Pesombaa hai suruga
4
1 Sa'arino koie, kaku ontoo hi daa me'asa wamba hai suruga da te'ungkahi. Ronga suara da ari pinodeangku meri'ou, kana unino torompe, mogau'akuo kanahi, « Pewuatakomo na'ai, kaku tisu'akoko'o hapa da matantu nta kadadia ki ari die. » 2 Nilakono tuduriaku Sangkoleono Apu, kaku ontoo nde'e hi daa me'asa kadera mpomokole'a hai suruga, ronga dahoo da totoro hai wawono. 3 Koie da totoro hai kadera mpomokole'a kana to'u montia baiduri ronga montia dolima. Pinerea da lungkuwio koie kadera kana to'u montia zamrud. 4 Lilicu'o koie kadera mpomokole'a, dahoo rua pulu opaa kadera dahando totoro kamotu'a da rua pulu opaa. Dahira mpepakea mpila, ronga songko da hai rapando yahoo wulaa. 5 Tepidi'omo kila mebinta hai kadera mpomokole'a, ronga guntu beberese'omo. Hai ra'ino kadera mpomokole'a dahoo opitu oboro da lolanga, yahoo ko'opituo sangkoleo da mebinta hai Apu Alla. 6 Ronga hai ra'ino koie kadera mpomokole'a, dahoo da kana tahi, sawali ihino na'iaa e'e yahoo kaca, da molino to'u kana paiasa.Hai tonga-tongano, lilicu'o koie kadera mpomokole'a, dahoo opaa da kopenaa kana kadadi, ronga upuo wotolundo hai ra'indo ronga hai torukundo pono'akoo mata. 7 Da me'asa kana singa. Da ko'orua kana poso sapi mongura. Da ko'otolu kora'i kana miano. Da ko'opaa kana sico da lumaa. 8 Ko'opaa'o boto koie da kopenaa, koa botono dahoo onoo panino. Upuo wotolundo ronga hai tonto panido pono'akoo mata. Malo ronga meanta da niweweundo yahoo mporeree ngkaida'a kanahi,
« Mewota, mewota,
mewota'o Apu Alata'ala da kuasa'ea.
Iaamo da iso da'a,
diekana, ronga danta leu. »
9 Ko'opaa'o boto koie da kopenaa dahira poko'owose'o, pa'angga'o, ronga mpontarimakasi hai Apu Alla da totoro hai kadera mpomokole'a, da tora ngkaida'a. 10 Kohoko hindo mpoweweu kana koie, ko'ira da rua pulu opaa kamotu'a mesudu'iramo mpesomba hai ra'ino Apu Alla da totoro hai kadera mpomokole'a, da tora samengka-mengkauno. Yahopo kando alaa songko wulaando dioho hai ra'ino koie kadera mpomokole'a ronga kanahi,
11 « O Apu Alla Apumami!
Comiumo da pantasi pinoko'owose, pina'angga, ronga da kuasa.
Kana'umpe Comiumo da ari pokodadio pera da da'a,
ronga nangkua po'ehemiu, ko'ira luwu da meda'a kando pinokodadi. »