Ta'oo karasai kana Yesus Kristus
2
1 O Timotius anaku, kahioomo kau morosoako pompeehawano Yesus Kristus! 2 Pompotisuku da ari tinarimau hai ra'indo miano me'alu, potisu'akondo'omo ko'ira miano da pinarasaeau, da mandara mompotisu suere miano.3 Itai morora'i karasai kana sorodaduno Yesus Kristus da konianto'u. 4 Koie da tewali sorodadu, nahina pinasipoleno meha, hina mokea kai sanaa ponggawano. 5 Me'asa miano da metandi nai to'ori mo'awa lamoro me'asa, ki sai nunu'o atorano da pinetandiako. 6 Me'asa miano mpe'uma da mohedo mokora danta tarimaamo meri'ou ihi umano. 7 Peehawa'o koie hicu daa mo'awaakoko, kana'umpe dahosi Apu danta moweeko ponto'ori kau paha'osi luwuno.
8 Peehawa to'uo i Yesus Kristus, leeno i Daud, da ari tawe kai pewangu mbule. Diemo Lele Mohende da nileleakongku. 9 Tendenomo koie Lele Mohende kaku marasai kana me'asa miano mosa'o da pinungo, sawali nasando tule'i nta pungoo itai haratiano Apu Alla. 10 Koiemo sababuno kaku ta'oo karasai tendenomo miano nirurukino Apu Alla, kando awaa na'anda salama'a tendenomo hindo boboto'akono Yesus Kristus, naamo merongaa hai laro mpinoko'owose'ano samengka-mengkauno. 11 Menonaa gau da kanahi:
« Kito mate merongaa,a
dakita nta tora merongaa.
12 Kito sabara tineiho karasai,
dakita nta momparenta merongaa.
Kito pehapuiho,
dahoo nta mehapuicita.
13 Mau ki teboli'i parasaeanto,
nai da'a nta teboli'i pololarono,
kana'umpe nasai to'ori mehapuiho wotoluno. »
Ata ntinenano Apu Alla da konianto'u
14 Oliwiakondo'o die luwu ronga pokopehawa'akondo'o ko'ira miano hai ra'ino Apu Alla kando osie mpegagahiako ino'awa. Kana'umpe nasai hina gunano, te'iaasi mokomasilaka'o miano da modeaho. 15 Kahioomo kai to'u-to'uu mohedo hai ra'ino Apu Alla kau pantasi nineehako pohedono da sai mokoko'anu ronga mompotisu'ako haratia da menona ronga mongkote. 16 Mentalahio gau da sai hina gunano da sai moiconoo Apu Alla. Kana'umpe gau da kana koie te'iaasi mokolalo'eaho miano moweweu da mosa'o. 17 Gau da kana koie melueri kanamo dadaano kamba sa'o da lumele. Da kana koie ko'iramo i Himeneus ronga i Filetus, 18 da bintanio pompotisu da menona. Kanahindo pewanguando miano mate ariomo kadadia, da mokomoleluo parasaeano miano. 19 Sawali pompu'ui da ari pinokomorodono Apu Alla nai pinokomolelu, ronga hai wawono dahoo teburi, « Apu to'orio inaiho mianono »,b ronga « Luwu miano da meki'apua hai Apu, kahioomo kai bintaa da mosa'o ».
20 Hai bolo laica da owose dahoo rupa-rupa pokosangka. Dahoo pokosangka wulaa ronga salaka, sawali dahoo na'ana pokosangka ngkeu ronga wita reo. Koie wulaa ronga salaka pinake'ano dahano te'angga, keu ronga wita reo pinake'ano dahano sai te'angga. 21 Kanamo na'ana koie miano da mokomowuaho wotoluno mebinta hai niweweu da sai te'angga, dahoo nta tewali pokosangka da te'angga ronga tinindahako, da koguna hai apuno, da sadia pinake hai luwu pohedoa da moico.
22 Mentalahio kea-keano tora mongura da mosa'o. Lulu'io da tekona, kau konianto'u, mololaro, ronga tepokonaakondo miano da molino pelaroando da mesomba hai Apu. 23 Osie kenunuta hindo mpekakahi miano mpore da sai to'orio hapa-hapa. Dakomo to'orio koie da kana te'iaasi moweweu tineposala'ako. 24 Miano da tewali ata ntinenano Apu nai tewali teposala, sawali moluu larono hai pera miano, to'ori mompotisu kai moico, ronga sabara. 25 Melo-melou motisu'ira miano da motea rapando, kana'umpe Apu Alla dahoo nta moweehira tempo kando manda, ronga kando to'orio pompotisu da menona. 26 Nta kanamo koie kando daa nta awaa laro mbule, ronga tebintani hai bengkarono ponggawano bilisi da ari rako'ira kando nunu'o po'eheno.