6
1 Nangkuamo koie, to'osie duduhi ngkaidaaho koie pompotisu dadaano Kristus da meri'ou, sawali moicoomo kato tianio pompahato kato tewali miano nto'ori. To'osie mo'ulangi pompotisu mperi'ou mekona hai dadaano toba, yahoo boli'io niweweu da nimateako, ronga parasaeaho Apu Alla. 2 Atawa pompotisu dadaano mobaho miano da parasaea, dampasako pele mobarakati miano, dadaando miano mate hi mpewangu, atawa hukuma da sai hina puraano. 3 Ki po'eheno Apu Alla, dakita ico nta tianio pompotisuto kana koie.4 Sawali kana'umpe nta dadaando miano da bintaamo da ari pinarasaeando? Iponoha pelaroando ariomo pinokomolinyaa, arihiramo menasaa pompoweehi mebinta hai suruga, arihiramo tarimaa Sangkoleono Alata'ala. 5 Ndoperasa'omo moicono haratiano Apu Alla, ronga kuasano oleo danta leu. 6 Sawali perumbuino, kindo pehapuihomo Apu Yesus, nahinamo oleono kando niwawa mbule kando toba. Kana'umpe niweweundo pengkenaamo hindo pokomarugi'o wotolundo, hindo basiropaa mbule Anano Apu Alla ronga poko'anu-anuo hai ra'indo miano me'alu.
7 Kana'umpe wita nte tuduano usa, kai tora pinombula da koguna hai patani, koie wita dahoo nta barakati'o Apu Alla. 8 Sawali wita tinoraino keu ngkoriu ronga ewo ngkoriu, nahina nta gunano. Okudahiomo tinundariano, kompura-puraano kai tinunu.
9 Yahoo deena, comiu petila nilolarongku, mau kico pogau kana koie, matantuomo, dahosi tilarimiu da kolalo moico danta sinalama'ako. 10 Adili'o Apu Alla, nai paisa kolumpee pohedoamiu ronga poloumiu hai Iaa, himi ntulumihira miano mparasaea mebinta iso-iso dungku diekana. 11 Mokeakami kako ontoo santo'u-to'uno kai dada'iaangkosi pontulumimiu miano dungku kompura-puraano, kai matantu to'u himi daa nta awaa hapa da tinotarimamiu. 12 Mi'osie mongare, sawali nunu'omo poweweundo ko'ira miano da mo'awa tilari da pedandino Apu Alla, tendenomo parasaeando ronga sabarando.
Pedandino Apu Alla nai teboli'i
13 Kana'umpe tempono Apu Alla medandi'akono i Ibrahim, kai pesumpa'ako wotoluno Apu Alla, kana'umpe nahina da pokulaloiho owose. 14 Kai koharatia, « Santo'u-to'uahano, dahaku nta moweeko barakati da me'alu ronga pokonte'ule'o turunau kai me'alu. »a 15 Hina sabara koie i Ibrahim metotarima, yahomo kai awaa hi ari dandi'o Apu Alla. 16 Kana'umpe miano hi pesumpa, dahoo nta mesumpa'ako da owo-owose ka'iaa wotolu mpantano. Koiemo sumpa da pokomokoraa hapa da kanahino, ronga da poko'ari-ario da tineposala'ako. 17 Nangkuamo koie, kai pesumpa na'ana Apu Alla hi pedandi, kai pokomenteehakondo'o miano da ari nidandino, hi sai da'a nta koboli-boli'i patuduno. 18 Pedandino ronga pesumpano Apu Alla nai to'ori teboli'i, nasahina oleono kai to'ori mekulepi Apu Alla. Nangkuamo koie, kai moroso pelaroanto, hitona leu mehonda hai Iaa, ronga me'ungkaa morodo dahanto momperahi-rahi. 19 Pomperahi-rahinto koie kanamo mata kaino bangka da morodo, kanamo pe'ungkaato da morodo sai molelu hai larono toraahanto. Koie pomperahi-rahi laahio pedao da hai raha mpesombaa mewiso hai suo da mewota dahano Apu Alla.b 20 Koie i Yesus pewiso'omo kokeena meri'ouhakita. Ronga tewaliomo pua'ima'ea samengka-mengkauno, da tewiso hai golongano pua'ima Melkisedek.