Langi tonia ronga wita'ea tonia
21
1 Kaku ontoo langi da tonia ronga wita'ea da tonia, kana'umpe langi ronga wita'ea da meri'ou isaamo, ronga tahi nahinamo. 2 Yahopo kaku ontoo koie kota ntinindahako, yahoo Yerusalem da tonia, tii mebinta hai Apu Alla hai suruga, da teparewani kana tina niwawa danta tepo'awaakono tama nta samporano. 3 Kaku podeaho suara mokora mebinta hai kadera mpomokole'a da kanahi, « Ontoomo, diekana poo'iahano Apu Alla hai tongado manusia! Dahomo nta moo'ia merongahira, ronga ira yahomo nta umatino. Apu Alla dahoo nta pono-ponohaakondo ronga nta Apundomo. 4 Apu Allamo danta kikihiakondo'o pera luudo. Nahinamo danta mate, nahinamo danta mepoe-poe laro atawa mewowo, nahinamo danta mopoe'ako rungku. Kana'umpe luwu koie da meri'ou tekabuomo. »5 Kai koharatia Koie da totoro hai kadera mpomokole'a, « Ontoopo, dahakumo mokontoniaho luwu! » Kai koharatia penda, « Burio, kana'umpe die luwu ino'awa menonaa ronga pinarasaeaho. » 6 Kai koharatia penda hai aku, « Ariomo. I'akumo da tampu'uo ronga da moko'ario, da iso-iso ronga kompura-puraano. Miano da mokokondo'u dahaku nta mowee mpenaa kai pondo'u e'e mebinta hai mata e'e ntoraaha. 7 Inai da moponangi dahoo nta tarimaa die tilari, ronga Akumo nta Apu Alla Apuno, ronga iaamo nta anaku. 8 Sawali miano da mowara, da sai parasaea, da mowuse, da mompepate, da endeo, miano mponto'ori, da mesomba hai ka'apu-apu, da mengkule, iramo nta tarono tahi api da kolanga-langaako walira: diemo da nineehako mateaha ngkompendua. »
Yerusalem da tonia
9 Kai leu me'asa simbaudo ko'opituo mala'ekati da wawaa ko'opituo mangkoona, da pono'ako opitu silaka da kompura-puraano, kai kanahi hai aku, « Leumo na'ai, kaku tisu'ako'o tina niwawa nta samotu'ano Ana Domba. » 10 Kai kuasaniaku Sangkoleono Apu, kai wawaaku koie mala'ekati hai otu ntangkeno da owose ronga montoe, kai tisu'akuo Yerusalem, kota ntinindahakono Apu Alla, da tiniihakono mebinta hai suruga. 11 Koie kota molinyaahako niwincano Apu Alla, ronga molinyaano kana montia da ko'angga, kana montia baiduri da molino mpaiasa. 12 Torici watuno da lilicu'o owose'o ronga montoeho, ronga pinewambano dahoo hopulu orua. Koa-koa'o pinewambano dahoo me'asa mala'ekati. Hai wawono pinewambano dahoo teburi neendo kohopulu orua'o suku Israil, me'asa pinewamba me'asa nee. 13 Tindaa sabaano oleo dahoo otolu pinewamba, tindaa utara dahoo otolu pinewamba, tindaa salata dahoo otolu pinewamba, ronga tindaa pada oleo dahoo otolu pinewamba. 14 Pompu'uino koie toricino kota yahoo hopulu orua watu'ea, ronga hai wawono dahoo teburi neendo da hopulu orua rasuluno koie Ana Domba.
15 Koie mala'ekati da mogau'akuo dahoo mo'ungkaari me'asa tuko wulaa nta po'ukuruno koie kota, ronga pinewambano, kai tii toricino. 16 Koie kota kopangkena, mentaano pengkenaa meleweno. Koiemo tuko po'ukuruno koie kota: mentaano rua rewu pato etu kilo;a meleweno ronga montoeno kanasi mentaano. 17 Yahopo kai ukuru'o toricino: Asa etu pato pulu opaa hicu, ukuruno to manusia, da pe'ukurunosi na'ana koie mala'ekati. 18 Toricino koie kota yahoo montia baiduri. Koie wotoluno kota yahoo wulaa da mompena, da molino mpaiasa. 19 Watu pompu'uino nibunga-bungaako pera rupano montia.
Da meri'ou yahoo montia baiduri,
ko'orua ntapino yahoo montia nilam,
ko'otolu ntapino yahoo montia mirah,
ko'opaa ntapi yahoo montia zamrud.
20 Ko'olima ntapi yahoo montia baiduri sepah.
Ko'onoo ntapi yahoo montia dolima,
ko'opitu ntapi yahoo montia ratna cempaka,
kohoalu ntapi yahoo montia pirus,
ko'osio ntapi yahoo montia topas,
kohopulu ntapi yahoo montia krisopras,
kohopulu ka'asa ntapi yahoo montia lazuardi,
kohopulu orua ntapi yahoo montia kecubung.
21 Kohopulu orua'o pinewamba yahoo montia ngkorowe, ronga batatanano hai bolo ngkota yahoo wulaa mompena, da molino mpaiasa.
22 Naku ontoo raha mpesombaa hai bolono koie kota, kana'umpe koie raha mpesombaano yahoo Apu Alata'ala da kuasa'ea, kanapo na'ana koie Ana Domba. 23 Koie hai bolo ngkota nai da'amo paraluu oleo ronga wotiti, kana'umpe da wincahio yahoo niwincano Apu Alla, ronga koie Ana Domba da tewali huluno. 24 Pera suku dahira nta melolako larono niwincano, ronga pera mokole nta mewawaa kawasando koie hai kota. 25 Te'ole-oleo pinewambano nai paisamo tetampo, kana'umpe nasai hinamo malo kokeena. 26 Kawasano ronga pompa'anggano pera suku dahiramo nta wawaa kokeena. 27 Da haramu nai tewali mpiha mewiso hai larono, atawa miano da moweweu da mowuse ronga da mengkule, sawali te'iaasi miano da teburi neendo hai boku ntoraahano Ana Domba.b