Surano
Yudas
Salamu
1
1 Die sura mebinta hai aku Yudas, atano Yesus Kristus ronga petilano Yakobus. Nta lako hai comiu da kinebai ronga da nilouno Apu Alla Tamanto naamo da piniara dungku kai leu pendua Yesus Kristus.a 2 Kahioomo kai mapuhiakokomiu'o Apu Alla pololaro ronga polou da sai hina puraano.Kaguru-guru
3 Raro mpetilaku da telou, iso-isono laronto'ungku mepatudu nta moburiakokomiu mekona nta sinalama'akonto. Sawali diekana kuna mokea moburiakokomiu oliwi kami daasi sadia megaga totonga'o da pinarasaeamiu da pinokodungku hai umatino Apu Alla. 4 Kana'umpe mentoda'omo hi daa miano da sumoo mekangio hai comiu. Ko'iramo miano mosa'o da boli'io pompotisu dadaano pompeehawano Apu Alla kando to'orisi weweuho po'ehendo da mosa'o. Nando akui'o Yesus Kristus, da kuasa ronga Apunto. Ariomo pinatantu hukumando mebinta iponoha hai Boku Haratiano Apu Alla.
5 Mau kimi to'oriomo koie luwu, sawali dahakupo mokea pokompehawakomiu penda. Iponoha Apu pokosalama'ira miano Israil mebinta hai Mesir, sawali perumbuino popatehira miano da sai parasaea. 6 Kanasi na'anda ko'ira mala'ekati da sai to'orio perano kuasando, kando peluarako bintaa poo'iahando. Apu Alla pungoakondo'o rante da sai nta paisa te'otu hai rondomaano dungku oleo owose pe'adili'a. 7 Kanasi na'anda miano Sodom ronga Gomora naamo kampo da okudahio, da mpoweweuhako kana da niweweundo ko'ira mala'ekati, da me'endeo ronga mpoweweu ngkabaria, yahomo kando pinakaseahako api da sai paisa mate, nta pompokompehawado miano.
8 Kanasi na'anda ko'ira miano da kinulepino inipindo, kando wuwuseiho wotolundo, kando paruruo kuasano Apu Alla ronga poko'anu-anuhira mala'ekati da owose hai suruga. 9 Koie i Mikhael, ponggawando mala'ekati, nai paisa moweweuhako kana koie daando ponggawano bilisi mpegagahiako maeatino Musa. Koie i Mikhael nai moseka mogau ngkabaria hai ponggawano bilisi, te'iaasi kanahino, « Kahioomo Apu danta anuko! » 10 Sawali ko'ira miano ndona paruruo luwu da sai pinahado. Ronga da pinahado kana pompahado kadadi da sai hina akalado, te'iaasi nunu'o po'ehe mpantano, koiemo da pokohancuru'ira. 11 Silaka'ira, ko'iramo da nunu'o niweweuno i Kain. Kando tuuna hai bolo dosa kana i Bileam, ndona mokeahako doi. Ndona ta'oo Apu Alla kana i Korah, yahomo kando pinokohancuru.b
12 Daamiu pongkaa mperoronga, sipado ko'ira miano sa'ia-iaa. Ndona lodoko mpongkaa sahina ko'anundo, hindona mokea tora mpanta. Kana seru da pinuurino ngalu, nahina usano. Kana pu'u ngkeu da nirabu hakano, nahina wuano, kai mate santo'u-to'u. 13 Kana hembo da mokora kai bubura, kanamo koie niweweundo da bubura'ako ko'anu. Kanahiramo olimpopoi langi da kolinca-linca, ronga Apu Alla pasadia'akondo'o poo'iahando dahano rondoma to'u dungku samengka-mengkauno.
14 Koie i Henokh, soro ko'opitu mebinta hai Adam, ariomo mogau kana nabii mekona hai ira miano kanahi, « Ontoopo hi daa Apu nta leu merongahira mala'ekati mewota da teporewu-rewu, 15 nta adili'ira luwu miano. Dahoo nta hukuma'ira miano mosa'o tendenomo niweweu ngkabariado, ronga dahoo nta hukuma'ira miano ngkodosa ronga madoraka tendenomo luwu ino'awa mpompoko'anu-anundo Apu Alla. »
16 Ko'ira miano sadia mperutu-rutu ronga mpengunguako tuarando, nunu'o po'ehe mpantado da mosa'o. Ndona mereree mpanta ronga mo'ala-ala larono miano, kando po'awasi laba.
Pompokompehawa ronga oliwi
17 Raro mpetilaku da telou, mimpeehawa'o da ari kinahiindo rasuluno Yesus Kristus Apunto. 18 Dahira mo'awaakomiu kanahi, « Okudaamo oleo kiama, dahira nta saba miano mpompoko'anu-anu da mentora nunu'o po'ehendo da mosa'o. » 19 Ko'iramo miano da mompokontepobungku ronga nunu'o da pinokeahakono miano wita'ea. Nando da'a nunu'o Sangkoleono Apu.
20 Sawali comiu, kahioomo parasaeamiu hai Yesus Kristus kai pokomorodoo toraamiu. Parasaeamiu taperano te'angga hai ra'ino Apu Alla. Ronga mi'amalamo nunu'o po'eheno Sangkoleono Alata'ala, 21 ronga piaraa toraamiu hai tonto inoluno polouno Apu Alla, himi daa totarimaa pololarono Yesus Kristus Apunto, nta tilaricomiu toraaha samengka-mengkauno.
22 Milolarohira miano da dindaso mpelaroa. 23 Tulumihira miano da paraluu tinulumi kana da moluarako miano mebinta hai bolo langa api. Lolarohira na'anda ko'ira suere miano sawali mimpedagai, ronga mingkokoleaho niweweundo da mosa'o tendenomo kea-keano pinehawa ngkodosa.
Pontutuwino gau
24 Apu Alla da kuasa dagaicomiu kami osie tesube, danta wawakomiu hai ra'ino da tereree ronga mohende sai tekebaako. 25 Te'iaasi pantano Apu Alla da pokosalamakita mentete hai Yesus Kristus Apunto. Apu Allamo da tereree, da owose, da mokora, ronga da kuasa mebinta iponoha, diekana, dungku samengka-mengkauno. Amin.