5
1 Pera pua'ima'ea nirurukino Apu Alla mebinta hai manusia, ronga inengka kai tewali toleado hai Apu Alla. Tugasino yahoo mowawa pesomba sinumbele ronga pesomba suere tendenomo dosa. 2 Koie pua'ima nai tewali sai to'orio dadaano miano da sai hina tino'orino ronga miano da tuuna hai dosa, kana'umpe mau iaa pantano, me'aluo dahano sai koa. 3 Nangkuamo kai paraluu montompa pesomba da sinumbele tendenomo dosano miano, ronga dosa wotolu mpantano. 4 Nahina miano da ari tisu'o wotoluno kai tewali pua'ima'ea. Koie da tewali pua'ima'ea, te'iaasi miano da niboboino Apu Alla, kana koie i Harun.5 Kanamo na'ana koie Kristus nai da'a mepoko'owose mpanta ronga metisu mpanta kai tewali pua'ima'ea. Sawali Apu Alla da tisu'o kanahi,
« Co'omo Anaku,
die oleo I'akumo Tamau. »a
6 Hai ayati suere, Apu Alla koharatia,
« Co'omo pua'ima nta samengka-mengkauno,
da tewiso hai golongano pua'ima Melkisedek. »b
7 Daano tora kana manusia koie i Yesus, ario amala ronga me'e'eta, kai daa mewowo naamo monturupako luu hai Apu Alla da to'ori pokosalama'o hai matea. Tendenomo hi pangkuku, kai pinodea pe'e'etano. 8 Koie i Yesus menonaa Anano Apu Alla, sawali dahosi na'ana marasai nangkua nta pepopotisu'ano turu hai Apu Alla. 9 Sa'arino lolohio koie karasai, yahopo Apu Alla kai pokontewalio Gurusalama da sai tekebaako, pu'uno salama'a samengka-mengkauno hai pera miano da nunu'o po'eheno. 10 Ronga Apu Alla potoro'o tewali pua'ima'ea da tewiso hai golongano pua'ima Melkisedek.
Osie bintaa da pinarasaeanto
11 Dahopo me'alu kodaa nta motisukomiu mekona hapa da ari niburincu, sawali mohalio nta tarangkaniano, hina sami ehe oru paha'o. 12 Santo'u-to'uahano, dungku'omo tempono tewaliamiu guru, sawali dahopo paraluu kami mpinotisu, kami nto'orio pompotisu da mobuna mebinta hai haratiano Apu Alla. Nami da'apo tule'i mongkaa kinaa da motea, te'iaapo susu isala. 13 Miano da suusu dahopo mo'ana'ate, nai da'apo to'orio da tekona atawa da tesala. 14 Kinaa da motea taronomo miano nto'ori, batuano da tekoneamo menasaa maina da moico ronga da mosa'o.