Pomparentaa da asa rewu ta'u
20
1 Kaku ontoo me'asa mala'ekati tii mebinta hai suruga, dahoo ungkaario tagilino bolo lia petorungku'ando bilisi, ronga me'asa rante da owose. 2 Kai rako'o koie naga, yahoo ule motu'a da nineehako ponggawano bilisi atawa setani, kai ula'o asa rewu ta'u mengkauno. 3 Yahopo koie mala'ekati kai basiako hai bolo lia petorungku'ando bilisi, kai tagili'o ronga segele'o wambano, kai osie to'ori lako pokomporehira luwu suku, hi sai da'apo pura tempono da asa rewu ta'u koie. Arinopo koie, kai daa nta nibintani te'asantonia mengkauno.4 Yahopo kaku ontoo opia kadera mpomokole'a, dahando mentotoro miano da ari pinoweehi kuasa nta mo'otuhi hukuma. Kaku ontoo penda sangkoleondo miano da ari pinulu rapando tendenomo hindo ari saksii'o i Yesus ronga leleako haratiano Apu Alla. Ko'iramo miano da sai ehe mesombaiho koie kadadi atawa kakada-kadadino. Nando ehe montarima peto'ono hai wuku ra'indo atawa hai limando. Torahiramo mbule kando mpomparenta merongaa koie Kristus ilarono asa rewu ta'u. 5 Diemo iso'ano niwangusako mbule miano mate. Sawali miano mate suere nando da'a nta niwangusako mbule ki sai tekabu koie da asa rewu ta'u. 6 Konantuarahira miano da itai niwangusako meri'ou. Ko'iramo miano da tinindahakono Apu Alla. Kuasano mateaha ngkompendua nai da'amo nta konahira.a Deenapo i'iramo danta tewali pua'ima mpontompa pesomba hai Apu Alla ronga Kristus, kando pomparenta merongaa larono asa rewu ta'u.
Kenangiahano ponggawano bilisi
7 Satekabuno asa rewu ta'u, dahomo nta nibintani koie ponggawano bilisi mebinta hai katorungku. 8 Yahopo kai daa nta lako pokomporehira suku hai upu-upuo wita'ea, yahoo suku Gog ronga Magog, ronga kongkosakohira nta mamusu, me'alundo kana hahi hai wiwi ntahi. 9 Kando melako upu-upuo wita'ea, kando melibuo pekemaando umatino Apu Alla, yahoo kota da pine'o'oloino Apu Alla. Sawali nantudu langa api mebinta hai langi kai tunuihira kando melono. 10 Yahopo koie ponggawano bilisi, da ari mokomporehira, kai nibasiako hai bolo ntahi api da kolanga-langaako walira. Koiemo ariano nibasiako koie kadadi ronga kanabi-nabii. Dahandomo nta pinakasea mengkena malo ronga meanta dungku samengka-mengkauno.
Inotuhiano hukuma da kompura-puraano
11 Kaku ontoo me'asa kadera mpomokole'a owose da mopila, ronga Koie da totoro hai wawono kadera. Langi ronga wita isaamo mebinta hai ra'ino, yahomo kasai da'amo inonto. 12 Kaku ontohira raro miano mate da okidi owose da mpentade hai ra'ino koie kadera mpomokole'a. Kai inungkahi ko'ira boku dahano teburi niweweundo pera miano. Ronga boku suere inungkahi na'ana, yahoo boku ntoraaha. Luwu da memate inotuhiomo kara-karado nunu'o da teburi ko'ira hai boku, kana da ari niweweundo. 13 Koie tahi luarakohiramo pera miano mate da meda'a hai bolono. Matea ronga wonuando miano mate peluarakoanomo pera miano mate da da'a hai bolono, yahopo Apu Alla kai otuhiakondo'o nta me'inawando tee-tee'asa miano nunu'o niweweundo. 14 Yahopo mateaha ronga wonuando miano mate kai nibasiako hai bolo ntahi api, koiemo mateaha kompendua. 15 Ronga pera miano da sai da'a teburi neeno koie hai boku ntoraaha, nibasiakoomo itai koie hai bolo ntahi api.