Lagudo da mpoponangi
15
1 Yahopo kaku ontoo me'asa tanda suere hai langi da tinekangka'eahako: Dahoo opitu mala'ekati danta wawaa opitu silaka da kontapu-tapuano. Kana'umpe koie nta puraanomo sa'o larono Apu Alla.2 Yahopo kaku ontoo da kana tahi, ihino yahoo kaca da mehela'iako api, ronga hai wiwino dahandomo mpentade ko'ira miano da nangio koie kadadi ronga kakada-kadadino naamo lamoro da mokomenteeho neeno. Ko'ira miano dahira mpo'ungkaari gambusuno Apu Alla, 3 kando daa mpelagu'ako laguno i Musa, atano Apu Alla, ronga laguno Ana Domba da kanahi:
« O Apua, Apu Alla da kuasa'ea,
owose'o ronga nahina pengkenano pohedoamiu!
O mokoleno pera suku,
Menonaa ronga mongkotee salamiu.
4 Inaimo kaa da sai momeetakokomiu, Apua?
Inai da sai ehe nta poko'owose'o neemiu?
Kana'umpe te'iaasi pantamiu da mewota.
Luwuo suku dahira nta leu sombakomiu,
kana'umpe mentoda'omo menonano luwuo niweweumiu. »
Ko'opituo mala'ekati da wawaa opitu silaka
5 Sa'arino koie, kaku ontoo hi inungkahi rahano Apu Alla, yahoo koie kema mpesombaa da hai suruga. 6 Ko'opituo mala'ekati da wawaa opitu silaka pesabahakohiramo mebinta hai raha mpesombaa. Mpepakea'ako lena mopila da konggila-nggila, ronga wida wulaa da pinehambido hai o'odo. 7 Me'asa simbaudo koie da opaa boto da kopenaa moweehira da opitu mala'ekati opitu mangkoona wulaa, da pono'ako sa'o larono Apu Alla da tora ngkaida'a. 8 Koie raha mpesombaa pono'ako ahu api tendenomo owoseno kuasano Apu Alla. Nai te'asa miano da tule'i mewiso hai larono raha mpesombaa dungku kai tekabu da opitu silaka da pinokoda'ando ko'opituo mala'ekati.