Hinaano i Yesus
(Mat. 1:18-25)
2
1 Koie tempo mokole'ea Roma da meneehako Agustus moluarako me'asa parenta nta doa'o luwu miano hai upuo wita da kinuasaino danta mowada sima. 2 Diemo iso'ano nidoa miano tempono Kirenius parentaa wonua Siria. 3 Yahopo kando lako luwuo miano mepeburio neendo hai koa-koa'o kampodo.4 Kanapo na'ana koie i Yusuf mebinta hai kampo Nazaret wonua Galilea sabe hai wonua Yudea lako hai kampo pebintaano i Daud da meneehako Betlehem, nangkua pembue'ano hai Daud, 5 dahando nta niburi neendo meronga i Maria, tina sinamporano da mobantamo. 6 Dahiramo konainoo kokeena, dungku'omo tempono koie i Maria nta mompokohina. 7 Kai pokohinaa me'asa ana ntama, yahoo ana ntetukakano, kai tolokuniakono'o sibi sawu, ronga lehaa hai bangka-bangka pompakaa pinotuwu, nasai hinamo suo nta tule'i sinarudo.
Raro tumpu mpakani
8 Koie hai wonua dahandomo meda'a tumpu mpakani hai lueno da mempodaga pinakanindo hi malo. 9 Kai tibo saba mala'ekati tinenano Apu mentade okudahi'ira, kai panarihira niwincano Apu, ntaperando memomee. 10 Kanahiomo koie mala'ekati, « Mi'osie momee. Kana'umpe kupokodungku'akomiu'o Lele Mohende da owose hai luwuo ihino wonua. 11 Die oleo hai kampono i Daud tehinaamo danta pokosalamakomiu, yahoo Pe'apua da ari nidandino Apu Alla. 12 Diemo peto'ono hai comiu: Dakomiu nta awaa me'asa ana'ate da tinolokuni da leleha hai bangka-bangka pompakaa pinotuwu. »
13 Tibo nde'e saba tantara suruga da me'alu to'u meronga koie mala'ekati da memporeree Apu Alla kanahi, 14 « Tereree'omo Apu Alla hai suruga, ronga tepokonahiramo pera miano da ineheno hai wita'ea. »
15 Sampohuledo ko'ira mala'ekati bintanihira lako hai suruga, mpekatiti-titiahiramo ko'ira tumpu mpakani kanahi, « Leumo kato melako hai Betlehem, nta ontoo hapa da kadadia, kana da pinokodungkuno Apu hai cita. »
16 Kando mentekara-karai lako, dungku nde'e awaa koie i Maria, ronga i Yusuf, ronga koie ana'ate da leleha hai bolo bangka-bangka pompakaa pinotuwu. 17 Sando ontoomo nde'e, kando pokodungku'o da ari kinanahiakondo dadaano koie ana'ate. 18 Kando mentekangka nde'e pera miano da modeaho hapa da kanahindo ko'ira tumpu mpakani. 19 Sawali koie i Maria dioho hai pelaroano luwu da kadadia kai daa mekirio. 20 Yahopo kando mpohule ko'ira tumpu mpakani, kando daa mporeree ronga moko'owose'o Apu Alla, kana'umpe perano da ari pinodeando ronga inontondo kana to'usi da ari kinanahiakondo.
I Yesus nisuna ronga niwawa hai raha mpesombaa
21 Sakoano hoalu oleo umuruno koie ana'ate, dungku'omo tempono nta nisuna'ano. Yahopo kando neehakono'o i Yesus, kana da ari poneeno mala'ekati daanopo sai nibanta.
22 Sadungkuno tempono pepokomowuahano wotolu hi ari mompokohina, nunu'o atorano Boku Parentano nabii Musa, koie i Yusuf ronga i Maria wawaamo koie ana'ate hai Yerusalem, nta soroakono'o Apu, 23 kana da teburi hai Boku Parentano Apu, « Luwu ana ntama ntetukaka kahioo kai sinoro hai Apu. »a 24 Ronga penda nta montompa pesomba nunu'o Boku Parentano Apu, da kanahi, « Asa ntaroa ndanga-ndanga atawa rua boto ana nticokou. »b
25 Hai Yerusalem dahoo me'asa tama da meneehako i Simeon, miano da pangkuku ronga mongkona, da totarimaa Apu Alla hi daa nta lilimboihira miano Israil. Sangkoleono Alata'ala dahoo merongaa, 26 ronga ariomo mo'awaakono hi sai da'apo nta mate, ki sai ari ontoo Mokole Pompokosalama da ari pedandino Apu. 27 Sangkoleono Apu wawaamo koie i Simeon kai pewiso hai uluano raha mpesombaa. Koie wotu i Yusuf ronga i Maria wawaa koie ana'ate, nta weweuho kana petenano Boku Parentano nabii Musa. 28 Nilakono i Simeon lawa'o koie ana'ate ronga kekepio, kai reree'o Apu Alla kanahi,
29 « Diekana Apua, dungku'omo dandimiu,
kahioomo die atamiu kai montundu larongku kaku mate.
30 Kana'umpe ku'ontoakono'omo matangku salama'a da mebinta hai Comiu,
31 himi ari mompasadia nta tarondo pera suku,
32 kana niwinca da pokomentoda'o sala salama'a hai suku suere,
kando tereree umatimiu miano Israil. »
33 Taperando tekangka tamano ronga tinano koie ana'ate, hindo podeaho hapa da kanahino i Simeon mekona hai anado. 34 Yahopo koie i Simeon kai barakati'ira, ronga kanahi hai Maria tinano koie ana'ate, « Santo'u-to'uno die ana'ate ariomo pinatantu nta mokontuunaa ronga wanguo miano me'alu hai Israil, naamo nta tewali me'asa peto'o da sai inehendo miano me'alu, 35 kai tino'ori ihi mpelaroando. Ronga pelaroau, Maria, dahoo nta mopoe, kana nilaahino padanga. »
36 Kokeena dahoo me'asa nabii ntina da motu'a'eamo, neeno i Hana, anano Fanuel, mebinta suku Aser. Sa'arino kawi mengkauno opitu ta'u meronga samporano, 37 diekana ntina walumo ronga umuruno halu pulumo opaa ta'u. Nai paisa bintaa uluano raha mpesombaa, mengkena malo meanta sambahea ronga poasa kai tii amala. 38 Koiesi wotu kai leu na'ico kai pontarimakasi hai Apu Alla, yahopo kai pogau'ako dadaano koie ana'ate hai luwu miano da totarimaa tepulosi'ano Yerusalem.
39 Sa'arindo poko'ario luwu atora hai Boku Parentano Apu, pohule'iramo hai kampodo, yahoo Nazaret hai wonua Galilea. 40 Koie ana'ate sa'owo-owosenomo ronga mokora, dompa'o motu'a mpinehawa, ronga pompeehawano Apu Alla merongaa.
I Yesus hai raha mpesombaa daano umuru hopulu orua ta'u
41 Tapio ta'u miano motu'ano i Yesus lako hai Yerusalem poko'owose'o oleo Ntepulosi'a. 42 Tempono i Yesus umuru hopulu orua ta'u, lako'iramo hai Yerusalem kana biasano. 43 Sapurano koie da opia oleo rame-rame'a, pohule'iramo, sawali i Yesus dahopo moo'ia hai Yerusalem, nando da'a to'orio miano motu'ano. 44 Da ponto'orindo dahosi merongahira miano da pe'asa lakodo. Sakoano asa oleo melolakodo, kando u'ungkee hai raro mpetilado ronga da pekato'orindo. 45 Nasando awaa, kando pohule mbule hai Yerusalem u'ungke to'uo.
46 Tekabuno otolu oleo, yahopo kando awaa hai uluano raha mpesombaa hi daa totoro tonga-tongado guru agama, kai daa modedeahira ronga metutukanaihira. 47 Ronga pera miano da modeaho ntaperando mentekangkaako mandarano ronga polawanino. 48 Tempondo miano motu'ano ontoo, tekangkahira. Kai kanahi tinano, « O anaku, hapa kau weweukami kana die? I'aku ronga tamau tewerekamimo u'ungkeko. »
49 Lawanihiramo kanahi, « Hapa kami daa u'ungkeaku? Nami da'a bara to'orio hicua hai rahano Tamangku nta daahangku? » 50 Sawali nasando paha'o da kanahino hai ira.