Surano ko'orua i Paulus hai
Timotius
Salamu
1
1 Adie sura mebinta hai aku i Paulus, tinenano Yesus Kristus nunu'o po'eheno Apu Alla, kaku leleako mekona toraaha kana da ari pedandino Apu Alla, kato awaa koie toraaha tendenomo boboto'akono Yesus Kristus.2 Die sura nta dungku hai Timotius, anaku da telou. Kahioomo Apu Alla Tamanto ronga Yesus Kristus Apunto kando e'elengua meehawako, lolaroko, ronga mapuhiakoko'o barakati.
Pontarimakasi ronga oliwi
3 Kupontarimakasi hai Apu Alla tendenomo ico'o. Apu Alla dahangku molayani kaku daa mo'oruiho pelaroangku kaku osie tekebaako, kana da ari niweweundo mbueku da mperi'ou. Malo meanta sa'amalangku, sadia kupokopehawako. 4 Kupeehawa'o tempono turu luu'u ronga mokeahaku tepo'awaakoko kai mohende to'u larongku. 5 Kupokopehawako hi to'u-to'uu parasaea, kana to'u parasaeando mbue'u i Lois ronga tinau i Eunike. Parasaeangku kau e'elenguasi kana koie.
6 Nangkuamo kaku oliwico, kau pokontoraa mbule kuasa ronga sipa hi ari Apu Alla moweeko tempongku dampasako pelengku barakatico. 7 Kana'umpe Sangkoleo hi ari Apu Alla moweekita na'iaa danta mokomowarakita. Sawali yahoo Sangkoleo danta mokomokorakita, kato kopololaro ronga moweweu da pantasi.
8 Nangkuamo koie, osie mokoko'anu leleako leleno Apunto, kanapo osie mokoko'anuako i'aku da tetorungku tendenomo Iaa. Sawali kahioomo kau pake'o kuasa da mebinta hai Apu Alla kau itai marasai tendenomo Lele Mohende. 9 Apu Alla da mokosalamakita ronga da boboicita kato tewali miano ntinindahakono, na'iaa hi moico da niweweunto, sawali nangkua patuduno ronga pompeehawano. Ariomo moweekita koie pololaro tendenomo Yesus Kristus yahopo kai niweweu wita'ea. 10 Diekana yahopo Apu Alla kai tisu'akita'o hi leumo Yesus Kristus Gurusalamato, da nangio matea ronga pokomentoda'akita'o dadaano toraaha da sai hina puraano, mentete hai Lele Mohende.
11 Tendenomo koie Lele Mohende, kai potoro'aku Apu Alla tewali rasulu, poleleako haratia, ronga guru, 12 nangkuamo kaku marasai kana die. Sawali naku da'a mokoko'anu, kuna nto'orio dahangku parasaea, ronga matantu to'ungkuo hicua Iaa danta daga'o toraangku dungku oleo kiama.
13 Nunu to'uo luwu pompotisu da tekona da ari pinodeau hai aku, ronga ungkaario parasaea naamo pololaro da mebinta hai Yesus Kristus. 14 Dagai to'uo koie da ko'angga da ari tinarimau mentete hai kuasa Sangkoleono Alata'ala da mo'iahio pelaroanto.
15 Dakomo to'orio luwu miano da hai wonua Asia,a nahinamo da nunu'aku, itaihomo ronga na'ana i Figelus ronga i Hermogenes. 16 Kahioomo Apu Alla kai e'elengua lolaroo ihi laicano i Onesiforus, da manturu nte leu lilimboihaku; mau hicu daa tetorungku nai mokoko'anu. 17 Sadungkuno hai Roma kai u'ungke to'uaku dungku kako tepo'awa. 18 Dakomo to'orio daangku hai Efesus mokuaho tulumiaku. Kahioomo Apu kai lolaroo ki dungku oleo kiama.