Terowano Babel
18
1 Sa'arino koie, kaku ontoo me'asa mala'ekati suere tii mebinta hai suruga. Owose'o kuasano ronga niwincano pokomolinyaaho wita'ea. 2 Kai pekora mehou kanahi,« Terowa'omo, morowa'omo Babel,
koie kota owose!
Diekana tewaliomo poo'iahando bilisi,
ronga petorungku'ando pera setani,
naamo pera manu-manu mowuse da kinokolea.
3 Kana'umpe luwuo suku arihiramo mpondo'u akoie angguru sa'o larono Apu Alla
da saba tendenomo endeohano Babel.
Pera mokole wita'ea arihiramo meduluakono mpoweweu ngkabaria.
Pera padangga hai wita'ea mengkawasahiramo tendenomo po'eheno koie tina endeo modio bara-bara da dompa mohali anggano. »
4 Yahopo kaku pompodea suara meha mebinta hai suruga da kanahi,
« Mimpeluarakomo, umaticu!
Milakomo bintanio!
Kami osie kehalusa sinalakino,
ronga kai osie konakomiu abalaano.
5 Kana'umpe sinalakino mabumbuomo dungku hai langi,
ronga Apu Alla nai kolumpee niweweu mosa'ono.
6 Miweweuhakono'o na'ana kana da ari poweweuno.
Miluku mpenduahakono'o poweweu ngkabariano.
Mi'ihianiakono'o pondo'uano nindo'u da luku mpendua mokorano,
ka'iaa nindo'u hi ari moweehira miano.
7 Poweeho karasai ronga poe laro,
kai pengkena te'anggano ronga kawasano da ari inawano.
Kana'umpe sadiaho kanahi hai pelaroano,
‹ I'aku die kowatino i mbisi da momparenta!
Naku ehe nta tewali ntina walu,
naku da'a nta paisa mepoe-poe laro. ›
8 Nangkuamo koie, nta asa oleosi ki konaa silaka:
rungku, poe laro, ronga kohuloo.
Dahoo nta tinunuako api,
kana'umpe Apu Alla da mo'otuhi kara-kara mokoraa. »
9 Pera mokoleno wita'ea da ari meduluakono mpoweweu ngkabaria ronga tora kawasa merongaa koie tina endeo, dahira nta mpewowo ronga mperurumateiho, kindo ontoomo ahu api da tunuiho. 10 Mentalaa nta mpentadeando ndona momeetako kindo itai pinakasea ronga kanahi,
« Silaka, silakakomo, hoo co'o kota owose,
kota Babel da mokora,
kana'umpe asa damusi konakomo hukuma! »
11 Kando mpewowo ko'ira padangga hai wita'ea ronga mperurumateiho, kana'umpe nasai hinamo da mo'oli bara-barado, 12 yahoo: wulaa, pera, paramata, montia; kanapo kae lena alusu, kae morondo, kae sutra, ronga kasaeda motaha; pera giuno keu mowondu, pera giuno pokosangka mebinta hai sungeno gaja ronga keu da mohali olino, da mebinta hai tambaga, uti, ronga watu marmar; 13 kuli ngkeu momami, mina-mina, dupa, pulu ngkeu mperoo, pulu ngkeu mowondu, angguru, epu, tariju halusu, ronga gandum; sapi, domba, dara, bendi, sangkinaa, ronga ata. 14 Kando kanahi, « Luwu da pinokeahakou nahinamo, ronga pera da ko'angga ronga moico ontoahano isaamo hai tarou. Nau da'amo nta tule'i awaa mbule! »
15 Ko'ira padangga da balu'o luwu koie hapa-hapa, da mengkawasamo tendenomo iaa, mentalaa nta mpentadeando ndona momeetako kindo itai pinakasea. Dahira nta mpewowo ronga mperurumate, 16 kando daa kanahi,
« Silaka, silakakomo, hoo co'o kota owose,
da mepakea'ako lena alusu, babu motaha olondoro ronga motaha to'u;
meparewaako wulaa, paramata, ronga montia.
17 Kana'umpe asa damusi kai lono mponoha luwuo kawasano! »
Luwuo anakodano bangka ronga pera uleano, naamo da mpohedo hai kapala, kai tii pera miano da mpo'u'ungke hai tahi, mpentadehiramo mentala. 18 Tempondo ontoo ahu api da tunuiho koie kota, kando mpogora kanahi, « Ki maina kota da pengkenano owoseno die kota? » 19 Dahiramo mpewowo ronga mperurumate kando daa me'awuiho rapando kando daa mpogora kanahi,
« Silaka, silaka'omo kota owose,
da mokongkawasaa pera miano da da'a kapalano hai tahi,
tendenomo bara-barano da mohali!
Kana'umpe asa damusi kai lono mponoha! »
20 Mimohende'akonomo, da meda'a hai suruga,
ronga comiu miano ntinindahakono Apu Alla, rasulu, naamo nabii,
na'arimo Apu Alla hukumaa,
tendenomo poweweuno comiu.
21 Sa'arino koie, dahoo me'asa mala'ekati da mokora taarako me'asa watu owose da kana watu mpogili'a, yahopo kai basiako hai tahi ronga kanahi,
« Kanamo koie mokorano hi nibasiako kota Babel da owose,
ronga nai da'amo nta tule'i inawa mbule.
22 Nahinamo miano danta paisa mompodea unino miano da megambusu kokeena,
da melagu, da mesuli, ronga da mompuuri torompe.
Nahinamo miano danta tewali tuka,
kanapo unino watu mpogili'a nai da'amo nta paisa pinodea.
23 Nai da'amo nta paisa da'a hulu da lolanga,
ronga nahinamo suarano tama niwawa ronga tina niwawa.
Padanggano yahomo da telele upuo wita'ea.
Luwu suku pinokomporeakoomo tino'ori ngkabariano koie kota.
24 Reado nabii ronga miano ntinindahakono Apu Alla,
kai tii reado luwu miano da ari pinopate die hai wita'ea,
koiemo hai kota Babel daahano. »