Kristus mesombaako wotoluno
10
1 Koie Boku Parentano nabii Musa te'iaasi nunuano atawa gambarano salama'a danta leu mperumbui. Sawali koie gambara nai pengkena da santo'u-to'uno. Nangkuamo koie Boku Parenta nai to'ori mompokontekona miano da leu mesomba hai Apu Alla, mau ki tapio ta'u sadia leu mpowawa pesomba sinumbeledo. 2 Kicanano ko'ira miano da mpesomba pinokontekonahiramo santo'u-to'uahano, nando da'amo nta momperasa dosando, ronga nando da'amo nta mowa-mowawa pesomba sinumbeledo. 3 Sawali mentoda'ano, koie pesombando tapio ta'u, deena mokompehawa'ira hai dosando, 4 nasahina oleono kai to'ori koie reano tama sapi ronga wembe mo'uwohi dosano to manusia.5 Nangkuamo koie, tempono koie Kristus leu hai wita'ea, kai kanahi hai Apu Alla,
« Nami ehee pesomba sinumbele ronga pesomba suere,
sawali aricomiu pasadia'o wotolungku.
6 Nai moicomiuo ko'ira pesomba ntinunu ronga pesomba po'uwohi dosa.
7 Nangkuamo kaku kanahi,
‹ Diemo I'aku, O Apu Alla!
Kaku leu nta weweuho da po'ehemiu,
kana da teburi hai bolo Boku Haratiamiu mekona hai wotolungku. › »a
8 Isono Apu Yesus koharatia, « Nami ehee pesomba sinumbele ronga pesomba suere. Nai moicomiuo pesomba ntinunu naamo pesomba po'uwohi dosa. » Mainakaa ko'ira pesomba yahoo petenano Boku Parentano nabii Musa. 9 Sa'arino koie kai kanahi penda, « Diemo I'aku! Kaku leu nta weweuho da po'ehemiu. » Dadi, ko'ira pesomba da meri'ou Apu Yesus oninio, kai popo'euhakono'o pesomba wotolu mpantano. 10 Da po'eheno Apu Alla kato tewali miano da tinindahakono, tendenomo hina ari Yesus Kristus mesombaako wotolu mpantano asamponoha, da uwohio dosanto samengka-mengkauno.
11 Tapio oleo ko'ira pua'ima mentade padala'o tugasindo nte montompa pesomba sinumbele da sadia mengkena, sawali nahina da tule'i mo'uwohi dosa. 12 Sawali Apu Yesus namponohasi montompa pesomba da uwohio dosa dungku samengka-mengkauno. Sa'arinomo kai totoro hai muanano Apu Alla. 13 Diekana Apu Yesus totarimaa wotuno dahano Apu Alla nta paturu'ira musuno hai tonto ngkaruno. 14 Dadi, te'iaasi me'asa pesombano koie Apu Yesus, kai pokontekonahira pera miano da inuwohi dosando dungku samengka-mengkauno.
15 Ronga koiemo da ari tinulurano Sangkoleono Alata'ala kanahi,
16 « Diemo pedandi danta niweweungku hai ira,
oleo perumbui danta leu.
Dahaku nta dioho parentangku hai bolo mpelaroando,
ronga burio hai bolo mpinehawado. »
Koiemo haratiano Apu.b
17 Kai koharatia penda Apu Alla, « Naku da'amo nta mompeehawa dosando ronga niweweundo da mosa'o. »c 18 Batuano, ki te'ampunimo dosando ronga niweweundo da mosa'o, nai da'amo paraluu mowawa pesomba sinumbele.
Sabara tineiho karasai
19 Dadi, raro mpetilaku, diekana nato da'amo montangkoro mewiso hai suo da mewota'ea tendenomo reano Yesus, 20 kana'umpe hina arimo moweweu sala da tonia da potorakita ronga da wawakita laahio pedao, yahoo wotolu mpantano. 21 Iaamo pua'ima'eanto da mo'atoro hai rahano Apu Alla. 22 Nangkuamo koie, kahioomo kato okudahio Apu Alla mepelaroa molino ronga parasaea morodo. Kana'umpe pelaroanto da mosa'o ariomo pinipitiako reano Kristus kai uwohio sinalakinto, ronga wotolunto ariomo nibaho'ako e'e da molino. 23 Tompe'ungkaamo kai morodo dahanto momperahi-rahi, kana'umpe Apu Alla hi pedandi dahoo nta pinarasaea. 24 Ronga moicoomo kato mpekapepeehawa, ronga mpekatumbu-tumbusi kato pekalola-lolaroako da moico. 25 To'osie mongare mentepo'awa sambahea, kana biasando meha miano, sawali kahioomo kato mpeka'oli-oliwi, lalo'eahopo hi sa'oku-okudanomo nta leuhano Apu.
26 Kana'umpe kito pomperadami moweweu ngkaida'a dosa, mainakaa toto'oriomo pompotisu da menona, nahinamo penda pesomba sinumbele nta po'uwohino dosanto;d 27 da tinotarimanto te'iaamo pe'adili'ano Apu Alla da pinengiri-ngiri'ako, ronga api da mewea nta petunuando miano da daluo Apu Alla. 28 Miano da sai ehe monunu Boku Parentano nabii Musa, koie miano pinepatee nai po'awa pololaro, ki koa orua atawa otolu miano da saksii'o hi tesala. 29 Lalo'eahopo nta mobea hukumano miano da poko'anu-anuo Anano Apu Alla, da angga'o mowuse koie rea mpedandino Apu Alla da mompokomowua dosano, ronga da paruruo Sangkoleono Apu pu'uno pompeehawa. 30 Kana'umpe toto'oriomo Koie da koharatia, « I'aku da kohaku, dahaku nta mowolohi. »e Ronga penda: « Apu danta adili'o mianono. »f 31 Taperano mongiri ki lako konaa hukuma mebinta hai limano Apu Alla da tora.
32 Mimpehawa'o dadaamiu da ari tealo. Daanopo molinyaa pelaroamiu tendenomo pompotisu da menona, dakomiupo sabara tineiho karasai da me'alu. 33 Dahoo dahamiu nte pinoko'anu-anu ronga pinakasea hai ra'indo miano me'alu. Dahoo penda dahamiu nte itai marasaihakondo miano da niweweuhako kana koie. 34 Nte itaicomiumo mepoe-poe'akondo laro miano da tetorungku, ronga hi nirampasi hapa-hapamiu, mintineiho koie kadadia ronga mohende laromiu, kana'umpe mina nto'orio himi daasi mpodio tilarimiu da kolalo ko'angga, da taha mengkau. 35 Nangkuamo koie, paraluu'o kai sadia morodo pelaroamiu, kana'umpe dahamiumo nta mo'awa tilari da owose. 36 Danta paraluu niweweumiu diekana yahoo sabara, kami nto'ori nunu'o da po'eheno Apu Alla, dahamiumo nta montarima hapa da ari pedandino. 37 Kana'umpe hai bolo Boku Haratiano Apu Alla dahoo teburi,
« Nai da'amo nta mengkau mpiha, Koie da tinotarima kai leu.
Nai da'amo nta teboli'i tadohano hi daa nta leu.
38 Ronga mianongku da tekona dahoo nta tora tendenomo parasaea,
sawali inai da bubungkuihaku, naku ehee. »g
39 Cita die na'iaa miano da bubungkuiho Apu Alla kato binasa. Sawali yahoo da parasaeaho kato pinokosalama.