Pekolia pinasadiano Apu Alla
4
1 Pedandino Apu Alla dahopo nta rodakita hito daa nta mewiso hai pekolia da pinasadiano. Nangkuamo koie, moicoomo kato mpedagai, kai osie da'a hai comiu te'asa miano da sai telau mewiso koie hai pekolia. 2 Kana'umpe koie Lele Mohende ariomo pinokodungku hai cita, kanasi hai ira miano mperi'ou. Sawali nasahina gunano hai ira, kana'umpe nasando ehe parasaea da pinodeando. 3 Dadi icita hitona mparasaea, dakita nta mewiso koie hai pekolia da kinanahiino Apu Alla:« Tendenomo sa'o larongku, yahomo kaku petunda kanahi,
‹ Nando da'a nta mewiso hai pekolia da pinasadiaku. › »a
Santo'u-to'uahano, koie pekolia dahomo sadia sa'isono pinadadi die wita'ea. 4 Kana'umpe dahoo teburi hai bolo Boku Haratiano Apu Alla mekona hai oleo ko'opitu kanahi, « Kai pekoli Apu Alla oleo ko'opitu, hina arimo luwu pohedoano. »b 5 Unino koie ayati tonia, « Nando da'a nta mewiso hai pekolia da pinasadiaku. » 6 Dadi, ko'ira da mperi'ou modeaho koie Lele Mohende nando mpo'awa pekolia, hina sando ehe nunu'o po'eheno Apu Alla. Kicana koie, mentoda'omo hindo daa suere miano danta awaa koie pekolia. 7 Yahomo Apu Alla kai pompatantu me'asa oleo suere nta mewiso hai pekoliano, da meneehako « die oleo. » Perumbui'eapo kai pokomentoda'akita'o hi ari koharatia hai nabii Daud kanahi,
« Die oleo, kimi mpodeaho suarano,
mi'osie pokomokoraa laromiu. »c
8 Kana'umpe ki daamo ari i Yosua wawahira mpewiso hai wonua mpekolia, nai da'amo Apu Alla nta kanahi hi daapo me'asa oleo da suere. 9 Dadi, dahopo me'asa oleo mpekolia da sadia tarono umatino Apu Alla. 10 Kana'umpe miano da mewisomo hai pekolia da ari nidandino Apu Alla, dahoo nta mekoli mebinta hai pohedoano, kana Apu Alla mekoli mebinta hai pohedoano. 11 Nangkuamo koie, kahioomo kato pekora usaha kato pewiso koie hai pekolia. Osie da'a te'asa miano da sai mewiso, tendenomo sai nunu'o po'eheno Apu Alla, kana ko'ira miano iponoha.
12 Kana'umpe koie haratiano Apu Alla toraa ronga makuasaa. Mongkasoo ka'iaa tobo da komata mpatimbali, ronga ki pe'uhu, dungku'o omputa ronga unto, naamo dungku'o penaa ronga sangkoleo, naamo to'orio pekirinto ronga ihi mpelaroanto da moico ronga da mosa'o. 13 Nahina te'asa da tewuniako hai ra'ino Apu Alla. Luwuo tewoleiho ronga te'ungkahio hai ra'ino. Ronga hai Iaamo dahanto nta dudunduo luwu niweweunto.
I Yesus pua'ima owose
14 Nangkuamo koie, kato ungkaari'eaho parasaeanto da inakuito. Kana'umpe dahomo pua'ima'eanto da ari tealo laahio langi kai dungku hai suruga, yahoo Yesus Anano Apu Alla. 15 Akoie pua'ima'eanto, na'iaa pua'ima da sai to'ori merasa'akita'o pera kakuranganto, deenapo ari sinoba-soba kana die cita, te'iaasi hina sai poweweu dosa. 16 Yahomo koie, kai morodo pinehawato okudahio kadera mpomokole'ano Apu Alla dahano pompeehawa, kato awaa pontulumi koa wotuno, tendenomo pololarono icita ronga pompeehawano.