Poko'ario pohedoa dahano boboico Apu Alla
4
1 Yesus Kristus dahoo nta leu kompendua hai laro mpomparentaano adili'o miano da mentora ronga da memate. Nangkuamo koie, hai ra'ino Apu Alla ronga Yesus Kristus, kutena to'uko: 2 Mokua leleako haratiano Apu Alla, osie meruruki wotuno. Tisu'akondo'o bangudo da tesala, kebaakoakondo'o tesalado, tumbusihira ronga sabara potisu'ira. 3 Kana'umpe dahoo nta leu tempono, sai ehe'ano miano mompodedea pompotisu da moico, sawali yahoo da po'eheno larondo. Dahira nta mo'u'ungke guru da to'ori pokomohende'o birindo. 4 Kana'umpe nando eheemo mpompodedea da tekona, te'iaamo tulura ngkule. 5 Sawali ico'o, pokome'asa'o pekiriu hai luwu da niweweuu. Sabara hai larono karasai, konianto'u leleako haratiano Apu Alla, poko'ariomo luwu pohedoa dahau tinena.6 Mekona hai wotolungku, reaku dahomo tesolorako kana pesomba.a Nta mateangku okudaamo. 7 Ariakumo itai metandi moi-moico, ronga kudungku'omo tida kompura-puraano, ronga parasaea ngkaida'a. 8 Diekana sadia'omo tila mpeponangincu tendenomo hi pokontekonaaku Apu. Ki dungkumo oleo kiama, dahanomo nta weehakuo Apu, koie Hakim da adili, sawali na'iaa pantaku, yahoo luwu miano da moko'au totarimaa oleo nta leuhano.
Dadaano i Paulus
9 Pepasipole kau oru leu awaaku. 10 Kana'umpe i Demas bintaniakumo lako hai Tesalonika tendenomo name'o'oloiho die dunia. I Kreskes lako'omo hai Galatia ronga i Titus lako hai Dalmatia. 11 Te'iaamo i Lukas da salakoku. Wawaamo i Markus kami mperonga leu, kana'umpe dahosi nta to'ori bantu'aku hai laro mpohedoangku. 12 Ariakumo tena'o i Tikhikus kai lako hai Efesus. 13 Kiu daa nta leu wawaakuo babu mokulaku da nibintanincu hai laicano i Karpus hai Troas. Ronga ko'ira bokuku, kontu'uma ko'ira boku baula.
14 Koie Aleksander, tumpu mpolono kale, me'aluo niweweuno da mosa'o hai aku. Dahosi nta wolohio Apu kana niweweuno. 15 Co'o na'au dagai'o, kana'umpe taperano sai ehee pompotisuto.
16 Isoku molawani kara-karaku hai pongadila, nahina te'asa miano da salako'aku, luwundo ndomebintaniaku. Ehepo Apu Alla kai ampunihira. 17 Sawali Apu da merongaaku da moweehakumo kamokoraa, kaku lalesa leleako luwu Lele Mohende kai podeaho luwu miano da sa'iaa to Yahudi. Ronga tepulosi mebinta hai ira danta popateaku. 18 Menonaa Apumo da sadia mokosalama'aku mebinta hai luwu niweweundo miano da mosa'o. Iaamo danta mokosalama'aku dungku kaku pewiso hai laro mpomparentaano hai suruga. Kahioomo kai pinoko'owose samengka-mengkauno. Amin.
Salamu kompura-puraano
19 Salamungku hai Priska, Akwila, ronga ihi laicano i Onesiforus. 20 I Erastus dahopo moo'ia hai Korintus ronga i Trofimus kudioho hai Miletus dahoo morungku. 21 Pepasipole to'u kau oru leu awaaku hi sai da'apo wula mokoseoha.
I Ebulus, i Pudes, i Linus, ronga i Klaudia mpesalamu hai co'o, kanapo luwu petila da mpe'asa imani.
22 Kahioomo Apu kai perongaa sangkoleou. Kahioomo Apu Alla kai barakaticomiu.