Sambahea'a hai wita'ea ronga hai suruga
9
1 Pedandi da meri'ou dahoo atorano sambahea, ronga dahoo kema mpesombaa die hai wita'ea. 2 Suono koie kema da meira'i neeno suo mewota da tinindahako nta tarono Apu Alla. Kokeena dahoo tisa hulu, meda, ronga roti mpesomba. 3 Hai bungkuno pedao ko'orua, dahoo suo da nineehako suo da mewota'ea da tinindahako nta tarono Apu Alla. 4 Kokeena dahoo meda wulaa nta pontunua dupa, ronga dahoo penda poti mpedandi'a da ari tinongoako wulaa upu-upuo. Hai bolono koie poti, dahoo kuro wulaa da ko'ihiako roti manna, tukono i Harun da koririmo,a ronga rua lewe watu dahano teburi hopulu parentano Apu Alla. 5 Hai wawono koie poti, dahoo orua kerub yahoo kadadi ngkopani, peto'ono hicua poo'iahano Apu Alla. Ko'orua'o koie kadadi tewole'o panido olumio wawono koie poti, nte inampuniano dosa. Sawali koie luwu nato to'orimo nta gau'o tee-tee'asa diekana.6 Kanamo koie te'atorono koie kema mpesombaa. Tapio oleo pewiso'andomo ko'ira pua'ima hai suoi ra'i nta padala'o tugasindo. 7 Sawali da sumoo hai larono suo ko'orua te'iaasi pua'ima'ea, te'iaasi asamponoha larono asa ta'u. Ronga nai pewiso ki sai da'a mowawa rea nta pesomba, tendenomo sinalakino pantano, ronga dosando miano da ari niweweundo sai momperadami. 8 Kanamo koie hi pokomentoda'akondo'o Sangkoleono Alata'ala kanahi, solama hi daapo pinake koie kema mpesombaa meri'ou, nai da'apo te'ungkahi sala nta mewiso koie hai suo da mewota'ea. 9 Koie gambara tekonaamo die oleo. Ko'ira pesomba sinumbele ronga pesomba suere da pinesombaako nai tule'i mompokomowua pelaroando miano da mesombaako. 10 Kana'umpe luwu ko'ira atora te'iaasi mekona hai wotoluno miano, kana atorano kinaa, nindo'u, ronga mepokomowua wotolu, nai da'a mekona hai pelaroano miano. Ko'ira atora te'iaasi pinadala dungku kai pokontoniaho Apu Alla dadaano manusia.
I Yesus toleano pedandi da tonia
11 Sawali koie Kristus ariomo leu tewali pua'ima'ea nta atoro'o luwu koie da moico da da'amo. Pewiso'omo hai kema mpesombaa da kolalo owose ronga kolalo moico, na'iaa niweweuno to manusia, batuano pebintaano na'iaa die hai dunia. 12 Ronga koie i Yesus ariomo mewiso hai suo da mewota'ea, ponohasi dungku samengka-mengkauno. Koie tempo, na'iaa reano wembe atawa ana sapi da niwawano, sawali reano wotoluno, kai huda'o dosanto samengka-mengkauno. 13 Nunu'o Boku Parentano nabii Musa, reano wembe ronga tama sapi naamo awuno ana sapi pipitiakondo'o miano da mowuse tendenomo limpakio atorano agama, yahomo pompokomowuando. 14 Lalo'eahopo reano Kristus na'uwohio niweweu da nimateako da dodai hai pinehawato, kato to'ori mesombaiho Apu Alla da tora. Kana'umpe koie Kristus ariomo mesombaako wotoluno da sai tekebaako hai Apu Alla, tendenomo kuasano Sangkoleono Apu da tora samengka-mengkauno.
15 Koiemo sababuno Kristus kai tewali toleano pedandi tonia hai pera miano da ari niboboino Apu Alla, kando to'ori mpo'awa tilarindo da sai hina puraano hindo ari nidandi. Kana'umpe koie Kristus mateemo, ronga nimateakono koie tendenomo nta huda'ira mebinta hai sinalakindo da niweweundo tempono pedandi da meri'ou.
16 Ki da'a sura warisa, paraluu'o kai da'a na'ana buktiino hi matemo koie da ari moburi. 17 Kana'umpe hi daapo tora koie da ari moburi, koie sura nahinapo gunano. Tabea ki matemo koie da ari moburi, yahopo kai koguna. 18 Koiemo sababuno koie pedandi da meri'ou nahinapo pekonaano ki sahinapo rea. 19 Isono koie i Musa mokodungku'akondo'o ko'ira miano Israil luwuo parentano Apu Alla, namo'alaa reano ana sapi ronga tama wembe, kai sampuruakono'o e'e, kai tuduo ewo hisop ronga wulu domba da motaha, yahopo kai pipitiakondo'o koie Boku Haratiano Apu Alla ronga luwuo miano Israil, 20 kai kanahi, « Diemo rea pompokomorodono pedandino Apu Alla hi ari tenakomiu kami nunu'o. »b 21 Kanasi koie tonia ari poweweuno i Musa, kai alaa koie rea, kai pipitio koie kema mpesombaa ronga luwu pokosangkano sambahea'a. 22 Nunu'o atorano Boku Parentano nabii Musa, te'etenopo luwu kai pinokomowuahako rea, deenapo nahina dosa danta inampuni ki sahina rea da niwotui.
23 Koiemo sababuno kema mpesombaa ronga luwu ihino paraluu'o kai pinokomowua kana koie. Kema mpesombaa hai wita'ea te'iaasi gambarano koie da da'a hai suruga. Sawali da pokomowuaho koie da hai suruga yahoo pesomba sinumbele da kolalo moico. 24 Kana'umpe koie Kristus nai da'a mewiso hai kema mpesombaa niweweuno to manusia, da te'iaasi gambarano. Sawali pewiso'ano yahoo hai kema mpesombaa da hai suruga dahano diekana tepora'iakono Apu Alla tendenomo cita. 25 Tapio ta'u, koie pua'ima'ea hai wita'ea mewiso hai suo da mewota'ea mowawa reano kadadi. Sawali koie Kristus nasai manturu mewiso mesombaako wotoluno. 26 Kana'umpe kicanano manturu'o mesombaako wotoluno, batuano tepempi-pempiaho marasai metampu'u isono niweweu die wita'ea. Sawali namentodamo die wotu kompura-puraano, hi arimo leu mesombaako wotoluno asamponoha uwohio dosano to manusia. 27 Ariomo Apu Alla otuhio hi te'iaasi asamponoha manusia koie ki mate, kai ari koie dahomo nta adili'o Apu Alla. 28 Kanamo na'ana koie Kristus, asamponohasi hi ari tewali pesomba tendenomo rongo'o dosando miano me'alu. Sawali ki leu kompenduano, na'iaamo nta mompasipole dosa, te'iaamo nta mokosalama'o miano da totarimaa.