Niamata
da ari inontono i Yahya
Niamata da tinulurano i Yahya
1
1 Diemo niamata hi ari Apu Alla popo'ontonio i Yesus Kristus. Kai pontena i Yesus mala'ekatino tii hai Yahya atano, kai pokodungku'akondo'o ko'ira atano Apu Alla dadaano pera danta oru kadadia. 2 Kai tuluraa i Yahya luwu da inontono, pokodungku'o haratia da mebinta hai Apu Alla ronga hapa da tinulurano Yesus Kristus. 3 Konantuaraa miano da basaakondo'o jema'a die haratiano Apu Alla da pinokodungku hai nabiino die hai boku, ronga konantuaraa miano da podedeaho ronga da nunu'o da teburi die hai boku. Kana'umpe okudaamo wotuno nta kadadiahano.Salamuno i Yahya hai jema'a da opitu
4 I'aku die Yahya mesalamu hai comiu da opitu jema'a da hai propinsi Asia.a Kahioomo kai peehawakomiu Apu Alla da iso da'a, diekana, ronga danta leu. Kahioomo kai momapu laromiu tendenomo barakati mebinta hai Apu Alla, mebinta hai ko'opituo sangkoleo da hai ra'ino kadera mpomokole'ano, 5 ronga mebinta hai Yesus Kristus. Iaamo saksii da pinarasaea, da mata iso niwangu mebinta hai matea, ronga da parentahira mokoleno wita'ea. Iaamo da lolarokita, ronga kai tesolo reano, pohudanomo cita mebinta hai dosanto. 6 Iaamo da mokontewalicita miano da itai momparenta merongaa, ronga pua'ima da layanio Apu Alla Tamano. Koiemo i Yesus da pinoko'owose ronga da kuasa dungku samengka-mengkauno. Amin!
7 Ontoopo hi leumo dahoo me'ulea hai seru!
Luwu miano dahoo nta ontoo, mau ko'ira miano da ari sakuo.
Luwu suku wita'ea dahira nta mperurumateiho.
Yahoo, kanamo koie, menona to'uo!
8 Kai koharatia Apu Alata'ala, « I'akumo da tampu'uo ronga da moko'ario, da kuasa'ea, da iso da'a, diekana, ronga danta leu. »
Niamatano i Yahya hai pulo Patmos
9 I'akumo die i Yahya, petila asa ngkarasaimiu, pengkena sabaramiu, naamo perongamiu mewiso hai pomparentaano Apu Alla, tendenomo hito boboto'akono i Yesus. Dahangku hai pulo Patmos, tebasiako tendenomo hicu leleako haratiano Apu Alla ronga tewali saksiino i Yesus. 10 Konaa oleono Apu, kai tuduriaku Sangkoleono Apu, kaku podeaho suara hai bungkungku da mokora kana unino torompe 11 kanahi, « Burio luwu pera da inontou hai boku, kau pokatuakondo'o ko'ira da opitu jema'a, yahoo: Efesus, Smirna, Pergamus, Tiatira, Sardis, Filadelfia, ronga Laodikia. »
12 Kaku pegili molihe ontoo kinaiho da mogau'akuo. Yahopo kaku ontoo opitu tisa hulu wulaa. 13 Hai olotano ko'ira tisa hulu dahanomo mentade da kana to'u asa boto miano.b Dahoo mebabu mentii dungku hai karuno. Hai o'ono dahoo mompesulampe da kana to'u sulepe wulaa. 14 Mopilano wuuno kana to'u wulu domba da mopila kana kapa. Matano mewea kana langa api. 15 Karuno menggelaa kana tambaga da mewea hai radaka. Suarano kana e'e waa da meroro. 16 Lima muanano dahoo mo'ungkaari opitu olimpopo, ronga hai ngangano saba tobo mongkaso da komata mpatimbali. Ra'ino meweaho kana to'u mata oleo hi totoro oleo.
17 Saku ontoo, nilakoku teranggahako hai pu'u ngkaruno kana miano mate. Sawali lima muanano nahedoaku kai kanahi, « Osie momee! Akumo die da meri'ou ronga da merumbui. 18 Akumo pu'uno toraaha. Ariakumo mate, sawali toraakumo mbule nta samengka-mengkauno. Akumo da ungkaario tagilino mateaha ronga wonuando miano mate. 19 Nangkuamo koie, buriomo luwuo da inontou, kana da da'a diekana, maupo danta kadadia perumbuino. 20 Diemo batuano rahasia da opitu olimpopo da inontou hai lima muanangku, ronga da opitu tisa hulu wulaa: ko'opituo koie olimpopo yahoo mala'ekatino da opitu jema'a, ronga da opitu tisa hulu yahoo ko'opituo jema'a. »