Oliwi hai jema'a Efesus
2
1 Kai tena'aku kanahi, « Poburiakono sura koie mala'ekatino jema'a hai Efesus kanahi:Diemo haratiano koie da ungkaario ko'opituo olimpopo hai lima muanano, ronga da lolako hai olotano da opitu tisa hulu wulaa: 2 Dahakusi to'orio pera da niweweumiu, kana megagamiu ronga sabaramiu montinei karasai. Kuto'orio hi sami ntepokonaakondo miano mosa'o. Ronga ko'ira miano da mangaku hicua rasulu, mainakaa na'iaa, aricomiumo solidiki'ira, menteemiuo hicua miano mpekulepi. 3 Sabarakomiu marasai tendenomo I'aku, ronga nai paisa motewe laromiu.
4 Sawali dahoo dahangku sai ehekomiu, yahoo hi sami da'a lolaroaku ronga mpekalola-lolaro pada comiu kana iponoha. 5 Nangkuamo koie, mimpeehawa'o, taperano olaro dahamiu tuuna! Miboli'io bangumiu, kami mpoweweu kana iso-iso. Ki sami ehe mpoboli'i, dahaku nta leu alaa mbule tisa hulumiu.a 6 Sawali dahoo da moico hai comiu, yahoo mina ngkokoleahosi da niweweundo miano golonga Nikolaus, da kinokoleangku na'angku.
7 Inai da koronge, kahioomo kai podedeaho haratiano Sangkoleono Apu hai ira jema'a.
Nai-naiho da moponangi, dahaku nta moweehira mongkaa wua ngkeu ntoraaha da da'a hai Firdaus, umano Apu Alla. »
Oliwi hai jema'a Smirna
8 « Poburiakono sura koie mala'ekatino jema'a hai Smirna kanahi:
Diemo haratia mebinta hai Iaa da meri'ou ronga da merumbui, da ari mate kai tora mbule. 9 Dahakusi to'orio karasaimiu ronga kadee-deemiu, sawali santo'u-to'uahano kawasakomiu. Kuto'oriosi hindo daa mpontumbu'akokomiu ko'ira miano da mangaku miano Yahudi, mainakaa na'iaa, sawali yahoo umatino ponggawano bilisi. 10 Mi'osie momeetako karasai da nirora'imiu. Mimpedagai, dahoo opia miano hai comiu danta niwisono koie ponggawano bilisi hai katorungku, nta sobaicomiu. Hopulusi oleo nta marasaimiu. Mingkonianto'u parasaea dungku mate, dahakusi nta moweekomiu tila mpeponangimiu, yahoo tora da sai hina upuano.
11 Inai da koronge, kahioomo kai podedeaho haratiano Sangkoleono Apu hai ira jema'a.
Nai-naiho da moponangi, nahina danta sala mohapa hai matea ngkompendua. »b
Oliwi hai jema'a Pergamus
12 « Poburiakono sura koie mala'ekatino jema'a hai Pergamus kanahi:
Diemo haratiano da kotobo mongkaso komata mpatimbali. 13 Dahakusi to'orio dahamiu meda'a, yahoo hai pomparentaano ponggawano bilisi. Sawali dakomiusi konianto'u nunu'aku. Deenapo nami mpaisa mehapuiho parasaeamiu hai Aku tempono i Antipas, saksiicu da konianto'u, pinopate hai kotamiu, yahoo poo'iahano ponggawano bilisi.
14 Sawali dahoo dahangku sai ehekomiu: Dahoo asa ntilara miano hai comiu da nunu'o pompotisuno i Bileam. Koie i Bileam da oliwio i Balak, kai undekihira ko'ira miano Israil kando mpongkaa kinaa da ari tinompa tewali pesomba hai ka'apu-apu, ronga me'endeo.c 15 Kanamo meha miano hai comiu dahira mpenunu hai pompotisuno miano golonga Nikolaus. 16 Nangkuamo koie, miboli'iomo bangumiu! Ki sami ehe, dahaku nta leu dalo'akondo'o tobo da hai ngangangku.
17 Inai da koronge, kahioomo kai podedeaho haratiano Sangkoleono Apu hai ira jema'a.
Nai-naiho da moponangi, dahaku nta moweeho roti ntewuniako da meneehako manna.d Ronga dahaku nta moweeho watu mpila dahano teburi nee da tonia, da sai tino'orino suere miano saliwano da pinoweehi. »
Oliwi hai jema'a Tiatira
18 « Poburiakono sura koie mala'ekatino jema'a hai Tiatira kanahi:
Diemo haratiano Anano Apu Alla, da kana wea api matano, ronga karuno kana tambaga nggela. 19 Dahakusi to'orio da niweweumiu, kana pololaromiu ronga parasaeamiu, pohedoamiu ronga megagamiu marasai. Kuto'orio niweweumiu diekana pompokokulaloihopo ka'iaa da meri'ou.
20 Sawali dahoo dahangku sai ehekomiu: mina moturusio koie tina da meneehako Izebel da mangaku nabii, da mompotisu'ako pompotisu ntesala, pokomporehira atangku kando endeo,e ronga mpongkaa kinaa da ari tinompa tewali pesomba hai ka'apu-apu. 21 Ariakumo moweeho tempo ki daa ehe moboli'i, sawali nasai ehe tetabe endeo. 22 Mi'ontoomo, dahaku nta tampelako hai poturia kai morungku. Ronga pera miano da ari meduluakono moweweu ngkabaria, dahaku nta pokomarasai to'uhira, ki sando ehe teboli'i monunu niweweuno koie tina. 23 Dahaku nta pepatehira ana guruno, kando to'orio luwu jema'a hicuamo Aku da to'orio pinehawano ronga ihi mpelaroano miano. Ronga dahaku nta wolohicomiu tee-tee'asa miano kana niweweumiu.
24 Sawali dahoo meha miano hai comiu hai Tiatira da sai da'a kenunuta hai pompotisu ntesalano Izebel. Nami mpaisa mepopotisu'ako koie da nineehakondo tino'orino bilisi. Naku da'amo nta tenakomiu da mobea, 25 te'iaasi hapa da tabulumo inungkaarimiu, mi'ungkaari to'uo dungku kaku leu.
26 Nai-naiho da moponangi, hindo daa nunu to'uo parentangku dungku kompura-puraano, dahaku nta moweehira kuasa, kando parentahira luwuo suku. 27 Kuasando dahoo nta kana kuasa da ari tinarimangku hai Tamangku. Dahira nta parentaakondo'o tuko uti, ronga mokomopuro'o miano kana kuro wita hi tepiroki.f 28 Ronga dahaku nta weehira olimpopo ngkomeanta.
29 Inai da koronge, kahioomo kai podedeaho haratiano Sangkoleono Apu hai ira jema'a. »