Ana Domba ronga umatino
14
1 Yahopo kaku ontoo hi daa mentade Ana Domba hai wawo ngkabumbu Sion, merongahira da asa etu pato pulu opaa rewu miano, ronga hai wuku ra'indo dahoo teburi neeno Ana Domba ronga neeno Tamano. 2 Kaku podeaho suara mebinta hai suruga kana e'e waa da roro atawa guntu owose. Podedeahano kana miano mpegambusu. 3 Hai ra'ino kadera mpomokole'a ronga ko'opaa'o boto da kopenaa naamo raro ngkamotu'a, dahandomo ko'ira miano da asa etu pato pulu opaa rewu mporeree'ako me'asa lagu tonia. Koie lagu nahina mpiha te'asa miano da to'ori mepopotisu'ako, saliwano ko'ira miano da mpelagu da ari hinuda mebinta hai wita'ea. 4 Ko'iramo miano da sai paisa hinenderino tina, da sai wuwuseiho wotoluno. Te'iaasi merumbuihakono Ana Domba maina dahano lako. I'iramo da ari hinuda mebinta hai luwuo to manusia, ronga da iso'eamo pinesombaako hai Apu Alla ronga koie Ana Domba. 5 Nando paisa mpekulepi, ronga nahina niweweu ntesalado.Otolu mala'ekati moo'awa dadaano hukuma
6 Yahopo kaku ontoo me'asa mala'ekati meha da lumaa hai langi, ronga dahoo mowawa Lele Mohende da sai nta paisa pura nta mokodungku'akondo'o miano da meda'a hai wita'ea, luwu wonua, suku, gau, ronga basa. 7 Kai pekora mehohou kanahi, « Mimomee hai Apu Alla, ronga mimpoko'owose'o! Kana'umpe nadungkumo tempono dahano nta adili'o to manusia. Mimpesombaiho da ari weweuho langi, wita, tahi, ronga luwu mata e'e. »
8 Kai lumaa koie mala'ekati ko'orua merumbuihakono simbauno kai daa kanahi, « Terowa'omo, morowa'omo Babel, kota owose, da ari pokomolanguakondo'o pera suku akoie angguru sa'o larono Apu Alla da saba tendenomo endeohano Babel. »
9 Kai lumaa koie mala'ekati ko'otolu merumbuihakondo simbauno, kai daa mekora mehohou kanahi, « Ki daa miano da mesombaiho koie kadadi ronga koie kakada-kadadino, ronga da da'a peto'ono hai wuku ra'ino atawa hai limano, 10 koie miano danta konaa sa'o larono Apu Alla, da pinarereakomo danta mondo'u angguru mopa'i da sai hina pehelano, da sadia hai pondo'ua sa'o larono Apu Alla. Koiemo miano danta pinakasea hai bolo api walira hai ra'indo mala'ekatino Apu Alla ronga koie Ana Domba. 11 Koie ahuno api da pakaseahira me'ahu ngkaida'a dungku samengka-mengkauno. Pera miano da sombaa koie kadadi ronga kakada-kadadino, ronga da kopeto'oako neeno, yahomo danta marasai malo meanta. »
12 Nangkuamo koie, umatino Apu Alla da nunu'o parentano ronga da konianto'u parasaeaho Yesus, kahioomo kai sabara tineiho karasai.
13 Yahopo kaku podeaho suara mebinta hai suruga da kanahi, « Burio die: Konantuarahira miano mate da mate hai laro dahano nunu'o Apu, metampu'u diekana. »
Kai polawani Sangkoleono Apu, « Menonaamo! Dahiramo nta mekoli ari mohedo mobea, kana'umpe wuano hindo ari mohedo, koiemo danta meronga ngkaida'ahira. »
Wula mpesangki'a hai wita'ea
14 Yahopo kaku ontoo seru mpila, ronga hai wawono dahoo totoro da kana Ana Nto Manusia.a Da petopi mpomokoleno yahoo topi wulaa, ronga dahoo mo'ungkaari me'asa ta'ate mpesangki da mongkaso. 15 Kai pesabahako me'asa mala'ekati da suere mebinta hai raha mpesombaa. Kai pogau'akono mekora Koie da totoro hai wawono seru kanahi, « Alaamo ta'ate pesangkimiu kami mpesangki, hina leuhomo tempono nta mpesangki'a; kana'umpe motaha'omo pae hai wita'ea. » 16 Yahopo Koie da totoro hai wawo seru kai takalako ta'ate mpesangkino hai wita'ea, kai tesangki nde'e upuo wita'ea.
17 Kai saba penda mala'ekati da suere mebinta hai raha mpesombaa da hai suruga; dahosi na'ana mo'ungkaari me'asa ta'ate mpesangki da mongkaso.
18 Sa'arino koie, nasabaa mebinta hai pontompa'a pesomba me'asa mala'ekati penda da dagai'o api. Kai pehou mokora hai mala'ekati da mo'ungkaari ta'ate mpesangki mongkaso kanahi, « Takalakomo koie ta'ate mpesangki'u da mongkaso, kau serewio wua angguru hai wita'ea, namotahamo. » 19 Yahopo koie mala'ekati kai takalako nde'e ta'ate pesangkino hai wita'ea, kai serewio koie luwu wua angguru, yahopo kai taburako hai pompio'a da owose, koiemo sa'o larono Apu Alla. 20 Koie wua angguru pinio'ano hai bungku kota, ronga mebinta hai pepio'ano sosolo'anomo rea, kai wowaa dungku tolu etu kilo mentalano, ronga olarono okuda rua metere.