I Yesus mera'iako hai gubernur Pilatus
(Mat. 27:1-2,11-26; Luk. 23:1-5,13-23; Yah. 18:28-19:16)
15
1 Dumondo'ea boboto'iramo ko'ira kapala pua'ima, kamotu'ano miano Yahudi, guru agama, ronga luwundo pongadila'eano agama, kando pungorio i Yesus kando wawaa soroakono'o i Pilatus. 2 I Pilatus metukanaiho kanahi, « Co'omo bara mokoleno miano Yahudi? »Kai polawani koie i Yesus kanahi, « Yahomo da kanahiu. »
3 Yahopo raro ngkapala pua'ima montutumbu'akono. 4 Kai petukanaiho penda i Pilatus kanahi, « Nau da'a bara nta molawani? Ontoopo me'a-me'aluno hindo daa tuntuko. »
5 Sawali i Yesus nasai mompe'o'oo molawani, yahomo i Pilatus kai tekangka.
6 Da biasa hi konaa oleo owose, i Pilatus moluarako me'asa miano ntetorungku da po'ehendo miano me'alu. 7 Ronga koie wotu dahoo me'asa miano da meneehako Barabas da tetorungku merongahira opi-opia miano da teposala'akono pamarenta. Ndona mompepate miano laro mpe'o'anuando. 8 Kando meleu miano me'alu mpo'ita hai Pilatus kai poluarako te'asa miano mpetorungku kana da biasa.
9 Pilatus lawanihira ronga metukana, « Po'ehemiusi bara kaku bintaniakomiu'o mokoleno miano Yahudi? » 10 I Pilatus dahomo to'orio koie i Yesus hi daa singgiraiho raro ngkapala pua'ima, nangkuamo kando soroakono'o.
11 Sawali raro ngkapala pua'ima undekihira miano me'alu kando mpo'itaa hai Pilatus kai luarakoakondo'o i Barabas. 12 Kai kanahi penda Pilatus, « Kicana koie, hapa nta poweweungku die miano da nineemiu mokoleno to Yahudi? »
13 Yahopo kando mpogora miano me'alu kanahi, « Basiropaamo! »
14 Kai lawanihira penda i Pilatus kanahi, « Sawali hapa da ari niweweuno da mosa'o? »
Sawali sapeko-pekorando nde'e mpogora kanahi, « Basiropaamo! »
15 Dadi, i Pilatus namokea mokodungku'akondo'o da patudundo miano me'alu, yahomo kai bintaakondo'o koie i Barabas. Yahopo kai pontena miano kai rorasaiho i Yesus ronga soroakondo'o kai nibasiropa.
Sorodadu da moko'anu-anuo i Yesus
(Mat. 27:27-31; Yah. 19:2-3)
16 Kando wawaamo i Yesus ko'ira sorodadu mewiso hai ulua rahano gubernur, kando boboihira luwundo surudadu mentekongko. 17 Kando pokompebabuakono'o babu olondoro mentii, kando po'enaakono songko mpomokole da koriu, kando pokompesongkoakono'o hai rapano. 18 Yahopo kando mpetampu'u mpesombaiho moko'anu-anuo kanahi, « Sombakomiu mokoleno miano Yahudi. » 19 Kando alaa tuko wulu langkuakono'o hai rapano ronga oniuho, kando kokolontuu mpesombaiho. 20 Sa'arindo moko'anu-anuo, kando meluuhio babu mentiino da olondoro, kando pokonaakono'o dadaa babuno, yahopo kando luarako wawaa dahano nta nibasiropa.
I Yesus nibasiropa
(Mat. 27:32-44; Luk. 23:26, 33-43; Yah. 19:17-24)
21 Koie tempo kai tealo me'asa miano da meneehako i Simon, miano Kirene, tamano i Aleksander ronga i Rufus, da tade-tadenopo mebinta hai kampo nta lako hai kota, ko'ira miano nilakodo tena'o kai lemba'o keu mpinotalambeno i Yesus.
22 Kando wawaa koie i Yesus dungku kokeena da meneehako Golgota, batuano: Dahano Tolobe Rapa. 23 Yahopo kando poweeho angguru da ari hinela'iako pulu ngkeu mowondu, sawali nasai ehe mondo'u. 24 Sa'arino koie kando basiropaa ronga mpetitila'o babuno hindo arimo loterei'o kinaiho danta mo'awa.
25 Koie oleo dahomo tete osio kando basiropaa. 26 Hai wawono keu mpinotalambeno dahoo tepaso buri hapa da nidudunduno kanahi: « Mokoleno miano Yahudi. »
27 Da perongano nibasiropa dahoo orua miano mparampo, me'asa hai muanano ronga me'asa penda hai suwano. [ 28 Kanamo koie kadadiahano da teburi hai Boku Haratiano Apu Alla da kanahi, « Hi ni'angga kana miano mosa'o. »a]
29 Pera miano da tealo kokeena poko'anu-anuo ronga lidu-lidu'o rapando kanahi,b « Ico'omo da kanahi nta rengga'o koie raha mpesombaa kau potadee larono otolu oleo? 30 Pokosalama'o wotoluu mebinta hai keu mpinotalambe, kau petiihako! »
31 Kanasi na'anda raro ngkapala pua'ima ronga guru agama mperongahiramo mpoko'anu-anuo kanahi, « Suere miano yahomo da pinokosalamano, sawali wotolu mpantano nai tule'i pokosalama'o! 32 Kicua wainto Mokole Pompokosalama, mokoleno miano Israil, kahioomo diekana kai tiihako wotolu mpantano mebinta hai keu mpinotalambe, kato ontoo ronga parasaeaho! » Ko'ira da orua miano da perongano nibasiropa, yahomo kana-kana moko'anu-anuo.
Taweano i Yesus
(Mat. 27:45-56; Luk. 23:44-49; Yah. 19:28-30)
33 Dahomo totoro oleo, kai rondoma tolu damu mengkauno upu-upuo koie wonua. 34 Tete otolu'omo kai pekora i Yesus mehou kanahi, « Eloi, Eloi, lama sabakhtani? » Batuano: « Apu Alla Apungku, Apu Alla Apungku, yo hapa kau bintaniaku? »c
35 Sando podeaho ko'ira miano da mpentade kokeena nilakodo kanahi, « Podeahopo hi daa boboiho nabii Elia! » 36 Kai pekalulu me'asa miano mowawa bungano watu mpasi mongura, tomo'o hai angguru mo'olo, kai tu'oraa hai asa kolo wulu, kai poweeho mondo'u koie i Yesus ronga kanahi, « Kato tarimaa ki daa nta leu i Elia tiihako. » 37 Yahopo i Yesus kai pehou'ea kai mo'otu penaano.
38 Pedao da hai bolo raha mpesombaa tehia ngkenaamo mebinta hai wawo dungku hai tonto. 39 Koie komondaa ngkompi da mentade tepora'iakono i Yesus ontoo dadaano kai mo'otu penaano, kai kanahi, « Menonaa die miano Anano Apu Alla! »
40 Dahira penda opia tina da mpentade o'onto mentalaa ko'iramo i Maria Magdalena, i Salome, ronga i Maria tinano i Yakobus mongura ronga Yoses. 41 Tempono i Yesus da'a hai Galilea, iramo da nunu'o ronga da pasipolee. Dahirapo penda me'alu tina suere da perongano leu hai Yerusalem.
Pekoburuano i Yesus
(Mat. 27:57-61; Luk. 23:50-56; Yah. 19:38-42)
42 Koie oleo, oleo Dumaa,d ronga sasumoono oleo, petampu'uanomo oleo mpekolia. Kiniwiano koie oleo, 43 leuhomo i Yusuf, miano Arimatea, hai Pilatus. Koie i Yusuf me'asa anggota pongadila'eano agama da te'angga, da totarimaa pomparentaano Apu Alla. Kai pompeseka-seka mo'itaa hai ra'ino i Pilatus koie maeatino i Yesus. 44 Tekangkaamo i Pilatus hi podeaho koie i Yesus hi matemo. Yahopo kai boboiho koie komondaa ngkompi kai petukanaiho, ki daamo mate i Yesus. 45 Sapodeaho kanahino koie komondaa ngkompi, yahopo kai wukahio i Yusuf kai alaa maeatino.
46 Yahopo koie Yusuf kai po'oli kae ngkati, kai tiihako koie maeatino Yesus ronga waluo. Sa'arino yahopo kai lako lehaa hai bolo ngkoburu watu da ari pina'oti. Arinopo koie, kai podole watu owose ronga tampo'o koie wambano koburu. 47 Ko'ira i Maria Magdalena, ronga i Maria tinano i Yoses, dahirasi ontoo dahano nileha koie i Yesus.