22
1 Yahopo koie mala'ekati kai tisu'akuo laa e'e ntoraaha, da molino kana paiasa, da wowaa mebinta hai kadera mpomokole'ano Apu Alla ronga Ana Domba. 2 Hai tonga-tongano batatanano koie kota ronga patimbali wiwino koie e'e dahoo pu'u ngkeu ntoraaha, da kowua tudu wotiti larono asa ta'u. Koie ririno keu peroondomo luwu suku kando mentido.3 Hai larono koie kota nahinamo te'asa da kinonano hukumano Apu Alla. Kadera mpomokole'ano Apu Alla ronga Ana Domba koiemo hai larono kota dahano, ronga atano dahandomo nta mesomba. 4 Dahandomo nta ontoo ra'ino Apu Alla, ronga neeno Apu Alla dahomo nta niburi hai wuku ra'indo. 5 Kokeena nahinamo malo, nando da'amo nta paraluu hulu ronga oleo, kana'umpe Apu Allamo danta wincahi'ira. Ronga ko'ira atano Apu Alla dahiramo nta momparenta kana mokole dungku samengka-mengkauno.
Leuhano Apu Yesus
6 Kanahiomo koie mala'ekati hai aku, « Luwuo koie gau da pinodeau menonaa ronga da pinarasaea. Apu Alata'ala da weehakondo'o Sangkoleono ko'ira nabii, ariomo montena mala'ekatino nta motisu'akondo'o raro sangkinaano hapa danta orumo kadadia. »
7 Haratiano i Yesus, « Mimpeehawa'o, dahakumo nta oru leu! Konantuaraa miano da nunu'o haratiano Apu Alla da pinokodungku hai nabiino die hai boku. »
8 I'akumo die i Yahya da modeaho ronga da ontoo koie luwu da kadadia. Sa'arincumo modeaho ronga ontoo, kaku sudu hai pu'u ngkaruno koie mala'ekati da ari popo'ontoniaku luwuo nta mesombaiho. 9 Sawali namogau'akuo kanahi, « Osie mesomba hai aku! I'aku na'angku ata ntinena, kanasi co'o ronga raro nabii petila'u, ronga pera miano da nunu'o luwu ihino die boku. Sombaa Apu Alla! »
10 Yahopo kai pogau'akuo penda kanahi, « Osie wuwuniako haratiano Apu Alla da teburi die hai boku, kana'umpe okudaamo tempo nta kadadiahano koie luwu. 11 Inai da moweweu da mosa'o, kahioomo kai poweweu ngkaida'a da mosa'o. Inai da mowuse, kahioomo kai mowuse ngkaida'a. Miano da tekona, kahioomo kai poweweu ngkaida'a da tekona, ronga miano da tinindahakono Apu Alla, kahioomo kai petindahako ngkaida'a. »
12 Koharatia'omo i Yesus, « Mimpeehawa'o, dahakumo nta oru leu! Dahaku nta wawaakondo'o gadi nta wolohino koa-koa'o miano nunu'o hapa da ari niweweundo. 13 I'akumo da tampu'uo ronga da moko'ario, da meri'ou ronga da merumbui, da iso-iso ronga kompura-puraano. »
14 Konantuarahira miano da tatapio babundo kai mowua, iramo da kohaku tealo hai pinewamba mewiso hai laro ngkota, kando pongkaa wua ngkeu ntoraaha. 15 Sawali ko'ira miano da kana dahu, ronga da monto'ori, ko'ira miano endeo, miano mpompepate, da mesomba hai ka'apu-apu, ronga da mohende tora mengkule, nta poo'iahando hai bungku.
16 « Aku i Yesus, ariakumo tena'akomiu'o mala'ekaticu, kai po'awaakokomiu die haratia nta mekona hai pera jema'a. Aku die tuna hakano Daud, yahoo leeno. Akumo die olimpopo ngkomeanta da molinyaa. »
17 Sangkoleono Apu ronga koie tina niwawaa kanahi'iramo, « Leumo! » Pera miano da modeaho die poboboi, kahioomo kai kanahi, « Leumo! » Naiho da mokokondo'u, kahioomo kai leu! Inai da mokea, kahioomo kai po'ala mpena koie e'e ntoraaha.
Pokompuraano
18 Aku, Yahya, mokompehawa'akondo'o pera miano da modeaho haratiano Apu Alla da teburi die hai boku: ki daa te'asa miano da tianio die haratia, Apu Alla danta tianiakono'o hukumano kana ko'ira silaka da teburi die hai boku. 19 Kanapo ki daa miano da bentahio te'asa ntilara haratia da teburi die hai boku, Apu Alla danta bentahiakono'o tilano kana da teburi die hai boku, yahoo tabe'o kai osie moo'ia hai kota ntinindahako ronga mongkaa wua ngkeu ntoraaha.
20 Kai kanahi koie da mokodungku'o luwuo die, « Menonaa, dahakumo nta oru leu! »
Kanamo koie! O Apu Yesus, Mileumo!
21 Kahioomo pompeehawano Apu Yesus kai perongakomiu luwumiu!