Lukas i

Lele Mohende da ari pinokodungkuno

Lukas

Pobetekino Gau

Koie i Lukas yahoo dotoro da tewali salakono Paulus hi daa lako moleleako Lele Mohende (ontoo Kolose 4:14; 2 Timotius 4:11). I Lukas ario paresaa tulurano Yesus Kristus mebinta hai ira miano da ontoakono'o matando, yahopo kai burio kai te'atoro (1:1-2). Patuduno kai burio die boku yahoo, kai mentoda hicua Yesus Mokole Pompokosalama da nidandino Apu Alla hai miano Israil ronga hai luwu to manusia. Kana da teburi hai Lukas 19:10, patuduno Yesus kai leu hai wita'ea yahoo: « u'ungkee ronga pokosalama'o miano da isa. »

I Lukas tuluraa dadaano i Maria tinano i Yesus dungku kai pokohinaa, tuluraa tempono okidi i Yesus, ronga pohedoano i Yahya pompobaho daano baho'o i Yesus. Tuluraa niweweuno ronga pompotisuno Yesus hai wonua Galilea ronga wonua Yudea, dungku kai lako hai kota Yerusalem. Tuluraa da kadadia hai Yerusalem dungku kai nirako i Yesus, ni'adili, ronga pinopate hai keu pinotalambe. Perumbuino dahanomo tuluraa dadaano Apu Yesus hi tora mbule, mepopo'ontoako hai ira ana guruno, dungku kai moleka hai suruga. Hai Lukas 4:18, teburi kanahi Sangkoleono Apu potoro'o i Yesus nta mompokodungku lele mohende hai miano ngkadee-dee. Nangkuamo kai pinaduli to'u die hai boku dadaano miano da marasai ronga da tedadasako. Da me'alu saba die hai boku na'ana yahoo dadaano amala, Sangkoleono Alata'ala, tina da layanio i Yesus, ronga po'ampuniano dosa.

Dahoo opi-opia tulura die hai boku da sai hina hai boku Lele Mohende suere, kanano: tulurano tumpu mpakani tempono hina i Yesus, i Yesus anadalo hai raha mpesombaa, parereno miano Samaria da mobuna larono, ronga ana ntama da isa.

Ihino boku

1. Pobetekino gau (1:1-4).

2. Hinaando Yahya pompobaho ronga Yesus (1:5 – 2:52).

3. I Yesus nibaho ronga sinoba-soba (3:1 – 4:13).

4. Pohedoano i Yesus hai wonua Galilea (4:14 – 9:50).

5. Pohedoano i Yesus hi daa me'o'ala hai Yerusalem (9:51 – 19:27).

6. Mincu kompura-puraano i Yesus hai Yerusalem dungku kai mate (19:28 – 23:56).

7. I Yesus tora mbule ronga mepopo'ontoako hai ana guruno (pasala 24).