Sura nta lako hai miano
Ibrani
Apu Alla mogau'akita metolea hai Anano
1
1 Metampu'u iponoha me'aluo carano Apu Alla hi nte mogau'akondo mbueto metolea hai ira nabii. 2 Sawali perumbuino die, Apu Alla kai pogau'akita metolea hai Anano. Koie Anano yahoo penteteanomo kai padadio die wita'ea. Yahomo Apu Alla kai potoro'o Anano tewali da ko'apuako luwuo da da'a. 3 Iaamo niwincano kuasano Apu Alla da owose, ronga gambara wotoluno da santo'u-to'uno. Iaamo da tondeteakono'o haratiano da kuasa pera da da'a. Sa'arinomo uwohiakondo'o dosando miano, yahopo kai totoro hai muanano Apu Alla da kuasa'ea hai suruga, 4 kolalo montoe ka'iaa ko'ira mala'ekati, kanasi penda neeno hi ari Apu Alla moweeho kolalo te'angga ka'iaa neendo ko'ira mala'ekati.Anano Apu Alla kolaloo te'angga ka'iaa mala'ekati
5 Kana'umpe nai paisa koharatia Apu Alla hai te'asa mala'ekati kana hi ari koharatia hai Anano,
« Ico'omo Anaku;
die oleo I'akumo Tamau. »a
Kai koharatia penda mekona hai Anano,
« I'akumo danta tewali Tamano,
ronga Iaamo danta tewali Anaku. »b
6 Ronga tempono Apu Alla tiihako koie Ana ntetukakano die hai wita'ea kai koharatia:
« Luwu mala'ekatino Apu Alla kahioomo kando mpesombaiho. »c
7 Mekona ko'ira mala'ekati, kanamo die haratiano Apu Alla,
« Kupokodadihiramo mala'ekati tewali ngalu,
ronga ata ntinenaku tewali langa api. »d
8 Sawali mekona hai Anano, Apu Alla koharatia,
« Kadera mpomokole'au, O Apu Alla, nahina kompura-puraano.
Ronga pomparentaau mongkotee.
9 Da tekona yahomo da po'eheu,
ronga da mosa'o yahomo da kinokoleau.
Nangkuamo koie, kai tisuko Apu Alla Apuu tewali mokole,
kau kolalo mohende ka'iaa simbau'u. »e
10 Koharatia'omo penda Apu Alla,
« Comiu Apua, da iso-iso weweuho die wita'ea,
ronga langi yahoo niweweu limamiu.
11 Luwuo koie dahoo nta lono,
dahoo nta morane kana pakea.
Sawali Icomiu nta moo'ia ngkaida'a.
12 Wita'ea ronga langi dakomiu nta lulumio kana babu,
nta popo'euho kana pakea.
Sawali Icomiu nami mpaisa nta teboli'i,
ronga ta'uno toramiu nahina puraano. »f
13 Apu Alla nai paisa koharatia hai te'asa mala'ekati kana hi ari koharatia hai Anano,
« Totoromo hai muanangku,
dungku pera da daluko Kudiohira hai tonto karu'u. »g
14 Na'iaa bara ko'ira mala'ekati sangkoleo ntinenano Apu Alla da montulumi miano danta mpo'awa salama'a?