Ibrani i

Sura nta lako hai miano

Ibrani

Pobetekino Gau

Die sura nta lako hai jema'a miano Ibrani (yahoo miano Yahudi) da parasaeahomo Apu Yesus. Nai mentee inai da moburi, nasai da'a neeho neeno. Patuduno kai poburi, nta pokomorodoakondo'o parasaeando miano da mobasa, kana'umpe ndona mpinakasea dungku te'etedomo nta bintaa parasaeando.

Dahoo otolu kara-kara da nigau die hai sura: Me'asa, i Yesus yahoo Anano Apu Alla da sai tekebaako, da ko'apuako luwuo da da'a die hai wita'ea (1:2). Koie Anano Apu Alla turu'o hai Tamano dungku kai ehe ta'oo luwuo karasai da mobea. I Yesus owo-owose'o ka'iaa raro nabii ronga mala'ekati.

Ko'orua, pohedoano i Yesus kana pua'ima da mesombaako wotoluno kolalo owose ka'iaa pohedoano pua'ima Yahudi. Nangkuamo Apu Alla kai potoro'o « tewali pua'ima'ea da sai tekebaako salemba-lembahino » (7:28).

Ko'otolu, i Yesus toleano Apu Alla hai manusia hi ari mompokoda'a pedandi da kolalo moico (8:6). Apu Yesus da ari huda'ira miano da parasaeaho mebinta hai dosando ronga hai matea tendenomo pohedoano kana pua'ima'ea. Atorano agama Yahudi ronga pesomba sinumbele nai to'ori mompokoda'a salama'a kana koie. Ko'ira atora te'iaasi nunuano salama'a da santo'u-to'u.

Die hai sura dahoo oliwi kato pewiso hai pekolia da pinasadiano Apu Alla (3:10 – 4:11), kato morodo pinehawato okudahio Apu Alla mepelaroa molino (4:16, 10:22), ronga kato osie bubungkuiho parasaeanto hai Apu Yesus.

Hai pasala 11 dahano teburi miano ngko'imani da konee hai miano Israil iponoha da tewali pe'ontoanto miano mparasaea kato nunu to'uo. Hai pasala 12 dahano oliwi kato konianto'u nunu'o Apu Yesus ronga tineiho karasai.

Ihino sura

1. Kuasano Anano Apu Alla (1:1-4).

2. I Yesus owo-owose'o ka'iaa mala'ekati (1:5 – 2:18).

3. I Yesus owo-owose'o ka'iaa nabii Musa (3:1 – 4:13).

4. I Yesus pua'ima'ea da owo-owose ka'iaa pua'ima suere (4:14 – 7:28).

5. I Yesus toleano pedandi da kolalo moico (8:1 – 9:28).

6. Oliwi kato parasaea morodo ronga sabara tineiho karasai (10:19-39).

7. Dadaano parasaea (pasala 11).

8. Toraahando miano mparasaea (12:1 – 13:19).

9. Amala ronga salamu kompura-puraano (13:20-25).