Nabii Yahya pompobaho
(Mat. 3:1-12; Mk. 1:1-18; Yah. 1:19-28)
3
1 Kohopuluno olima ta'u pomparentaano mokole'ea i Tiberius, tempono i Pontius Pilatus tewali gubernur hai Yudea, ronga i Herodes Antipas momokole hai Galilea,a i Filipus petilano i Herodes momokole hai wonua Iturea ronga Trakhonitis, yahopo i Lisanias momokole hai Abilene, 2 kai tii I Hanas ronga i Kayafas tewali pua'ima'ea, koiemo ta'u kai leu haratiano Apu Alla hai Yahya, anano i Zakharia, hai lueno papawu. 3 Leuhomo i Yahya hai upuo wonua Yordan ronga moleleako haratia, kando memanda miano ronga nibaho kai inampuni sinalakindo. 4 Da niweweuno i Yahya kana da teburi hai bokuno nabii Yesaya kanahi:« Dahoo miano da mehohou hai lueno papawu kanahi:
‹ Mipasadia'akono'o nta salano Apu;
mimpokoteakono'o nta tealoano.
5 Pera lebo nta hinowui,
ronga pera tangkeno ronga kabumbu nta pinokomarete.
Sala da kolincu-lincu nta pinokote,
sala da kobolo-bolo nta pinokomorete.
6 Ronga pera miano nta ontoo salama'a da mebinta hai Apu Alla. › »b
7 Yahopo koie i Yahya kai kanahi hai miano me'alu da leu nta mepebaho hai iaa, « Hoo comiu leeno ule molori! Inai da mo'awaakomiu kanahi, dakomiusi nta tepolai mebinta hai sa'o larono Apu Alla danta leu? 8 Mimpebangu'akomo sipa da moico, peto'ono himi manda to'umo. Mi'osie kanahi hai laromiu hicua i Ibrahim mbuemiu, nami da'amo nta sala mohapa. Kupo'awaakokomiu: Apu Alla tule'io mokodadio di'ira watu tewali leeno Ibrahim! 9 Hukumano Apu Alla kana pali da sadiamo nta pompodo keu. Pera keu da sai kowua moico dahoo nta pinodo, kai nihawiako hai bolo api. »
10 Miano me'alu metukanaiho, « Kicana koie, hapa danta niweweumami? »
11 Polawaniomo i Yahya, « Inai da koa rua lewe babuno, kahioomo kai tila'akono'o da sai kobabu, ronga naiho da kokinaa, kahioomo na'ana kai poweweuhako kana koie. »
12 Meleuhiramo na'anda miano mpontagi sima nta mepebaho ronga metukanaiho, « O tuangguru, hapa danta niweweumami? »
13 Polawaniomo, « Osie montagi sima laloiho da ari pinatantu. »
14 Dahoo na'anda sorodadu da metukanaiho, « Kana'umpemo na'amami, hapa danta niweweumami? »
Polawaniomo i Yahya, « Osie mo'ala mpakisaa, ronga osie montutumbu da sai menona, ronga koa'omo gadi mpantamiu. »
15 Koie wotu miano me'alu da mpetotarima ronga momperahi-rahi, luwundo mpetukana hai larondo dadaano i Yahya, kicuamo iaa Mokole Pompokosalama. 16 Kai polawani i Yahya hai miano me'alu kanahi, « Kubaho'akomiu'o e'e, sawali Iaa da kolalo kuasa ka'iaa i'aku dahoo nta leu, mau wuwuhiakono'o rongo sandalano, naku pantasi. Iaamo danta baho'akokomiu'o Sangkoleono Alata'ala ronga api. 17 Duku dahomo hai limano nta pontopihino luwu inii kai mowua, yahopo kai wiso'o hai bolo ngkampiri. Sawali apaino nta tinunuo hai api da sai pinokopopate! » 18 Me'aluo ka'oliwi meha da pinokodungkuno i Yahya hi daa moleleako Lele Mohende hai miano me'alu.
19 Sawali i Yahya nangkebaako i Herodes mokoleno wonua Galilea, dadaano hi o'api hai Herodias samotu'ano petilano, ronga hina me'alu niweweu mosa'ono meha. 20 Kai tetianio penda niweweu mosa'ono koie i Herodes, yahoo wiso'o i Yahya hai bolo ntorungku.
I Yahya baho'o i Yesus
(Mat. 3:13-17; Mk. 1:9-11; Yah. 1:32-34)
21 Daando menibaho ko'ira miano me'alu, nibaho'omo na'ana koie i Yesus. Ronga daano konainoo amala, kai teboa langi, 22 ronga tiihomo Sangkoleono Alata'ala hai tarono kana ticokou, yahopo kai pinodea haratia mebinta hai suruga da kanahiako, « Co'omo Anaku da nilouku ronga da inehengku. »
Soro pelee'ano i Yesus
(Mat. 1:1-17)
23 Tempono i Yesus montampu'u pohedoano, umuruno kira-kira tolu pulu ta'u, ronga pompahano miano, yo anano i Yusuf, anano i Eli, 24 anano i Matat, anano i Lewi, anano i Malkhi, anano i Yanai, anano i Yusuf, 25 anano i Matica, anano i Amos, anano i Nahum, anano i Hesli, anano i Nagai, 26 anano i Ma'at, anano i Matica, anano i Simei, anano i Yosekh, anano i Yoda, 27 anano i Yohanan, anano i Resa, anano i Zerubabel, anano i Sealtiel, anano i Neri, 28 anano i Malkhi, anano i Adi, anano i Kosam, anano i Elmadam, anano i Er, 29 anano i Yesua, anano i Eliezer, anano i Yorim, anano i Matat, anano i Lewi, 30 anano i Simeon, anano i Yehuda, anano i Yusuf, anano i Yonam, anano i Elyakim, 31 anano i Melea, anano i Mina, anano i Matata, anano i Natan, anano i Daud, 32 anano i Isai, anano i Obed, anano i Boas, anano i Salmon, anano i Nahason, 33 anano i Aminadab, anano i Admin, anano i Arni, anano i Hezron, anano i Peres, anano i Yehuda, 34 anano i Yakub, anano i Ishak, anano i Ibrahim, anano i Terah, anano i Nahor, 35 anano i Serug, anano i Rehu, anano i Peleg, anano i Eber, anano i Salmon, 36 anano i Kenan, anano i Arpakhsad, anano i Sem, anano i Nuh, anano i Lamekh, 37 anano i Metusalah, anano i Henokh, anano i Yared, anano i Mahalale'el, anano i Kenan, 38 anano i Enos, anano i Set, anano i Adam, anano Apu Alla.