I Yesus pua'ima'eanto
8
1 Pu'uno luwu die da nigauto yahoo: Me'asa pua'ima'eanto da totoro hai muanano kadera mpomokole'ano Apu Alla hai suruga, 2 ronga montompa pesomba hai bolo suo mewota hai kema mpesombaa hai suruga, da ari niweweuno limano Apu, na'iaa manusia.3 Luwu pua'ima'ea da pinotoro nta niweweuno yahoo mowawa pesomba sinumbele ronga pesomba suere hai Apu Alla. Kanamo koie na'ana pua'ima'eanto, koie i Yesus, nai tewali sai hina nta pesombano. 4 Kicanano koie Yesus dahopo die wita'ea, nai da'a mpiha nta tewali pua'ima, kana'umpe dahomo ko'ira pua'ima da mpowawa pesomba kana petena da teburi hai Boku Parentano nabii Musa. 5 Kema mpesombaa dahando mpohedo ko'ira pua'ima te'iaasi gambarano ronga nunuano koie da da'a hai suruga. Iponoha ariomo Apu Alla mo'awaakono i Musa, tempono nta mowangu kema mpesombaa, kanahi, « Peehawa'o, kau weweuho luwu nunu'o gambara hicu ari mo'awaakoko hai otu ntangkeno. »a 6 Sawali diekana-kana pohedoano i Yesus nangkolalo owose ka'iaa pohedoando ko'ira pua'ima nimpia. Kana'umpe koie i Yesus da tewalimo toleano Apu Alla hai manusia, hi ari mompokoda'a boboto'a da kolalo owose, kana'umpe pedandino nangkolalo moico.
7 Kicanano koa'omo pedandi da meri'ou, nai da'amo paraluu kai da'a pedandi ko'orua. 8 Sawali Apu Alla nampasala'o umatino kanahi,
« Mimpeehawa'o, dahoo nta dungku tempono,
dahangku nta moweweu pedandi tonia
hai miano Israil ronga hai miano Yehuda.
9 Nai da'a nta kana pedandi hicu ari moweweuhakondo mbue-mbuedo,
tempongku wawahira meluarako mebinta hai wonua Mesir.
Nasando ungkaario koie pedandicu,
yahomo kasaku padulihira. »
Kanamo koie haratiano Apu.
10 « Diemo pedandi danta niweweungku perumbui hai miano Israil. »
Kanamo die haratiano Apu.
« Dahaku nta dioho parentangku hai bolo mpinehawado,
ronga burio hai bolo mpelaroando.
I'akumo nta tewali Apu Alla Apundo,
ronga i'ira nta tewali umaticu.
11 Nai da'amo nta paraluu kando potisu'ira simbaudo,
atawa mo'awaakondo petilado kanahi,
‹ Kahioomo kami nto'orio Apu Alla. ›
Kana'umpe luwundo owose okidi dahiramo nta to'oriaku.
12 Dahakumo nta lolarohira tendenomo sinalakindo,
Ronga Kuda'amo nta pehawa'o dosando. »b
13 Dadi, ki lako Apu Alla monenee pedandi da tonia, batuano angga'omo koie pedandi mperi'ou motu'aamo. Naamo hapa da motu'a ronga da lembahi, dahoo nta oru tekabu.