Tumpu mpakani da kolaro
10
1 « Santo'u-to'uahano Kupo'awaakokomiu: Miano da mewiso hai boso domba sai montealohi wamba, sawali momone hai katondo, koiemo miano mpononako ronga parampo. 2 Sawali inai da mewiso hai wamba, koiemo tumpu mpakani. 3 Koie da modaga wamba ungkahiakono'o wamba koie tumpu mpakani, ronga ko'ira domba ndopodeaho suarano. Kai boboihakondo'o neendo kuu-kuu'o boto, kai wawahira kando mpeluarako. 4 Kindo mpeluarakomo ko'ira luwuo dombano, peri'ouhomo kando mperumbuihakono, kana'umpe ndona nto'orio suarano. 5 Sawali kicua suere miano, nando da'a nta ponunu, deenapo dahira nta mpolaisio, kana'umpe nasando to'orio suarano. » 6 Koiemo hi ari momparereakondo i Yesus, sawali nasando paha'o hapa petuduano.7 Kai koharatia penda i Yesus, « Santo'u-to'uahano Kupo'awaakokomiu: Akumo die wambano koie boso domba. 8 Luwu miano da meri'ou leu ka'iaa I'aku, ko'iramo miano mpononako ronga parampo. Nangkuamo ko'ira domba kasando ehe mogiu suarando. 9 Akumo die wambano koie boso, inai da mewiso tealo hai Aku, dahoo nta salama. Dahoo nta mewiso ronga meluarako kai po'awa mongkaa. 10 Kai leu koie miano mpononako, te'iaasi nta mononako ronga mompepate, kai tii mososa'o. Sawali I'aku kaku leu, yahoo kando to'ori mo'awa toraaha da me'alu barakatino.
11 Akumo die tumpu mpakani da kolaro. Tumpu mpakani da kolaro weehako penaano tendenomo ko'ira dombano. 12 Sawali kicua miano nigadi, da sa'iaa tumpu mpakani ronga sa'iaa ntei domba, ki po'onto dahu lampu leunio, dahoo nta molaisihira ko'ira domba. Kai totopaihira koie dahu lampu, kando mentekamburako mpolai. 13 Kai polai koie miano, hina nte'iaasi mo'oleo gadi, yahomo kasai pompaduli ko'ira domba.
14 Akumo die tumpu mpakani da kolaro. Kuto'orihira ko'ira dombangku, kanasi na'anda ndoto'oriaku, 15 kana hi to'oriaku Tamangku, kanamo na'angku Kuto'orio Tamangku. Yahomo kaku weehako penaangku tendenomo ko'ira dombangku. 16 Dahirapo penda ko'ira dombangku da sai mpe'asa boso na'ai. Dahakusi nta wawahira na'anda, kando podedeaho suarangku, kando mpedulu tewali asa lunu ronga me'asa pakanindo.
17 Kai lou'aku Tamangku, tendenomo hicu weehako penaangku, kaku to'ori tarimaa mbule. 18 Nahina te'asa miano da to'ori alaa penaangku, sawali Kuna weehakono'o nunu'o po'ehengku. Kuasaaku weehakono'o penaangku ronga kuasaaku nta tarimaa mbule. Diemo tugasincu da ari tinarimangku mebinta hai Tamangku. »
19 Tendenomo koie gauno i Yesus, kando mpekakahi penda ko'ira miano Yahudi. Me'aluo da kanahi, 20 « Dahoo lawuiho setani kai molawu; yo hapa kami mpompodedea? »
21 Sawali dahoo penda da kanahi, « Koie na'iaa gauno miano da nilawuino setani. To'orio bara setani mompokongko'onto miano mopusu? »
I Yesus sai inehe
22 Da'a mengkau naleuho oleo pinokomaroahano hi ari pinule mbule koie raha mpesombaa hai Yerusalem. Koie tempo yahoo wula ngkoseo. 23 Koie i Yesus dahoo tade-tade hai uluano raha mpesombaa hai pe'olu-olua da meneehako pe'olu-oluano Sulaiman. 24 Kando melibutio ko'ira miano Yahudi ronga kanahi, « Te'impiapo kau daa nta ari-ari weweukami sai awaa laro? Kicuamo co'o Mokole Pompokosalama, po'awaakamimo kai mentee. »
25 Kai lawanihira i Yesus, « Ariakumo mo'awaakomiu, sawali nasami parasaea. Ko'ira pohedoangku da ari hinedongku hai laro neeno Tamangku, koiemo buktiino da tewali saksiicu. 26 Sawali nasami ehe parasaea, kana'umpe nasa'iaa comiu dombangku. 27 Ko'ira dombangku ndopodedeaho suarangku, ronga Kuto'orihira, ronga ndomenunu'aku. 28 Dahaku nta weehira tora ngkaidaaha, yahomo kasando da'a nta binasa dungku samengka-mengkauno. Mau te'asa miano nahina danta alahira mebinta hai limangku. 29 Ariomo Tamangku weehaku ira, ronga kolalo owose kuasano ka'iaa luwu da da'a. Nahina nta tule'i alahira mebinta hai limano. 30 I'aku ronga Tamangku bobotokami. »
31 Yahopo penda ko'ira miano Yahudi kando mpo'ala watu nta watuiho i Yesus. 32 Sawali i Yesus nangkoharatia, « Me'aluomo niweweungku da moico hi ari tena'aku Tamangku da inontomiu. Ki maina koie sababuno kami daa nta watuihaku? »
33 Kando mpolawani ko'ira miano Yahudi kanahi, « Na'iaahako koie pohedoau da moico kako daa nta watuico, sawali hiu paruruo Apu Alla, kana'umpe co'o to manusia kau mokea mengkengkenaiho Apu Alla. »
34 Kai lawanihira i Yesus kanahi, « Dahoo teburi hai Boku Parentano nabii Musa da nidiomiu, ‹ Koharatia'omo Apu Alla, « Comiu yahoo pe'apua. » ›a 35 Koie Boku Haratiano Apu Alla nai to'ori niboli'i. Dadi, kicuamo Apu Alla neehakondo'o pe'apua ko'ira miano da tarimaa haratiano, 36 dakomiupo bara nta kanahi hicu daa paruruo Apu Alla, tendenomo hicu kanahi, ‹ Aku Anano Apu Alla. › Mainakaa ariomo tindahakoaku Tamangku ronga tena'aku tii die hai wita'ea. 37 Ki saku weweuho pohedoano Tamangku, mi'osie parasaeahaku. 38 Sawali Kuna weweuhosi ronga nami ehesi parasaeahaku, koiepo koma niweweungku kami mparasaeaho, kami nto'ori to'uo hi boboto'akuo Tamangku, ronga I'aku na'angku boboto'akono. »
39 Kando mokea rako'o penda koie i Yesus, sawali nasando poko'ungkaario.
I Yesus hai asa poleno laa e'e Yordan
40 Pompoleemo koie i Yesus hai laa e'e Yordan ariano mopobaho i Yahya iponoha, kai poo'ia kokeena. 41 Me'aluhira miano da meleu awaa ronga kanahi, « Koie i Yahya nahina te'asa niweweuno tinekangkaako, sawali luwu da kinahiino mekona die miano menonaa. » 42 Ronga me'aluo miano da parasaeaho i Yesus kokeena.