Salama'a da owose
2
1 Nangkuamo koie, kahioomo kai tetiani pompeehawato pompotisu da ari pinodeanto, kato osie bintaa da inungkaarinto. 2 Koie haratia da ari pinokodungkuno mala'ekati menona to'uo,a ronga miano da sai monunu atawa limpakio, dahoo nta mo'awa hukuma kana niweweuno. 3 Lalo'eahopo icita, ki sato padulio koie salama'a da owose, dakita bara nta tepulosi hai hukuma? Kana'umpe da iso-iso leleako koie salama'a yahoo Apu Yesus, yahopo ko'ira miano da modeaho mokodungku'akita'o hi menona. 4 Ronga Apu Alla pokomenteeho menonano koie da kanahindo, yahomo kai pompokoda'a pera giuno peto'o tinekangkaako ronga titila'akondo'o kuasano Sangkoleono Alata'ala kana da po'eheno.Apu Yesus polomba sala salama'a
5 Ko'ira mala'ekati nando da'a pinoweehi kuasa mebinta hai Apu Alla kando parentaa dunia danta leu da nigauto. 6 Kana'umpe dahoo haratiano Apu Alla teburi hai bolo boku kanahi,
« O Apu Alla, manusia koie yo hapa, kami ehe meehawa'o?
Miano koie yo hapa, kami lalo'ea padulio?
7 Asantonia aricomiumo poko'owawa'o ka'iaa mala'ekati.
Yahopo kami mpoweeho totoro'a da te'angga ronga tereree.
8 Kami mpaturu'o pera luwu hai tonto ngkaruno. »b
Kito kanahi, ariomo Apu Alla paturu'o pera da da'a hai tontono, batuano koie, nahina te'asa da sai kinuasaino. Sawali diekana, nato da'apo ontoo to manusia hi kuasaiho luwu da da'a. 9 Deena da inontonto yahoo koie i Yesus, hi ari asantonia pinoko'owawa ka'iaa mala'ekati. Diekana to'ontoomo hi pinoweehi totoro'a da te'angga ronga tereree, kana'umpe na'arimo marasai dungku tawe. Tendenomo pompeehawano Apu Alla to manusia kai mateakondo pera miano.
10 Apu Allamo da ari mompokodadi pera ihino wita'ea nunu'o patuduno pantano. Dadi, pantasiomo kai pokomarasaiho i Yesus kai pokontewalio Gurusalama da mondo'ako kamoico. Kanamo koie carano Apu Alla mo'o'alahi miano kai me'alu, kando tewali anano danta merongaa Apu Yesus hai pinoko'owose'ano. Kana'umpe Iaamo da mata ungkahio sala salama'a.
11 Kana'umpe kanapo Iaa da mo'uwohi dosa ronga ira da inuwohi dosando, me'asa'omo tamando. Nangkuamo koie, kasai mokoko'anu i Yesus neehakondo'o petilano. 12 Kanahino,
« Dahaku nta leleako neemiu hai ira petilaku,
ronga nta rereekomiu hai tongano jema'a. »c
13 Naamo penda kanahino,
« Dahaku nta momperahi-rahi hai Apu Alla. »
Ronga penda,
« Santo'u-to'uno, diemo I'aku ronga di'iramo anaku hi ari Apu Alla moweehaku. »d
14 Ko'ira da nineehako anano yahoo manusia da kowotolu. Yahomo na'ana koie i Yesus kai tewali manusia kando mpengkena. Kana'umpe laro mateahano, dahanomo mokobinasaa ponggawano bilisi, da ungkaario kuasano mateaha. 15 Nangkuamo kai kana koie, kai to'ori bintanihira miano da tepo'ata hindo daa tora, tendenomo momee mate. 16 Santo'u-to'uahano, na'iaa mala'ekati da pineehawano, sawali nangkua leeno i Ibrahim. 17 Nangkuamo kai paraluu koie i Yesus kando mpengkena ko'ira petilano hai luwu dadaano, kai tewaliakondo pua'ima'ea pontompa pesomba da konianto'u ronga kopololaro hai ra'ino Apu Alla, dungku kai tekikihi dosando to manusia. 18 Tendenomo hi ari marasai ronga sinoba-soba, yahomo kai tule'i montulumi miano da sinoba-soba.