Nta inawano miano oleo perumbui
3
1 Kahioomo kau to'orio hi daa nta da'a susa oleo perumbui. 2 Danta pinekirino miano te'iaasi wotolu mpantano, ronga molulu'i doi. Dahira nta mpogau montoe, mentaba, ronga mokua mpo'anu-anu miano. Nta ta'oo miano motu'ando, sai mpontarimakasi, ronga nando mpe'agama. 3 Nando mpololaro miano, nando melou mpo'ampuni, mpososa'o neeno miano, sai montaha pelaroa, mosoko, nando ehee da moico. 4 Mebalu'o simbaudo, mpepekiri ongkunda, ronga lalo'ea mentaba. Po'ehendo sana-sanaa ka'iaa lou'o Apu Alla. 5 Menonaa to'ontohira mokuahira mpe'agama sawali nando ehee kuasano Apu Alla kai boli'ihira. Mentalahio miano da kana koie!6 Ko'iramo da mpengio kando lako mpewiso hai laicando miano, kando pongaruhi'ira tina da modengke mpelaroa da me'alu dosando ronga da kinuasaino rupa-rupa pinokeahako. 7 Ko'ira tina sadiahirasi mokea pinotisu sawali nando paisa mo'awa pompotisu da menona. 8 Ponoha tempono i Yanes ronga Yambres bali'o i Musa kanamo na'anda ko'ira miano mosa'ondoo pompotisu da menona. Pekirindo mosa'oomo ronga parasaeando nai tetarimamo. 9 Nangkuamo kasai da'a nta hina gunano pohedoando, kana'umpe porendo dahoo nta to'orio luwu miano, kana dadaando i Yanes ronga i Yambres iponoha.a
Da nunu'o haratiano Apu Alla dahoo nta pinakasea
10 Sawali ico'o dakomo nunu'o pompotisuku, tora-torangku, patudungku, parasaeangku, sabarangku, pololarongku, ronga konianto'ungku. 11 Dakomo to'orio dadaangku tempongku pinakasea ronga tekarasai kana arincu pinakasea hai Antiokhia Pisidia, hai Ikonium, ronga hai Listra. Sawali Apu Alla namokosalama'aku mebinta hai luwu koie karasai da konaaku. 12 Menonaa pera miano da mokea tora mesomba hai Yesus Kristus dahoo nta pinakasea, 13 ronga pera miano da mosa'o ronga da mompokompore miano samosa-mosa'ondo. Dahiramo mompokompore miano, sawali dahirasi na'anda pinokompore. 14 Sawali ico'o Timotius, kahioomo kau ungkaari to'uo da menona da ari pinepopotisu'akou ronga da pinarasaeau, hiuna nto'orio inaihira guru'u da ari motisuko. 15 Peehawa to'uo mebinta sakidihau kau to'orio ihino Boku Haratiano Apu Alla da moweeko ponto'ori kau daa nta salama, tendenomo parasaeaho Yesus Kristus. 16 Luwu ihino Boku Haratiano Apu Alla mebinta hai Penaa Mewotano, ronga dahoo pekonaano kito pompotisu'ako miano, mongkebaako da tesala, mompokomoico bangu, ronga mompaguru miano kai poweweu da tekona. 17 Kicana koie, mianono Apu Alla dahomo nta meparewatiako pokosangka mpohedo kai to'ori hedoo luwu pohedoa da moico.