Tina endeo parereno kota Babel
17
1 Yahopo kai leu me'asa simbaudo da opitu mala'ekati da wawaa ko'opituo mangkoona, kai tena'aku kanahi, « Leumo na'ai, kaku tisu'akoko'o hukuma danta inawano koie tina endeo da telele, da totoro dahano me'alu laa e'e. 2 Pera mokole hai wita'ea arihiramo mpeduluakono mpoweweu ngkabaria, ronga pera ihino wita'ea memolanguakomo angguru endeono koie tina. »a3 Kai kuasaniaku Sangkoleono Apu, kai wawaaku koie mala'ekati hai lueno papawu. Kaku ontoo me'asa tina da me'ulea hai me'asa kadadi da motaha to'u, da pono'ako buri, ronga koie buri yahoo nee mpomparuru da mengkenaiho Apu Alla. Koie kadadi dahoo opitu rapano ronga hopulu tanduno. 4 Pakeano koie tina motaha olondoro ronga motaha to'u.b Meparewaako wulaa, paramata, ronga montia. Hai limano dahoo mo'ungkaari tonde wulaa pono'ako luwu giuno wuse-wuse ronga kosisi mebinta hai endeohano. 5 Hai wuku ra'ino dahoo teburi me'asa nee ngkorahasia, unino: « Babel owose, petinaandomo luwu tina endeo, pu'uno luwu niweweu mowuse hai wita'ea. » 6 Kaku ontoo koie tina hi molanguakomo reado umatino Apu Alla, ronga reado saksiino i Yesus. Nangkuamo kai taperangku bangao.
7 Yahopo kai pogau'akuo koie mala'ekati kanahi, « Hapa kau daa bangao? Dahakumo nta mo'awaakoko rahasiano koie tina, ronga rahasiano koie kadadi dahano me'ulea, da korapa opitu ronga kotandu hopulu. 8 Koie kadadi da inontou itonia ariomo tora nimpia, sawali diekana nahinamo. Dahoo nta saba mebinta hai bolo lia petorungku'ando bilisi, ronga dahomo rora'io nta lono'ano. Luwu miano hai wita'ea da sai teburi neendo hai boku ntoraaha sa'isono da'a die wita'ea, dahira nta mentebibinco kindo me'ontoo koie kadadi. Kando daa nta mentebibinco hina ntora koie kadadi isono, sawali diekana nahinamo, ronga dahosi nta saba penda.
9 Da paraluu na'ai yahoo pinehawa motu'a: Opituo koie rapa batuano yahoo opitu kabumbu da tinotorokino koie tina. 10 Ko'opituo rapa yahosi penda opitu mokole. Da olima tuunahiramo, da me'asa dahosi, ronga me'asano nai da'apo leu. Sawali ki leu, nta te'asantoniasi. 11 Koie kadadi da ari da'a ronga da sai hinamo diekana, yahomo mokole kohoalu. Yahosi simbaudo da opitu, ronga dahomo rora'io nta lono'ano.
12 Kohopulu'o koie tandu da inontou yahoo da hopulu mokole da sai da'apo montampu'u momparenta, sawali nta te'iaasi te'asa damu mengkauno ki kuasa tewali mokole merongaakono koie kadadi. 13 Ko'ira mokole boboto gau'iramo nta weehakono'o koie kadadi korando ronga kuasando. 14 Dahira nta mamusu bali'o koie Ana Domba. Sawali koie Ana Domba dahoo nta nangihira, kana'umpe Iaa Apuno pera pe'apua, ronga Mokoleno luwu mokole. Ko'ira da perongano dahira nta itai meponangi, yahoo da meniboboi, ronga da menteruruki, naamo da mengkonianto'u. »
15 Yahopo kai pogau'akuo koie mala'ekati kanahi, « Luwuo e'e da inontou, dahano totoro koie tina endeo, yahomo miano me'alu, suku, wonua, ronga gau. 16 Koie da hopulu tandu ronga koie kadadi da inontou, dahira nta kokoleaho koie tina endeo. Dahira nta rampasio pera hapa-hapano ronga mokompeluaho. Dahira nta kaaho ihino ronga nta tunuo kai lono. 17 Kana'umpe Apu Alla ariomo moweehira pelaroa kando nunu'o po'eheno, ronga kando boboto mpekiri kando weehakono'o koie kadadi kuasando, dungku kai tenunu haratiano Apu Alla. 18 Ronga koie tina da ari inontou, yahomo koie kota owose da parentahira pera mokole hai wita'ea. »