Pua'ima Melkisedek
7
1 Koie i Melkisedek yahoo mokoleno kota Salem ronga pua'ima da montompa pesombano miano hai Apu Alla da montoe. Tempono koie i Ibrahim mohule ari lako mamusu nonangihira mokole, lako'omo koie pua'ima Melkisedek lawa'o ronga barakati'o. 2 Yahopo koie i Ibrahim kai poweeho i Melkisedek tila hopuluno hapa-hapa da ari nirampasino.a Koie Melkisedek batuano « mokole da adili ». Ronga penda « mokole da momapu larono », kana'umpe « Salem » batuano « momapu laro ». 3 Nahina tulurano ki daa tamano, tinano, atawa pembue'ano. Nai tino'ori kai tehina ronga kai mate. Hina pinokompengkena Anano Apu Alla, yahomo kai tewali pua'ima samengka-mengkauno.b4 Mimpeehawa'omo hi owose te'anggano koie i Melkisedek, dungku koie mbueto, i Ibrahim, kai pesombaako tila hopuluno da ari nirampasino hi ari lako mamusu. 5 Hai larono Boku Parentano nabii Musa ariomo pinatantu hicua pua'ima turunano miano Lewi danta mpontarima tila hopuluno hasili inu'ungkeno miano Israil, mau petila asa nturunando mebinta hai Ibrahim. 6 Koie i Melkisedek na'iaa turunano miano Lewi, sawali namontarimasi tila hopuluno nirampasino i Ibrahim, ronga barakati'o, mainakaa i Ibrahim da arimo tarimaa dandino Apu Alla. 7 Menonaa, nai tewali megagahiakono miano da mopobarakati hi owo-owose ka'iaa da nibarakati. 8 Ko'ira pua'ima da montarima tila hopuluno hasili dahirasi nta mate, sawali kanahino Boku Haratiano Apu Alla, i Melkisedek da itai montarima, dahosi tora, nai da'a mate. 9 Ko'ira miano Lewi da kohaku montarima tila hopuluno hasili, sawali tewalio kito kanahi, me'itaihiramo miano Lewi mompoweehi hai Melkisedek, tempono i Ibrahim moweeho tila hopuluno da ari nirampasino. 10 Kana'umpe mau ki sai da'apo tehina i Lewi koie tempo, tewalio kito kanahi, itaihomo koie i Lewi mompoweehi, tempono i Melkisedek tepo'awaakono i Ibrahim pembue'ano i Lewi.
Kristus yahoo pua'ima da owo-owose ka'iaa i Harun
11 Tempondo miano Israil pinoweehi koie Boku Parentano nabii Musa, Apu Alla potoro'ira leeno i Lewi tewali pua'ima. Ko'ira pua'ima turunano i Lewi nando to'ori mompokontekona miano hai ra'ino Apu Alla, yahomo kai paraluu da'a pua'ima suere da tewiso hai golongano i Melkisedek, da sa'iaa leeno Harun.c 12 Ki niboli'i atorano pua'ima, matantuomo boku parentano agama paraluu'o kai niboli'i na'ana. 13 Patuduno koie yahoo Apu Yesus Apunto, namebinta hai suere suku, ronga nahinapo te'asa miano sukuno da ari tewali pua'ima. 14 Luwu miano ndoto'orio hicua suku Yehuda pebintaano Apu Yesus; ronga koie i Musa nai paisa mogau mekona hai pua'ima da mebinta hai suku Yehuda.
15 Da nigau koie dahomo nta kolalo mentoda, ki sabamo pua'ima da tonia, da kana i Melkisedek. 16 Kai inengka tewali pua'ima na'iaa tendenomo atora mekona hai pembue'ano, sawali tendenomo kuasa toraahano da sai hina puraano. 17 Kana'umpe nangkanahi hai bolo Boku Haratiano Apu Alla,
« Co'omo pua'ima nta samengka-mengkauno,
da tewiso hai golongano pua'ima Melkisedek. »d
18 Dadi, diekana tekabuomo atora da mengkau, kana'umpe nai mokora ronga nahina gunano. 19 Nahina miano da to'ori pinokontekonano atorano Boku Parentano nabii Musa, kai osie da'a kinebaakoano. Nangkuamo diekana kato pinoweehi me'asa pomperahi-rahia da kolalo moico, kato to'ori okudahio Apu Alla.
20 Naamo penda tempono i Yesus pinotoro tewali pua'ima, pesumpa'omo Apu Alla. Nahina sumpa da kana koie tempondo mempinotoro pua'ima turunano i Lewi da mperi'ou. 21 Sawali tempono i Yesus pinotoro, dahoo sumpano Apu Alla kanahi:
« Apu ario mesumpa,
ronga nai da'a nta teboli'i da inotuhino:
‹ Co'omo pua'ima nta samengka-mengkauno. › »e
22 Kanamo koie Apu Alla dandicita da kolalo moico, ronga i Yesus da tewali pe'ungkaa'anto.
23 Dahoo penda da suere: iponoha pua'ima Lewi me'aluo, kana'umpe kindo mate, nando da'amo nta to'ori padala'o tugasindo, yahomo kai pinopo'eu. 24 Sawali koie i Yesus nantora ngkaida'a, dadi tugasino nai polinca hai miano suere. 25 Nangkuamo koie, kai sadia tule'i pokosalama'ira miano da leu hai Apu Alla mentete hai Iaa, hina ntora ngkaida'a ronga me'e'etaakondo miano hai Apu Alla.
26 Koiemo i Yesus pua'ima'ea da pinaraluukinto, da tinindahakono Apu Alla, nahina pinosala'iano ronga tekebaakoano. Tesincaa mebinta hai miano madosa ronga monto-montoehopo ka'iaa luwuo ihino suruga. 27 Koie i Yesus nando mpengkena ko'ira pua'ima mehano, da tapio oleo mowawa pesomba sinumbeledo, da meri'ou sinumbeledo tendenomo dosando pantado, ronga merumbui sinumbeledo tendenomo dosando suere miano. Koie i Yesus asamponohasi hi ari mowawa pesombano koa'omo samengka-mengkauno, nangkua wotoluno hi ari mesombaako. 28 Boku Parentano nabii Musa mompotoro miano da modengke kai tewali pua'ima'ea. Sawali perumbuino, Apu Alla pesumpa'omo hi daa potoro'o Anano kai tewali pua'ima'ea da sai tekebaako salemba-lembahino.