Oliwi hai jema'a Sardis
3
1 « Poburiakono sura koie mala'ekatino jema'a hai Sardis kanahi:Diemo haratiano koie da atoro'o ko'opituo sangkoleo da mebinta hai Apu Alla, ronga da ungkaario da opitu olimpopo: Dahakusi to'orio niweweumiu. Kanahindo miano, dakomiusi tora, mainakaa matekomiumo. 2 Nangkuamo koie, mimpewangumo, kami mpokomorosoo parasaeamiu da mokeamo mate. Kana'umpe nahina te'asa boto pohedoamiu da ia-iaa hai ra'ino Apu Alla. 3 Dadi, mimpehawa'o hapa da ari pinepopotisu'akomiu ronga da ari pinodeamiu. Minunu'omo ronga mimpoboli'imo! Ki sami ehe mpedagai, dahaku nta leunicomiu, nami da'a nta to'orio wotuno, kana dadaano miano mpononako.
4 Sawali dahoo opi-opia miano hai Sardis da sai pokomowusee pinodaido. Iramo da pantasi lolako merongaaku, hindona mpebabu mpila.
5 Nai-naiho da moponangi, dahira na'anda nta pinokompebabu mopila. Naku da'a nta kikihio neendo mebinta hai boku ntoraaha.a Ronga hai ra'ino Tamangku ronga pera mala'ekatino, dahaku nta akui'ira kanahi yo mianongku.
6 Inai da koronge, kahioomo kai podedeaho haratiano Sangkoleono Apu hai ira jema'a. »
Oliwi hai jema'a Filadelfia
7 « Poburiakono sura koie mala'ekatino jema'a hai Filadelfia kanahi:
Diemo haratiano koie da ari tinindahakono Apu Alla ronga da menona, da ungkaario tagilino mokole Daud. Ki ungkahio, nahina da mokotampo'o, ronga ki tampo'o, nahina da moko'ungkahio. 8 Dahakusi to'orio niweweumiu. Ontoopo, ariakumo ungkahiakokomiu'o wamba, ronga nahina miano da to'ori tampo'o. Kuto'orio hi sai asahapa koramiu, sawali dakomiusi nunu'o petenaku, ronga nami da'a mehapuiho neengku. 9 Pekokooho ko'ira miano da tewali umatino ponggawano bilisi, ko'ira miano mengkule da mangaku kanahi miano Yahudi, mainakaa nai da'a menona. Dahaku nta parentahira kando leu sudu mesomba hai pu'u ngkarumiu, yahopo kando daa nta to'orio hicua comiu miano nilouku. 10 Tendenomo himi sabara montinei karasai kana da petenaku, yahomo kaku daa nta dagaicomiu, ki leu karasai owose konaa luwu wita'ea nta sobai'ira luwu miano wita'ea.
11 Dahakumo nta oru leu! Ungkaari to'uo da tabulu inungkaarimiu, kai osie miano rampasio koie tila mpeponangimiu.
12 Nai-naiho da moponangi, dahaku nta potoro'o tewali tisa hai rahano Apu Alla, dahano sai nta paisa telinca. Hai iaamo dahangku nta burio neeno Apu Alla Apungku, ronga neeno kotano Apungku, yahoo Yerusalem da tonia, danta tii mebinta hai Apu Alla hai suruga. Ronga itai burio neengku da tonia.
13 Inai da koronge, kahioomo kai podedeaho haratiano Sangkoleono Apu hai ira jema'a. »
Oliwi hai jema'a Laodikia
14 « Poburiakono sura koie mala'ekatino jema'a hai Laodikia kanahi:
Diemo haratiano koie da meneehako Amin, Saksii da pinarasaea ronga da mongkote, da kuasaiho luwu da ari pinokodadino Apu Alla.b 15 Dahakusi to'orio niweweumiu. Nami da'a momapu ronga nami da'a mokula. Da po'ehengku kimi momapu atawa mokula. 16 Sawali mina nte'iaasi mokula-kula ntowongkuku, nai da'a mokula, nai da'a momapu, yahomo kaku daa nta pudusakokomiu mebinta hai ngangangku. 17 Kanahimiu, ‹ Kawasaakumo ronga koa'omo, nahinamo kakurangangku. › Sawali nami da'a to'orio himi dompa memarasai ronga masusa, mengkadee-dee, mopusu, ronga mpelua. 18 Nangkuamo koie, kaku oliwicomiu kami mpo'oli mebinta hai Aku wulaa da mompena da arimo nilono, kami dadi mengkawasa. Ronga mimpo'oli pakea mopila nta pinodaimiu, kai osie inonto himi mpelua ronga mokoko'anu. Ronga kami mpo'oli roongku kami rooho matamiu, kami ngko'onto saru.
19 Inai da nilolarongku, Ku'awaiho ronga Kuhukumaa. Nangkuamo koie, kai laronto'umiu mpoboli'i bintanio dosamiu. 20 Ontoopo, dahaku mentade hai ra'ino wamba mekunte. Ki daa miano da modeahaku, ronga ungkahiakuo wamba, dahaku nta mewiso, kako pongkaa meronga.
21 Nai-naiho da moponangi, dakamimo nta totoro meronga hai kadera mpomokole'angku, kana Ku'ari moponangi, kaku totoro merongaa Tamangku hai kadera mpomokole'ano.
22 Inai da koronge, kahioomo kai podedeaho haratiano Sangkoleono Apu hai ira jema'a. »