Markus i

Lele Mohende da ari pinokodungkuno

Markus

Pobetekino Gau

Die boku Lele Mohende (yahoo Injili) da ari niburino i Markus, mekona Yesus Kristus (Isa Al-Maseh). Patuduno i Markus kai burio yahoo, kai mentoda hicua i Yesus Mokole Pompokosalama da pinokomarasai, Ana Nto Manusia, ronga Anano Apu Alla. Ronga penda patuduno yahoo, kato nunu'o i Yesus mau marasai atawa sanaa.

Ihino die boku yahoo, pompotisuno i Yesus ronga niweweuno da tinekangkaako. I Yesus moleleako Lele Mohendeno Apu Alla kanahi, « Dungku'omo tempono, pomparentaano Apu Alla okudaamo » (1:14-15).

Ponggawano suku Yahudi mopoe larondo hai Yesus, nangkuamo kando mpekosi nta popatee (3:6). Sawali i Yesus nasai polaisihira. Deenapo nte montuluraakondomo ana guruno hi daa nta pinepate (8:31, 9:31, 10:33, 34). Pomperadamiomo lako hai kota Yerusalem, dahando ponggawano suku Yahudi, patuduno nta soroo penaano tendenomo huda'o miano me'alu mebinta hai sinalakindo (10:45). Kai pinopate nde'e, sawali oleo ko'otolu toraasi mbule.

Tulura mekona da niweweuno i Yesus die hai boku nileleako ongkunda ronga mentoda. Da me'alu saba hai tulura yahoo pohedoano ka'iaa da nigauno ronga pompotisuno. Sipano i Yesus da saba die hai boku Lele Mohende yahoo kuasano, da inonto hai pompotisuno, hi pompokontido miano morungku, montila setani, ronga mo'ampuni dosa.

Ihino boku

1. I Yesus nibaho ronga sinoba-soba (1:1-13).

2. Pohedoano i Yesus hai tongano miano me'alu hai Galilea (1:14 – 9:50).

3. I Yesus me'o'ala hai Yerusalem nta pinepateano (10:1-52).

4. Pompotisuno i Yesus hai Yerusalem (11:1 – 13:37).

5. I Yesus nirako ronga pinetawe (14:1 – 15:47).

6. I Yesus tora mbule (16:1-20).