Pe'oliwi ronga amala
13
1 Kahioomo kami e'elengua mpekalolaro mpetitila! 2 Mi'osie montangkoro montarima suere miano hai laicamiu; kana'umpe dahoo opia miano da ari moweweu kana koie, mainakaa nasando to'orio hicua da tinarimando mala'ekati. 3 Mimpeehawa'ira miano ntetorungku, kana to'u himi daa itai tetorungku. Kanamo na'anda miano da mentekarasai kana to'u himi daa itai tekarasai.4 Kahioomo kami dagai'o rumatanggamiu da mpesincamo, kami osie lako moweweu ngkabaria, kando osie paruruo luwu miano dadaano miano da mpesinca. Kana'umpe miano endeo ronga da meduluakono da sa'iaa samporano dahoo nta hukumaa Apu Alla. 5 Mi'osie tewali atano doi, koa'omo kami mohende'ako hapa da inawamiu. Kana'umpe ario koharatia Apu Alla kanahi, « Naku da'a nta paisa bintakomiu ronga moturusicomiu. »a 6 Yahomo koie kai morodo laronto kanahi, « Apu Alla pontulumincu, kuda'amo nta momee. Hapa nta poweweuno miano i'aku? Nahina! »b
7 Osie kolumpehira miano da ari potisu'akomiu'o haratiano Apu Alla. Mimpeehawa'o ki kana'umpe tora-torando dungku kando mate, ronga minunu'o parasaeando.
8 Koie Yesus Kristus nai paisa teboli'i, mebinta iponoha, diekana, dungku samengka-mengkauno. 9 Mi'osie monunu pera pompotisu da suere kami mpinokompore. Kana'umpe pompeehawano Apu Alla yahoo pompokomorosono laromiu, koiemo da moico, na'iaa atora da sai hina gunano mekona hai kinaa. 10 Kana'umpe dahoo pontompa'anto pesomba, dahano sai tewali ko'ira pua'ima da mpolayani hai kema mpesombaa mpo'ala tilado kando mpongkaa.
11 Koie reano pinotuwu nta pesomba po'uwohi dosa, pua'ima'ea da wawaa mewiso hai suo da mewota'ea, sawali wotoluno tinunu hai bungkuno pekemaando miano.c 12 Nangkuamo koie i Yesus kai marasai hai bungku mpinewambano kota, kai uwohiakondo'o reano dosando umatino. 13 Nangkuamo koie, tompeluarakomo awaa daahano hai bungkuno pekemaando miano, kato itai pinoko'anu-anu. 14 Kana'umpe die hai wita'ea nahina kota da sai nta lono nta poo'iahanto, yahomo kato u'ungkee kota nta poo'iahanto oleo perumbui.
15 Nangkuamo koie, tendenomo Yesus Kristus, kahioomo kato e'elengua reree'o Apu Alla ronga poko'owose'o neeno kowati pesomba da tinompato. 16 Ronga mi'osie ari-ari mpoweweu da moico ronga mpekatulu-tulumiako hapa da inawamiu, kana'umpe yahomo koie pesomba da po'eheno Apu Alla.
17 Minunu'o po'ehendo da wawaicomiu ronga turusihira, kana'umpe hinangkuamo i'ira da dagai'o sangkoleomiu kowati miano danta dudunduo pohedoando hai Apu Alla. Kimi nunu'akondo'o kana koie, dahiramo nta sanaa larondo mohedo. Ki sami da'a, dahira nta mengunguako, ronga nahinamo nta gunano hai comiu.
18 Misadia amalaakami. Kana'umpe matantumamio nako da'a moweweu da tesala, kona mokea moweweu da moico hai luwu pera da niweweumami. 19 Da kontu'uma pino'itangku kami amalaakuo, kaku oru awakomiu mbule.
Amala ronga salamu kompura-puraano
20 Kai mate Apu Yesus Apunto, reano da mokomentoda'omo pedandino Apu Alla dungku samengka-mengkauno. Nangkuamo Apu Alla kai wanguo mebinta hai matea tewali tumpu mpakaninto da owose, ronga citamo domba piniarano. Ehepo Apu Alla, pu'uno toraaha da momapu, 21 kai pasadia'akokomiu'o kai mondo luwu da moico, kami nto'ori nunu'o da po'eheno. Kahioomo kai padadio hai cita da moiconoo, mentete kuasano Yesus Kristus, da pinoko'owose samengka-mengkauno. Amin.
22 Raro mpetilaku, dahaku mo'ita kami sabara modedeaho die pe'oliwincu, kana'umpe die surangku nai da'asi mentaa. 23 Dahaku mo'awaakomiu hi peluarakomo koie petilato i Timotius mebinta hai katorungku. Ki oru leu, dakamimo nta meronga lako awakomiu.
24 Pokodungku'akami'o salamumami hai ira ponggawamiu ronga hai ira luwu miano mparasaea. Petila pe'asa imani da mebinta hai Italia dahira pokatukomiu salamu.
25 Kahioomo pompeehawano Apu Alla kai perongakomiu luwu.