Lele Mohende da ari pinokodungkuno
Yahya
Pobetekino Gau
Die boku niburino i Yahya atawa Yohanes, yahoo ana guru da nilouno Yesus (21:20-24). Patuduno kai poburi teburi hai 20:31, yahoo: « Kami mparasaea hicuamo koie i Yesus Mokole Pompokosalama, Anano Apu Alla, ronga kimi mparasaeahomo neeno, dakomiumo nta mo'awa toraaha. »
Da iso niburi die hai boku mekona hai Yesus Kristus hicua Haratiano Apu Alla, pu'uno toraaha da tewalimo manusia (1:1-14). Yahopo kai tuluraa peto'o tekangka da me'alu da ari niweweuno i Yesus, kai mentee hicua Anano Apu Alla. Luwuo tulura dadaano tinekangkaako dahandomo mpogau ko'ira miano da da'a kokeena ronga Apu Yesus. Ihino da nigaudo menteehanomo patuduno ko'ira peto'o tekangka. Hai larono koie tulura dahoo asa ntilara miano da parasaeaho ronga tewali ana guruno, sawali dahira na'anda da sai ehee ronga sai ehe parasaeaho.
Hai pasala 13 dungku 17, dahoo teburi pompotisuno i Yesus hai ira ana guruno konaa malo dahanomo nta nirako, patuduno nta pokomorodoo pelaroando. Hai pasala 18 dungku 21, dahoo teburi hapa da kadadia hai Yerusalem tempono i Yesus nirako, ni'adili, nibasiropa hai keu mpinotalambe dungku mate, kinoburu, kai pinokompewangu mbule, kai pepopo'ontoako hai ira ana guruno.
Manturu'o koie i Yesus mokomenteeho wotoluno hi daa koharatia, « Akumo die... » Contono: « Akumo die roti da mompokontora » (6:35); « Akumo die huluno wita'ea » (8:12); « Akumo die wambano koie boso domba » (10:7); « Akumo die tumpu mpakani da kolaro » (10:11); « Akumo pewanguano miano mate ronga da mompokontora » (11:25); « I'akumo die pesalaa da menona ronga toraaha » (14:6); « Akumo pu'uno angguru da santo'u-to'u » (15:1). Kai koharatia penda, « Peri'ouhaku da'a ka'iaa koie i Ibrahim. » (8:58). Kai koharatia kana koie, hinangkua Anano Apu Alla da meri'ou da'a ka'iaa wita'ea.
Hai larono die boku mentoda'anomo po'awaa tora ngkaidaaha yahoo pompoweehino Apu Alla da mentete hai Yesus Kristus. Koie toraaha tilarindo miano danta salama da parasaeaho Apu Yesus hicua « pesalaa da menona » dungku hai Apu Alla (14:6). Sipano i Yahya hi poburi gambaraa Apu Yesus hi nte mompotisu mentete hai parere nta mompokomentoda pompotisu da olaro. Po'alaano da tewali parere yahoo mebinta hai tora-torano miano tapio oleo, koiemo: e'e, roti, molinyaaha, tumpu mpakani ronga dombano, naamo pu'u angguru ronga wuano.
Ihino boku
1. Pobetekino gau (1:1-18).
2. Peto'o tekangka da niweweuno Yesus ronga pompotisuno kai mentee hicua Anano Apu Alla (1:19 – 12:50).
b. Hapa da kadadia hai Yerusalem konaa oleo mpekolia (pasala 5).
c. Hapa da kadadia hai Galilea konaa oleo Ntepulosi'a (pasala 6).
e. Hapa da kadadia hai oleo owose pinule'ano mbule raha mpesombaa (10:22-42).
f. I Yesus pokontoraa i Lazarus ronga mewiso hai Yerusalem (pasala 11 – 12).
3. I Yesus potisu'ira ana guruno hai malo kompura-puraano hi sai da'apo mate (pasala 13 – 17).
4. I Yesus nirako, pinopate, ronga tora mbule (pasala 18 – 20).
5. I Yesus mepopo'ontoako hai ira ana guruno (pasala 21).