Oliwi kai konianto'u parasaea
12
1 Me'aluo ko'ira saksii kana seru da tongokita, yahoo miano mperi'ou da parasaea. Nangkuamo koie, kahioomo kato hawiako luwu nirongo, ronga dosa da bebeaticita, kato konianto'u mekora mekalulu hai petandia da nirora'into. 2 Tope'ontomo hai Yesus, da meri'ou lombaakita'o sala ronga da pokongkoa'akita'o parasaeanto kai moroso. Tineiho karasai hai keu mpinotalambe ronga nai pompaduli ko'anu, tendenomo hina nta mohende oleo perumbui. Ronga diekana totoro'omo hai muanano kadera mpomokole'ano Apu Alla.3 Ndoka topehawa'o karasaino Apu Yesus daano morora'i miano ngkodosa da daluo, kato osie modengke mpinehawa ronga tekura. 4 Kana'umpe laro mporora'iamiu bali'o dosa, nami mpaisapo monturupako rea. 5 Mi'osie kolumpee die oliwino Apu Alla, hi ari oliwicomiu kana-kana anano kanahi,
« O anaku, osie sai padulio, ki potisu'ako'o sa'o larono Apu,
ronga osie okidi larou, ki pokompehawako.
6 Kana'umpe nawosu'o da nilolarono,
ronga rasaiho pera da inanggano anano. »a
7 Kahioomo kami ntineiho powosuno Apu Alla, kana me'asa miano motu'a da wosu'o anano. Kana'umpe nahina te'asa anadalo da sai niwosuno miano motu'ano. 8 Kana'umpe ki sami itai niwosu kana luwu anadalo suere, koie icomiu kana to'u ana da sai hina tamano, na'iaa ana mpine'ihi. 9 Die hai wita'ea dahoo tamanto danta wosukita kito tesala, yahomo kato pa'angga'o. Lalo'eahopo Tamanto Apuno sangkoleo, kato kolalo nunu'o po'eheno ronga awaa toraaha. 10 Miano motu'anto te'iaasi wosukita te'asantonia, nunu'o da po'anggado moico. Sawali Apu Alla nawosukita kato awaa da moico, kai itai molinyaa pelaroanto kana molinyaano pelaroano Apu Alla. 11 Menonaa, kito niwosu nai moicontoo koie wotu, te'iaasi mompokomopoe laro. Sawali perumbuino, icita da ari pinotisu'ako wosu, teboli'icitamo mpoweweu da tekona, ronga momapu laronto.
12 Nangkuamo koie, pokomorosoo limamiu da modengke ronga tuumiu da bibi. 13 Ronga pokoneahomo karumiu lolako hai sala da mongkote merete, kai osie te'olida karumiu da motince, sawali kai tidomo.
14 Kahioomo kami ntepokonaakondo luwu miano, ronga kai molinyaa pelaroamiu, kana'umpe nahina miano danta ontoo Apu, ki sai molinyaa pelaroano. 15 Mimpeehawa'o kai osie te'asa miano da sai mo'awa pompeehawano Apu Alla, kai osie da'a miano da kana ewo ngkoratu hai tongamiu da mompokomohitu ronga mompokomowuse miano me'alu. 16 Dagai'o kai osie da'a te'asa miano da endeo, atawa da sai haragai'o da ko'angga hai ra'ino Apu Alla, kana koie i Esau, da balu'o kantetukakaano tendenomo asa piri kinaa. 17 Kana'umpe minto'oriomo, perumbuino mokeaho mo'awa barakati, sawali nasai tinarimamo. Nahinamo dahano nta boli'io sinalakino, mau ki u'ungkee ronga wowo.
Osie bubungkuiho Apu Alla
18 Kana'umpe nami da'a leu hai tangkeno da tule'i hinenderi, dahano kolanga-langa api, kana miano Israil iponoha.b Nami da'a leu tepora'iakono rondoma mpusu, ngalu da mokora, 19 ronga mompodea unino torompe ronga suara da owose, kana da ari pinodeando miano Israil, kando mpe'e'eta kai osiemo Apu Alla mogau'akondo. 20 Kana'umpe nasando taha'o mompodea koie parenta kanahi, « Mau pinotuwu da henderio koie tangkeno, nai tewali sai niwatui dungku kai mate. »c 21 Taperano pinomeetako koie da inontondo, nangkuamo kai kanahi i Musa, « Taperangku bibi momee. »d
22 Sawali dahamiu leu yahoo hai tangkeno Sion, kota poo'iahano Apu Alla da tora, yahoo Yerusalem da hai suruga, dahando tepoporewu-rewu mala'ekati da tekongko mohende. 23 Dahamiu leu hai kongkosaando raro ana ntetukakano Apu Alla,e da menteburi neendo hai suruga, naamo hai sangkoleondo pera miano mpongkona da pinokontekonano Apu Alla kai osie tekebaako. Dahamiu leu hai Apu Alla, da otuhio kara-karano luwuo to manusia, 24 naamo hai Yesus, toleano pedandi ntonia, ronga hai rea mpompipiti da kolalo moico ka'iaa reano i Habel.f
25 Nangkuamo koie, midagai'o, kami osie bubungkuiho Koie da koharatia. Kana'umpe nando to'ori mpolai ko'ira miano Israil da sai padulio Apu Alla hi ari pokompehawa'ira hai wita'ea. Lalo'eahopo cita die ki sato padulio hi pokompehawakita mebinta hai suruga. 26 Tempono Apu Alla mogau'akondo miano Israil iponoha, suarano pokomoleluo wita'ea, sawali diekana dahoo medandi kanahi, « Teponohapo penda kicu pelelu, na'iaamo te'iaa wita'ea, sawali ronga langi. »g 27 Koie gau da kanahi, « Teponohapo penda, » batuano upu-upuo wita'ea da ari pinadadino dahoo nta nilelu kai inonini, yahoo da sai pinokolelu koiemo danta moo'ia.