Surano i Paulus hai
Filemon
Salamu
1
1 Mebinta hai aku i Paulus, miano ntetorungku tendenomo Yesus Kristus, ronga hai petilato i Timotius, nta lako hai Filemon da telou, simbau mpohedomami, 2 naamo hai Apfia petilato tina, kai tii hai Arkhipus, pe'asa mpohedomami, ronga jema'a da nte mesambahea hai laicau. 3 Kahioomo Apu Alla Tamanto ronga Apu Yesus Kristus kando peehawakomiu ronga mapuhiakokomiu'o barakati.Imanino i Filemon
4 Koa hicu amala, kuneeho neeu ronga montarimakasi hai Apu Alla Apungku, 5 tendenomo hicu podeako hiu parasaea hai Apu Yesus ronga hiu pololaro luwu miano mparasaea. 6 Pino'itangku petila'anto kana miano mparasaea kai kowua'ako ponto'ori da e'elengua tetiani owose mekona hai luwu barakati da tinarimanto hito boboto'akono Kristus. 7 O petilaku Filemon, polou'u umatino Apu Alla da mokomohende'aku ronga da poko'owose'o larongku, kana'umpe ko'ira miano mparasaea aricomo lilimboihira.
Po'itano i Paulus hai Filemon mekona hai Onesimus
8 Mau kicu lalesa parentako tendenomo kuasa da mebinta hai Kristus, kau weweuho koie tugasiu, 9 sawali hicuna louko, naku da'a parentako, te'iaasi mo'ita hai co'o, lalo'eahopo kuna motu'amo ronga tetorungku tendenomo Yesus Kristus.a 10 I'aku Paulus mo'ita hai co'o, mekona hai anaku pe'asa imanincu, i Onesimus, kana'umpe tewaliaku tamano hai bolo ntorungku. 11 Iponoha nai koguna hai co'o, sawali diekana kogunaamo, kanasi hai aku.b
12 Diekana dahakumo tena'o koie anaku, da dompa nilouku, kai pohule hai co'o. 13 Santo'u-to'uahano, po'ehengku nta taha'o kai perongaaku, nta popo'euko layaniaku kuna daapo metorungku tendenomo Lele Mohende. 14 Sawali nasaku ehe taha'o ki sau wukahio, kana'umpe po'ehengku, hapa nta niweweuu da moico, kahioo kai po'ehe mpanta'u, naku da'a pakisaako. 15 Koiemo ntada'a sababuno kai ari bintanico asantonia, kau to'ori tarimaa mbule samengka-mengkauno. 16 Diekana koie i Onesimus na'iaamo ata, deenapo kolaloo ka'iaa ata. Kana'umpe tewaliomo petila pe'asa imani da telou, kanapo hai aku, lalo'eahopo hai co'o, kana ata, maupo kana miano da nunu'o Apu.
17 Kiu angga'aku petila'u Karasitee, moicoomo kau tarimaa ronga angga'o kana po'angga'u i'aku. 18 Ronga ki daa ari salakico atawa pokomarugico, i'akumo danta tanggoiho luwu.c 19 I'aku die i Paulus, die buri lima mpantaku: I'aku danta wada'o. Kaku osie kanahi, dahoo dosau hai aku, yahoo wotolu mpanta'u.
20 Umbee, petilaku, ehepo kau koguna hai Apu hiu ehe nunu'akuo pino'itangku; dahomo nta mohende larongku hito daa boboto hai Kristus. 21 Kaku poburi kana die, tendenomo kuna mparasaeako hiu kototo, mau kolalo ka'iaa da pino'itangku, daako nta weweuho. 22 Diekana pompasadia'akuo poturia hai laicau, kana'umpe dahaku momperahi-rahi hicu daamo nta oru mohule awakomiu, tendenomo himi daa amalaakuo.
Salamu