Lele Mohende da ari pinokodungkuno
Lukas
1
1 O Teofilus da te'angga, me'aluo miano da ari tandaiho burio tulurano hapa da ari kadadia die hai cita. 2 Ko'ira miano da tuluraakita'o koie kadadia yahomo da iso-iso ontoakono'o matando, ronga tewalihiramo miano da moleleako haratia. 3 Nangkuamo koie, sa'arincu paresaa melo-melou koie luwu tulura mebinta petampu'uno, kaku otuhio nta buriakokomiu'o nde'e kai te'atoro, 4 kami nto'orio koie luwu da ari pinepopotisu'akomiu hi menona.Lele nta tehinano nabii Yahya
5 Tempono i Herodes momokole hai wonua Yudea, dahoo me'asa pua'ima pontompa pesomba da meneehako Zakharia, da tewiso hai kolompo pua'ima da nineehako kolompo Abia. I Elisabet samotu'ano yahoo leeno pua'ima Harun. 6 Orua'ira podo pangkuku hai ra'ino Apu Alla. Torando nunu'o luwu parentano ronga atorano Apu, ronga nahina pekebaakoando. 7 Sawali nasai hina anado, hina ngkomba koie i Elisabet. Mainapo orua'ira motu'ahiramo.
8 Me'asa oleo konaa gilirano kolompono Abia, koie i Zakharia dahoo padala'o pohedoano pua'ima hai ra'ino Apu Alla. 9 Tempono niloterei, kana to'u nte niweweundo hindo daa nta mompatantu pua'ima danta metugasi, iaamo da konaa loterei nta mewiso hai raha mpesombaa montunu dupa. 10 Konaa wotu pontunua dupa, kando mentekongko miano me'alu hai luara kando amala.
11 Kai pepopo'ontoako wotoluno koie mala'ekatino Apu hai Zakharia, mentade hai muanano meda pontunua dupa. 12 Tempono i Zakharia ontoo koie mala'ekati, kai tebibinco ronga ntaperano momee. 13 Sawali nangkanahi koie mala'ekati, « Osie momee, Zakharia. Tetarimaamo amalau. Koie samotu'au i Elisabet dahoo nta mompokohinaakoko me'asa ana ntama, ronga nta poneeu i Yahya. 14 Daako nta mohende ronga sanaa to'u, ronga dahoo nta me'alu miano danta itai mohende tendenomo koie da tehina. 15 Kana'umpe dahoo nta tewali miano owose hai ra'ino Apu. Nai da'a nta paisa mondo'u angguru atawa da nimolanguako, ronga dahoo nta kuasaiho Sangkoleono Alata'ala metampu'u daanopo hai malo-malo. 16 Dahoo nta me'alu miano Israil danta niwawano mbule hai Apu Alla Apundo. 17 Dahoo nta kana pelaroano ronga kuasano nabii Elia ronga dahoo nta meri'ou mompasadia'akono Apu umati da sadia mpelaroa. Dahoo nta pokomoicoo miano motu'a ronga anano, naamo miano da madoraka dahoo nta boli'io kai pohule mbule awaa pinehawa da tekona. »
18 Yahopo koie i Zakharia kai petukanaiho koie mala'ekati kanahi, « Kana'umpe kaku daa nta to'orio hi daa nta kadadia? Kana'umpe motu'aakumo, ronga samotu'angku lembahiomo tora. »
19 Kai lawanio koie mala'ekati, « I'akumo Gabriel, da mentade hai ra'ino Apu Alla, ronga i'akumo da tinena leu mogau'akoko, ronga mokodungku'ako'o die lele moico. 20 Hina sau parasaeaho hapa da kanahincu, yahomo kau daa nta mulu. Nau da'apo nta to'ori mogau dungku kai tehina koie ana'ate. Kana'umpe da ari kanahincu dahoo nta kadadia, ki dungkumo wotuno. »
21 Ko'ira miano me'alu da totarimaa i Zakharia kai peluarako, mentekangkahira, hina mengkau da'a hai larono raha mpesombaa. 22 Tempono meluarako, nai to'orimo mogau'akondo. Yahomo kando to'orio hi arimo mo'onto niamata hai larono raha mpesombaa. Kana'umpe kai pogau'ako limano, hina daapo mulu.
23 Sapuranomo wotu mpohedoano da opi-opia oleo, namohule'o hai kampono. 24 Nai da'amo lembahi, mentiahomo nde'e i Elisabet samotu'ano. Lima wotiti mengkauno i Elisabet mewuwuniako, kanahino, 25 « Diemo pompeehawano Apu i'aku, kai osie miano moko'anu-anuaku. »
Lele nta tehinano i Yesus
26 Sakoanomo onoo wotiti mentia koie i Elisabet, kai tena'o Apu Alla koie mala'ekati Gabriel lako hai Nazaret, me'asa kampo da hai Galilea. 27 Tinena lako hai me'asa waipode da sai paisapo hinenderino tama, da meneehako i Maria. Koie waipode metunangaako koie tama da meneehako i Yusuf, leeno mokole Daud. 28 Kai pewiso koie mala'ekati hai laicano i Maria, kai sosampataeho kanahi, « Mohendemo, ico'o da nibarakati. Apu da merongako. »
29 Kai tebibinco koie i Maria hi podeaho koie gau, kai petukana hai bolo mpelaroano, ki hapa batuano koie pososampotae. 30 Kanahiomo koie mala'ekati, « O Maria, osie momee, kana'umpe nameehawako Apu Alla. 31 Dakomo nta mobanta, kau pokohinaa me'asa ana ntama, ronga nta poneeu i Yesus. 32 Dahoo nta tewali miano owose, ronga nineehako Anano Apu Alla da pinokomontoe. Apu Alata'ala dahoo nta mompasadia'akono kadera pomokole'ano i Daud mbueno. 33 Dahoo nta parentahira leeno i Yakub samengka-mengkauno, ronga pomparentaano nahina puraano. »
34 Kanahiomo i Maria hai mala'ekati, « Kana'umpemo die kai daa nta dadi? Nasahinapo tama da ari henderiaku. »
35 Kai polawani koie mala'ekati, « Sangkoleono Alata'ala dahoo nta tudu hai co'o, ronga kuasano Apu Alla da montoe danta olumico. Nangkuamo koie, koie ana'ate danta pinokohinau dahoo nta mewota, ronga dahoo nta ninee Anano Apu Alla. 36 Santo'u-to'uahano, i Elisabet, koie petila'u, dahomo banta'o me'asa ana ntama hai laro motu'aano die; koie da nineehako tina ngkomba, onoomo wotiti tiano diekana. 37 Kana'umpe hai Apu Alla, nahina da sai tewali. »
38 Kanahiomo i Maria, « I'aku die atano Apu, kahioomo kai dadi kana da kanahimiu. » Yahopo koie mala'ekati kai lako bintanio.
I Maria lako awaa i Elisabet
39 Sa'arino tealo opia oleo, tekara-karaihomo i Maria lako hai me'asa kampo hai wonua Yehuda da kotangke-tangkeno. 40 Kokeenamo sumoo'ano hai laicano i Zakharia, kai sosampotaeho i Elisabet. 41 Tempono koie i Elisabet modeaho pososampotaeno i Maria, namomuloo koie ana'ate da nibantano, ronga i Elisabet kuasaihomo Sangkoleono Alata'ala. 42 Yahopo kai pekora kanahi, « Ico'omo da telia nibarakatino Apu Alla ka'iaa luwu tina suere, ronga kai nibarakatimo koie ana'ate danta pinokohinau. 43 Inaihaku die, kai leu tinano Apungku tandaihaku? 44 Kana'umpe tempongku modeaho pososampotaeu, ana'ate da nibantaku tibo-tibono momulo mohende. 45 Konantuarako, hiuna mparasaeaho hapa da kanahino Apu hai co'o dahoo nta dadi. »
Lagu mporereeno i Maria
46 Yahopo i Maria kai kanahi,
« Larongku moko'owose'o Apu,
47 ronga sangkoleongku mohende tendenomo Apu Alla, Gurusalamaku.
48 Nameehawa'o sangkinaano da teruru.
Metampu'u diekana dungku tepoposoro-soro,
luwu miano nta kanahi konantuaraaku.
49 Kana'umpe da kuasa'ea da ari mompadadi da owose hai aku.
Mewota'o neeno.
50 Pololarono nta merongaa pera miano da momeetako,
dungku tepontapi-tapi lee.
51 Tendenomo limano da mokora,
kai kamburakohira miano da montoe larondo, kasai dadi akalado.
52 Kai tiihakohira da mpomokole mebinta hai kaderando,
ronga taarako totoro'ando miano da teruru.
53 Kai pokomowohiakondo'o pera da moico hai ira miano mokohuloo,
ronga tena'ira miano ngkawasa kando lako ronga lima woa.
54 Kai tulumihira miano Israil atano,
nampokopehawa'o pololarono,
55 kana to'u da ari pedandino hai mbue-mbueto,
i Ibrahim ronga leeno dungku samengka-mengkauno. »
56 Kira-kira otolu wotiti poo'iano koie i Maria hai laicano i Elisabet, yahopo kai pohule.
Hinaano nabii Yahya
57 Sakoano wotitino i Elisabet, kai pompokohina me'asa ana ntama. 58 Sando podeaho ko'ira sangkampono Elisabet ronga raro mpetilano, hi arimo Apu Alla mokomenteeho kamoicono da owose hai iaa, me'itaihiramo memohende.
59 Kohoaluno oleo hina koie ana'ate, meleuhiramo nta mesuna'o, ronga nta meneehakono'o i Zakharia kana neeno tamano.a 60 Sawali tinano nangkanahi, « Na'iaa, nta neeno yahoo i Yahya. »
61 Mengkanahi'iramo, « Hai raro mpetila'u nahina da meneehako kana koie. »
62 Yahopo kando pogau limaakono tamano metukanaiho po'eheno kinaiho nta neeno anano. 63 Koie i Zakharia mo'ita watu mpoburia kai buriakondo'o, « Neeno yahoo i Yahya. » Nangkuamo kando mentekangka. 64 Koiesi wotu kai tebuka ngangano, ronga elono to'ori mogau, kai reree'o Apu Alla. 65 Yahopo kando memomee pe'asa ngkampono, ronga luwuo koie da kadadia tewaliomo pogau'ando miano da meda'a hai wonua Yudea da kotangke-tangkeno. 66 Luwu miano da modeaho koie kadadia mepekiri olaro kanahi, « Hapa nta dadino die ana'ate? » Kana'umpe namerorongaa Apu.
Lagu mporereeno i Zakharia
67 Koie i Zakharia tamano kuasaiho Sangkoleono Alata'ala, yahopo kai pogau kana nabii kanahi,
68 « Tereree'o Apu Alla Apundo miano Israil,
naleumo awahira umatino ronga huda'ira.
69 Kai weehakita'o Pompokosalama da kuasa,
leeno i Daud atano,
70 kana haratiano mebinta iponoha,
da pinokodungkudo raro nabiino da tinindahakono.
71 Iaamo danta mokosalamakita mebinta hai pera da dalukita,
ronga hai limando pera miano da kokoleakita.
72 Nta mokomenteehakondo'o pololarono ko'ira mbueto,
ronga meehawa'o dandino da mewota,
73 yahoo da ari pesumpano hai mbueto Ibrahim,
74 nta hudakita mebinta hai limando pedalunto,
kato to'ori mesombaiho sai momee,
75 kato tewali miano da molinyaa mpelaroa ronga da tekona hai ra'ino,
ilarono hito daapo tora.
76 Ronga co'o anaku, nta ninee nabiino Apu Alla da montoe,
hiuna nta meri'ou mompasadia'akono nta salano Apu,
77 ronga nta pokodungku'akondo'o umatino hindo daa nta pinokosalama,
hi daamo nta inampuni dosando.
78 Tendenomo pololarono Apu Alla Apunto ronga polouno cita,
dahoo nta leu awakita Pompokosalama mebinta hai suruga,
kana oleo da tepana,
79 nta wincahihira miano da mpoo'ia hai laro rondomaa,
ronga da kinuasaino mateaha,
ronga danta wowawaa karuto hai sala da mapuhio laronto. »
80 Koie ana'ate sa'owo-owosenomo ronga sateti-tetianino morodo pelaroano. Poo'iahomo hai tonga lueno papawu dungku kai leu tempono nta saba hai ira miano Israil.