpomokole'ano, ronga kuasano da owose. 3 Hai me'asa rapano koie kadadi dahoo tore'ea bela nimateakonomo, sawali tidoomo. Luwu ihino wita'ea mentekangka, yahopo kando menunu'o koie kadadi. 4 Kando mpesombaiho koie naga, na'arimo weehakono'o kuasano koie kadadi. Mpesombahiramo na'anda koie hai kadadi kando daa mengkanahi, « Nahina da pengkenano die kadadi! Nahina danta tule'i bali'o mamusu! »5 Apu Alla wukahio koie kadadi kai pogau mentaba ronga poko'anu-anuo. Kai niwukahi momparenta pato pulu orua wotiti mengkauno. 6 Yahopo kai pontampu'u poko'anu-anuo Apu Alla ronga neeno Apu Alla, kanasi poo'iahano Apu Alla, ronga luwu ihino suruga. 7 Kai niwukahi koie kadadi daluhira miano ntinindahakono Apu Alla dungku nangihira. Kai pinoweehi kuasa nta parentahira luwu suku, wonua, gau, ronga basa. 8 Luwuo miano hai wita'ea dahira nta mpesombaiho koie kadadi. Da sai nta mpesombaiho, te'iaasi ko'ira miano da teburimo neendo hai boku ntoraaha,a daano sai da'apo pinokodadi wita'ea. Koie boku yahoo bokuno Ana Domba da ari sinumbele.
9 Inai da koronge, kahioomo kai pompodedea.
10 Miano da pinatantuno Apu Alla kai tinorungku,
nta tinorungku'omo.
Da pinatantu kai mateako taa,
taamo nta nimateakono.
Nangkuamo koie, umatino Apu Alla kahioomo kai sabara montinei karasai ronga kai konianto'u.
Kadadi da saba mebinta hai wita
11 Yahopo kaku ontoo me'asa kadadi saba mebinta hai bolo wita, da kotandu orua kana tanduno ana domba, ronga hi pogau kana to'u suarano yo naga. 12 Koie kadadi da iso saba weehakono'o luwu kuasano hai kadadi ko'orua kai padala'o koie kuasano hai ra'ino. Kai pakisaa'ira luwu ihino wita'ea kando mpesombaiho koie kadadi da iso saba, da tidomo belano da ari nta nimateakono. 13 Koie kadadi ko'orua mompokoda'a peto'o tinekangkaako da owose, deenapo montiihako api mebinta hai langi tudu hai wita'ea hai ra'ino luwu miano. 14 Kai wukahio Apu Alla mompokoda'a peto'o tinekangkaako hai ra'ino kadadi da iso saba, ronga pokomporeakondo'o miano da da'a hai wita'ea. Kai tena'ira miano mpoweweu me'asa kakada-kadadi, dahano nta pompa'anggado koie kadadi da iso saba, yahoo da ari mateako taa, sawali toraasi mbule. 15 Koie kadadi ko'orua pinoweehi kuasa moweeho penaa koie kakada-kadadi, dungku kai to'ori mogau ronga metena popatehira luwu miano da sai ehe mesombaiho. 16 Koie kadadi ko'orua pakisaa'iramo luwu miano, da owose ronga da okidi, da kawasa ronga da kadee-dee, sangkinaa ronga da sa'iaa sangkinaa, kando pineto'o hai lima muanando atawa hai wuku ra'indo. 17 Ronga nai te'asa miano da tule'i mo'oli ronga mobalu, ki sai podio koie peto'o, yahoo neeno koie kadadi da meri'ou atawa lamoro da meparereako koie neeno.b
18 Na'ai dahanomo paraluu pinehawa motu'a. Miano da mandara tule'io doa'o lamorono koie kadadi, kana'umpe koie lamoro meparereako neeno miano. Lamorono yahoo nomo etu nomo pulu onoo.