Owo-owose'o i Yesus ka'iaa i Musa
3
1 Raro mpetilaku, da ari niboboino ronga tinindahakono Apu Alla, mimpekiriomo koie i Yesus, rasulu ronga pua'ima'ea da inakuito, 2 taperano konianto'u hai Apu Alla da ari tisu'o kai pohedo, kanasi i Musa iponoha konianto'uno mohedo hai laicano Apu Alla, batuano umatino. 3 Sawali i Yesus pantasio kai po'awa angga da owo-owose ka'iaa i Musa. Kana'umpe miano da mowangu laica pantasio kai po'awa angga da kolalo owose ka'iaa anggano koie laica. 4 Menonaa, luwu laica dahoo da ari wanguo, sawali da ari wanguo luwu ihino wita'ea yahoo Apu Alla. 5 I Musa konianto'uo kana miano mpohedo hai laicano Apu Alla, ronga moleleako hapa danta kanahino Apu Alla oleo danta leu. 6 Sawali Kristus hicua Ana da konianto'u da kapalaiho laicano Apu Alla. Kito pe'ungkaa morodo hai parasaeanto ronga pinerahi-rahinto da nimohende'akonto, citamo koie ihi laicano Apu Alla.Mehapuiho Apu Alla
7 Nangkuamo koie, kana da ari kanahino Sangkoleono Alata'ala,
« Die oleo, kimi mpodeaho suarano,
8 mi'osie mokomokoraa laromiu,
kana ira mbuemiu iponoha,
daano motea rapando hai Apu Alla ronga soba'o hai tonga lueno papawu.a
9 Na'icomo ariando mbuemiu sobai'aku ronga totandaihaku,
mau hindo ontoo kuasangku larono pato pulu ta'u mengkauno.
10 Nangkuamo koie, kai mosa'o larongku,
kaku kanahi, ‹ E'elenguando mehapuihaku,
nando ehe nunu'o po'ehengku. ›
11 Tende mosa'ono larongku yahomo kaku petunda kanahi,
‹ Nando da'a nta mewiso hai pekolia da pinasadiaku. › »b
12 Mimpedagai, raro mpetilaku, kai osie da'a miano hai comiu da mepelaroa ngkabaria ronga sai parasaea, dungku kai bubungkuiho Apu Alla da tora. 13 Dadi, kai osie da'a miano da pinokomporeno dosa, dungku kai mokora larono, moicoano kami mpeka'oli-oliwi koa oleo himi daapo tora hai larono da nineehako, « die oleo ». 14 Kana'umpe cita die pono-ponohaakono Kristus, kito ungkaari to'uosi parasaeanto, mebinta iso-iso dungku kompura-puraano. 15 Kana da teburi hai bolo Boku Haratiano Apu Alla,
« Die oleo, kimi mpodeaho suarano,
mi'osie mokomokoraa laromiu,
kana ira mbuemiu iponoha
daano motea rapando hai Apu Alla. »c
16 Inaihira da modeaho suarano Apu Alla kai motea rapando? Na'iaa bara ko'ira miano da niwawaino i Musa mpeluarako mpebinta hai wonua Mesir? 17 Ronga hai nai mosa'oano larono Apu Alla pato pulu ta'u mengkauno? Na'iaa bara ko'ira da madosa da menterambahako maeatido hai tonga lueno papawu? 18 Ronga inai da ari tinundarino Apu Alla kando osie mpewiso hai pekolia da pinasadiano? Na'iaa bara ko'ira miano da sai nunu'o po'eheno? 19 Dadi, topaha'omo sababuno kasando to'ori mpewiso, tendenomo hina sando mparasaea.