Apu Yesus mewangu mbule
(Mat. 28:1-10; Mk. 16:1-8; Yah. 20:1-10)
24
1 Konaa oleo Mincu, dumondo'ea, ko'ira tina melako'iramo hai koburu mpowawa roo pompokomotangka da arimo pinasadiado. 2 Kando teleu awaa koie koburu hi tebalengkamo watu petampono. 3 Nilakodo mpewiso hai bolo ngkoburu, sawali nasando awaa maeatino Apu Yesus kokeena. 4 Dahiramo konainoo mpentade mebangao, kai tibo mentade hai pampando orua miano da mepakea konggela-nggela. 5 Ntaperando momee, yahomo kando sudu dungkui wita, sawali ko'ira miano ndona ngkanahi, « Hapa kami daa u'ungkee miano da tora hai olotando miano mate? 6 Nai da'amo na'ai, pewanguomo. Peehawa'o hapa da ari kinahiino hai comiu, daanopo hai Galilea. 7 Yahoo hi daa nta sinoro Ana Nto Manusia hai limando miano ngkodosa ronga nibasiropa, naamo dahoo nta mewangu mbule oleo ko'otolu. » 8 Yahopo nde'e kando pokopehawa'o koie da ari kinahiino.9 Sampohuledomo mebinta hai koburu, kando tuluraakondo'o luwu hapa da kadadia hai ana guruno da hopulu ka'asa ronga simbaudo meha. 10 Ko'ira tina da tuluraakondo'o ko'ira rasulu yahoo: i Maria Magdalena, i Yohana, ronga i Maria tinano i Yakobus, ronga meha tina da perongando. 11 Sawali koie da tinulurando ko'ira tina nai pewiso hai akalado ko'ira rasulu, nangkuamo kasando parasaea. 12 Mau kicana koie, pewanguosi koie i Petrus mekalulu lako hai koburu. Tempono kokou mompetetelei hai bolo, te'iaasi da inontono pewalu mpena. Yahopo kai pohule, kai daa metukana hai bolo mpelaroano ki hapa koie da ari kadadia.
I Yesus mepopo'ontoako hai sala lako hai Emaus
(Mk. 16:12-13)
13 Koie oleo dahoo orua ana guruno i Yesus da lolako hai me'asa kampo da meneehako Emaus, kira-kira hopulu ka'asa kilo mentalano mebinta hai Yerusalem. 14 Ronga da nigaudo yahoo luwu koie da ari kadadia. 15 Dahiramo konainoo mpogau ronga mekampetukanai, kai saba koie i Yesus okudahi'ira, kando mperonga melolako. 16 Sawali dahoo da halangio matando, kasando to'orio koie i Yesus.
17 Kai petukanaihira koie i Yesus kanahi, « Hapa da nigaumiu himi daa lolako? »
Nilakodo todo ronga ra'indo morutu. 18 Dahoo koie me'asa simbaudo da meneehako i Kleopas molawani kanahi, « Luwu miano da leu hai Yerusalem nahina da sai to'orio hapa da ari kadadia kokeena die opia oleo da ari tealo. Yahopo co'o da sai to'orio? »
19 Kai polawani koie i Yesus kanahi, « Yo hapa nde'e koie da ari kadadia? »
Kando mpolawani kanahi, « Koie kadadia mekona hai Yesus miano Nazaret, me'asa nabii da kuasa hai laro mpohedoano ronga gauno hai ra'ino Apu Alla, ronga hai ra'ino luwu sukumami. 20 Sawali ko'ira kapala pua'ima ronga da wawaicami, arihiramo soroo kai hinuku mate ronga arihiramo basiropaa. 21 Mainakaa pomperahi-rahimami ponoha, Iaamo da leu nta mokolalesaa miano Israil. Sawali koie da ari kadadia itoluomo ari tealo mebinta itonia. 22 Sawali dahoo opia simbaumami tina da mokontebibincokami. Dumondo'ea kando lako hai koburu, 23 nando awaa maeatino. Yahopo kando leu mowawa lele hindo ari ontohira mala'ekati da mo'awaakondo hi toramo mbule. 24 Dahoo penda opia simbaumami da ari lako koie hai koburu ontoo, menonaa da kanahindo ko'ira tina, sawali i Yesus nando da'a ontoo. »
25 Yahopo koie i Yesus kai koharatia, « Hoo comiu miano mpore, ntaperano tumpoko pelaroamiu, yahomo kai mohalimiuo nta parasaeaho da kinahiindo pera nabii. 26 Nai da'a bara paraluu koie Mokole Pompokosalama nta marasai meri'ou hi sai da'apo mewiso hai laro mpinoko'owose'ano? » 27 Yahopo kai tarangkaniakondo'o hapa da teburi luwuo ihino Boku Haratiano Apu Alla mekona hai wotoluno, metampu'u hai bokuno nabii Musa ronga bokudo pera nabii.
28 Dahiramo okudahio koie kampo nta dungku'ando, kai pekokari'ou koie i Yesus kana hi daa nta sai-saino lako. 29 Sawali hindona ntotonga'o kanahi, « Mintealopo isala hai cami. Kiniwiahomo, nta sumoo'omo oleo. » Yahomo nde'e kai nunu'ira mewiso hai laicando.
30 Dahiramo mentotoro mpongkaa, kai po'ala roti koie i Yesus, kai pontarimakasi hai Apu Alla, yahopo kai sisibio ronga titila'ira. 31 Koiemo wotu tebuka'ano matando, kando to'orio hicuamo i Yesus. Sawali tibo'omo isa bintanihira. 32 Kando pada mengkanahi, « Na'iaa bara pelaroanto kana da moluawako sanaa daano mogau'akita hai laa sala, ronga tarangkaniakita'o ihino Boku Haratiano Apu Alla? »
33 Koiesi tempo kando mpe'engka sai-saindo mohule hai Yerusalem. Kokeenamo dahando awahira da hopulu ka'asa ana guruno, hindo daa mpekompulu ronga simbaudo, 34 kando daa kanahi, « Santo'u-to'uno Apu pewanguomo mbule, ronga ariomo mepopo'ontoako wotoluno hai Simon! » 35 Yahopo ko'ira miano da orua kando tuluraakondo'o hapa da ari kadadia hai laa sala, ronga ki kana'umpe kando to'orio hicua Iaa tempono sisibio roti.
I Yesus popo'ontoniakondo'o wotoluno hai ira ana guruno
(Mat. 28:16-20; Mk. 16:14-18; Yah. 20:19-23; Tul. Ras. 1:6-8)
36 Dahira konainoo mogau dadaano koie, kai tibo mentade koie i Yesus hai tongado ronga koharatia, « Kahioomo kai momapu laromiu. »
37 Kando mentebibinco ronga momee, nangkua da ponto'orindo hicua yo tonuana da inontondo. 38 Kai koharatia, « Yo hapa kami momee ronga bata-bata laromiu? 39 Mi'ontoomo limangku ronga karuku, Akumo die! Ontoaku ronga hedoaku. Kana'umpe tonuana nahina wotoluno ronga nahina wukuno kana I'aku die. »
40 Dahomo mogau kana koie, kai daa popo'ontoniakondo'o limano ronga karuno. 41 Sawali nando da'apo parasaea, ndona daapo tekangka ronga liwa mohende'a, kai petukanaihira koie i Yesus kanahi, « Dahoo bara nta kinaa da nidiomiu na'ai? » 42 Yahopo kando poweeho asa kolo ica tinunu. 43 Kai alaa kai tewawe hindo daa me'ontoo.
44 Kai po'awaakondo kanahi, « Diemo ino'awangku Ku'ari mo'awaakomiu daangkupo merongakomiu: dahoo nta kadadia luwu da teburi mekona hai Aku hai laro bokuno nabii Musa, ronga bokudo nabii, naamo boku Mazmur. »
45 Kai buka'akondo'o pekirindo, kando paha'o koie ihino Boku Haratiano Apu Alla. 46 Koharatia'omo, « Dahoo teburi kana die: Mokole Pompokosalama dahoo nta marasai ronga nta mewangu mebinta hai miano mate konaa oleo ko'otolu, 47 ronga tendenomo kuasano kando pinokodungku'ako upuo suku kando mentoba ronga inampuni dosando, metampu'u hai Yerusalem. 48 Comiumo saksiino di'ira luwu. 49 Ronga dahakusi nta montena'akomiu hapa ari pedandino Tamangku. Sawali mimpoo'ia die hai bolo ngkota dungku kai leu tuduricomiu kuasa da mebinta hai suruga. »
I Yesus moleka sabe hai suruga
(Mk. 16:19-20; Tul. Ras. 1:9-11)
50 Kai wawahira koie i Yesus hai bungku kota dungku okudahio Betania. Kokeenamo dahano taarako limano ronga barakati'ira. 51 Dahomo konainoo barakati'ira, kai bintanihira ronga taara hai suruga. 52 Kando mesudu mesombaiho, yahopo kando mpohule hai Yerusalem taperando memohende. 53 Ronga sadiahira nte reree'o Apu Alla hai uluano raha mpesombaa.